Рэха падзеі: Дзень Незалежнасці ў Брэсце

На рэспубліканскім рэферэндуме Беларусь у 1996 годзе вырашыла святкаваць свой Дзень Незалежнасці 3 ліпеня. У гісторыі нашай краіны гэта дата даўно ўжо асацыявалася менавіта з незалежнасцю і свабодай. У далёкім 1944-м у гэты дзень ад фашысцкай навалы была вызвалена беларуская сталіца – Мінск. Безумоўна, у наданні 3 ліпеня статусу Дня Рэспублікі было сімвалічнае яднанне пакаленняў у памкненні мець сваю суверэнную дзяржаву, дзеля яе працаваць і тварыць. І сёлета гэта яднанне народа, які будуе моцную і квітнеючую дзяржаву, стала лейтматывам святочных мерапрыемстваў у Дзень Незалежнасці Рэспублікі Беларусь. Акорды такога гучнага і яркага свята ўздымалі настрой людзей і ў вялікіх гарадах, і ў маленькіх вёсачках.
Па традыцыі ў абласным цэнтры Дзень Рэспублікі пачынаецца ў месцы з вельмі сімвалічнай назвай – на плошчы Свабоды. 3 ліпеня кіраўніцтва вобласці і горада, дэпутаты, прадстаўнікі грамадскіх арганізацый, дыпламаты, ветэраны і моладзь прыйшлі з кветкамі да помніка воінам-вызваліцелям. Мінутай маўчання ўшанавалі памяць загінулых за незалежнасць роднай краіны ў гады Вялікай Айчыннай вайны. Гучыць залп – мірныя стрэлы рэхам коцяцца ў мінулае. Каб тыя, хто назаўжды засталіся на той вайне, ведалі: у мірным ХХI стагоддзі іх памятаюць нашчадкі, якія стваральнай працай сёння ўмацоўваюць сваю рэспубліку.
Потым удзельнікі мемарыяльных мерапрыемстваў накіраваліся ў Брэсцкую крэпасць-герой. Цытадэль над Бугам была, ёсць і будзе сімвалам мужнасці і адвагі нашага народа, гонарам Беларусі і свяшчэннай памяццю ўсіх пасляваенных пакаленняў. Да Вечнага агню ўскладаюць кветкі. Вайскоўцы брэсцкага гарнізона парадным маршам праходзяць па плошчы Цырыманіялаў…
– Калі мы сустракаем гэта свята – Дзень Незалежнасці, дык павінны думаць аб тых мільёнах лёсаў людзей, якія не зведалі шчасця. Нам трэба памятаць, што некалі дарослыя скралі дзяцінства ў мільёнаў дзяцей. Бо гэта памяць – наша духоўнасць, – гаворыць журналістам старшыня аблвыканкама Канстанцін Сумар і падкрэслівае: – Ніхто не будзе зараз аспрэчваць таго, што, менавіта дзякуючы цярпенню, працавітасці нашых беларусаў, з падачы Прэзідэнта краіны ад разрухі 90-х гадоў мы прыйшлі да становішча, калі смела можна гаварыць: краіна адбылася, краіна набыла незалежнасць, яна пабудавала сваю эканоміку, яе ўспрымаюць як суверэнную дзяржаву. Духоўнасць, патрыятызм, любоў да сваёй зямлі – гэта дало магчымасць за два дзесяцігоддзі зрабіць нашу краіну пазнаваемай ва ўсім свеце.
А потым горад святкаваў песнямі, танцамі, народнымі гуляннямі. На Бярозаўцы прайшло свята мікрараёна з забаўляльнай праграмай, конкурсамі для дзяцей і дарослых, паказальнымі выступленнямі падраздзяленняў пажарна-выратавальнай службы.
У парку воінаў-інтэрнацыяналістаў Дзень Рэспублікі адзначаў Маскоўскі раён. Праграму “Шаную цябе, Беларусь!” адкрыў народны хор “Вяснянка” электралямпавага завода. Канцэрт падхапілі іншыя самадзейныя калектывы, артысты эстрады, танцавальныя ансамблі.
Увечары тысячы брастаўчан і гасцей горада сабраліся на плошчы Леніна. У святочным канцэрце прынялі ўдзел 200 артыстаў. Кожнае выступленне стала музычным прызнаннем у любові сваёй Айчыне, яе народу і падзякай папярэднім пакаленням за мірную і незалежную Беларусь. Уся плошча далучылася да рэспубліканскай акцыі “Праспяваем гімн разам!”. І ўвесь горад радаваўся святочнаму салюту – 30 залпаў расквецілі начное неба дзівоснымі ўзорамі агеньчыкаў, што асвяцілі наш Дзень Рэспублікі.
Святлана ТАБОЛІЧ, “НТ”.
Фото Аляксея ГАНЧУКА, “НТ”.