Абвешчаны традыцыйны штогадовы конкурс “Слова маладых”

Творчае спаборніцтва сярод маладых прафесійных журналістаў, юных карэспандэнтаў, клубаў (гурткоў) пры райкамах і гаркамах БРСМ ладзяць абласны камітэт Беларускага рэспубліканскага саюза моладзі, аддзел па справах моладзі Брэсцкага абласнога выканаўчага камітэта і рэдакцыя “Народнай трыбуны”. Абласная газета заўсёды падтрымлівае творчыя памкненні моладзі, таму і выступае заснавальнікам конкурсу.
Журы вызначыць пераможцаў у намінацыях: “Лепшы клуб (гурток) “Юны журналіст”, “Лепшы малады журналіст”, “Лепшы юны карэспандэнт”, “Лепшы клуб (гурток) – партнёр СМІ” і “Лепшая аўтарская работа”. На конкурс трэба накіраваць матэрыялы, якія апублікаваны ці выйшлі ў эфір у 2012 годзе і расказваюць пра моладзь Берасцейшчыны, дзейнасць БРСМ, рэалізацыю ў вобласці дзяржаўнай маладзёжнай палітыкі.
Конкурсныя работы чакаюць да 10 снежня, а даслаць іх трэба па адрасе: 224005, г.Брэст, вул. Наганава, 10, пакой 317, АК БРСМ.