Як гучыць патрыятызм

Адміністрацыя Ленінскага раёна г. Брэста правяла агляд-конкурс патрыятычнай песні, прысвечаны 70-годдзю вызвалення Беларусі ад нямецка-фашысцкіх захопнікаў
На сцэну Дома культуры чыгуначнікаў выходзілі салісты, ансамблі, харавыя групы. Аматарскія калектывы прадстаўлялі прадпрыемствы, арганізацыі і клубныя ўстановы Ленінскага раёна нашага абласнога цэнтра. Сапраўднай гераіняй агляду-конкурсу, наладжанага раённай адміністрацыяй, стала патрыятычная песня.
Узнёслыя, лірычныя, гераічныя вакальныя творы, здавалася, ішлі ад сэрцаў выканаўцаў, настолькі тыя былі паяднаны музыкай і словамі ды перажывалі песенныя гісторыі. Знаёмыя і новыя  творы ўсхвалявалі і гледачоў, і журы конкурсу.
Дыпломы пераможцаў і прызы адміністрацыі Ленінскага раёна ў выніку атрымалі: народны ансамбль песні і танца “Сузор’е” ААТ “Будтрэст №8”, народная вакальная група “Красуні” ААТ “Прадтавары”, вакальны ансамбль ДУ “Брэстводаканал”, народны хор “Вербніца” Брэсцкага філіяла РУП “Белтэлекам”, дуэт УП “Прамбрыс” і народны ансамбль “Рамонкі” Брэсцкага гарадскога цэнтра культуры. Сярод салістаў адзначаны: Павел Бяляўскі
(СШ №17), Дзмітрый Гардзееў і Вольга Пылік (ААТ “Прадтавары”), Аляксандр Цецярук (ДУ “Брэстводаканал”), Кацярына Чысцяк (Брэсцкае аддзяленне Беларускай чыгункі) і Вольга Палішчук (СП ААТ “Брэстгазаапарат”).
Журы адзначыла выразнасць выступленняў, высокае выканальніцкае майстэрства і добрыя сцэнічныя касцюмы ўсіх удзельнікаў агляду-конкурсу, а яны ўпэўніліся, што патрыятычныя песні па-ранейшаму ўпрыгожваюць рэпертуар і іх добра прымае публіка.
Яўгенія БАГАЦЕЕВА,
г. Брэст.