У Кобрыне 8 ліпеня ўпершыню адсвяткавалі Дзень сям’і, кахання і вернасці, арганізатарамі якога выступілі Кобрынскае благачынне і аддзел ЗАГС райвыканкама
Сёння многія ведаюць пра Дзень святога Валянціна, які прыйшоў да нас з Захаду, але ў праваслаўных хрысціян ёсць свае заступнікі закаханых, шлюбу і сямейнага шчасця – Пётр і Фяўроння. Менавіта яны з’яўляюцца апекунамі Дня сям’і, кахання і вернасці. Упершыню ў Кобрыне свецкая ўлада і Царква адзначылі яго сумесна.
У гэты дзень ва ўсіх праваслаўных храмах горада прайшла боская літургія, пасля якой адбыўся хрэсны ход да Свята-Аляксандра-Неўскага сабора, дзе чыталі малебен аб сям’і. Святочная праграма адбылася на Замкавай плошчы. Тут пад промнямі гарачага сонца спраўдзілася запаветная мара Аляксандра Антанюка і Людмілы Штык, якія стварылі сям’ю. Ва ўрачыстай абстаноўцы атрымалі пасведчанні аб нараджэнні дзяцей бацькі самых маленькіх жыхароў горада – сем’і Мельнічук і Углянец. Арганізатары свята ўшанавалі і мнагадзетныя кобрынскія сем’і. З асаблівым хваляваннем і бурнымі апладысментамі віталі юбіляраў “жамчужнага” вяселля – Людмілу і Аркадзія Ціханавых.
Усіх герояў і гасцей свята павіншавала старшыня раённага Савета дэпутатаў Таццяна Місюк. Удзельнікі мерапрыемства атрымалі букеты з рамонкаў – сімвала кахання, і падарункі ад райвыканкама і СТАА ВП “Палессе”. Не абышлося без музычных і танцавальных нумароў: перад гасцямі выступілі навучэнцы Дома творчасці юных, школы мастацтваў і праваслаўныя царкоўныя брацтвы.
У імя кахання і сям’і было арганізавана гэта мерапрыемства, якое можа стаць новай кобрынскай традыцыяй.
Юлія ВОЎК,
студэнтка
БрДУ імя А.С. Пушкіна,
г. Кобрын.