Запрашаем да ўдзелу ў адкрытым конкурсе ландшафтнага дызайну “Алімпійскі сімвал”

Да конкурсу запрашаюцца аўтары арыгінальных праектаў клумбаў, газонаў і іншых форм ландшафтнага дызайну.

У рамках абласной праграмы алімпійскай адукацыі на 2008-2012 гады і рэспубліканскай акцыі “Алімпізм і моладзь” Прадстаўніцтва Нацыянальнага алімпійскага камітэта Рэспублікі Беларусь у Брэсцкай вобласці, упраўленне адукацыі аблвыканкама, абласны камітэт прыродных рэсурсаў і аховы навакольнага асяроддзя праводзяць абласны адкрыты конкурс ландшафтнага дызайну “Алімпійскі сімвал”.
Спаборніцтва праводзіцца ў два этапы. 1 сакавіка па 3 мая ўдзельнікі прадстаўляюць фатаграфіі, малюнкі ці электронны эскіз клумбаў, газонаў і іншых малых форм ландшафтнага дызайну ў варыянце цвіцення. З 4 мая па 20 чэрвеня журы конкурсу на аснове матэрыялаў і шляхам азнаямлення з аб’ектамі на месцы выбірае лепшы з іх.
Арганізатары запрашаюць жадаючых паўдзельнічаць у трох намінацыях: сярод навучальных устаноў і пазашкольных арганізацый; сярод прадпрыемстваў і арганізацый; сярод індывідуальных удзельнікаў.
Матэрыялы на першы этап конкурсу трэба дасылаць на электронны адрас Прадстаўніцтва НАК РБ у Брэсцкай вобласці noc05@list.ru альбо на электронным носьбіце па пошце, ці прыносіць асабіста па адрасе: 224005, г.Брэст, вул.Леванеўскага, 17. Кантактны тэлефон 23-83-25.
Да матэрыялаў прыкладваецца заяўка ў свабоднай форме: назва аб’екта, апісанне ідэі, які сэнс укладваюць аўтары ў аб’ект, які пасадачны матэрыял прымяняўся пры пасадцы (закладцы ці разбіўцы) клумбы, газона. Абавязкова неабходна ўказаць аўтараў праекта і кіраўніка, калі ўдзельнічае секцыя ці гурток. Для больш поўнага ажыццяўлення ідэі дазволена выкарыстоўваць малыя архітэктурныя формы.