Традыцыйная сустрэча перад пачаткам новага навучальнага года ўпершыню прайшла ў такім шырокім фармаце – больш за 600 удзельнікаў: педагагічных работнікаў, кіраўнікоў сістэмы адукацыі Брэстчыны, старшынь гаррайвыканкамаў, кіраўнікоў упраўленняў і камітэтаў аблвыканкама на чале з губернатарам вобласці Канстанцінам Сумарам і старшынёй абласнога Савета дэпутатаў Сяргеем Ашмянцавым. І такое шырокае кола запрошаных было да месца, бо тэмай жнівеньскага педсавета стала: “Павышэнне якасці адукацыі – прыярытэт палітыкі дзяржавы”.
Перш чым сустрэцца на пленарным пасяджэнні ў Доме культуры ў Кобрыне, удзельнікі мерапрыемства папрацавалі па секцыях. Навучальныя ўстановы абласнога цэнтра, Жабінкаўскага, Кобрынскага, Бярозаўскага раёнаў прымалі гасцей. Лепшае паказвалі не дзеля пахвальбы, а каб быў прыклад, да якога ўзроўню павінна імкнуцца адукацыйная сістэма рэгіёна.
Галоўнае пытанне парадку дня сёлетняй жнівеньскай педагагічнай нарады – павышэнне якасці адукацыі. Кіраўнік вобласці адзначыў: “Узровень адукацыі – важны элемент унутранай палітыкі дзяржавы. На першы план у ацэнцы эфектыўнасці галіны выходзяць якасныя характарыстыкі”. Вызначальнымі, на думку Канстанціна Сумара, з’яўляюцца якасная падрыхтоўка моладзі да паўнацэннага жыцця ў грамадстве і гатоўнасць маладых да ўдзелу ва ўсіх сацыяльна-эканамічных пераўтварэннях, якія адбываюцца ў нашай краіне.
Нельга не заўважыць, што ўстойлівае эканамічнае развіццё дапамагае вырашаць шэраг сацыяльных задач, у тым ліку і адукацыйных. “Трэць абласнога бюджэту складаюць выдаткаванні на адукацыю, – падкрэсліў старшыня аблвыканкама. – За апошнія гады пабудаваны і рэканструяваны 9 школ, 3 дзіцячыя садкі, у ліпені ўведзены ў строй садок на 75 месцаў у Столінскім раёне, а 1 верасня адчыніць дзверы сад-школа ва Усходнім мікрараёне №6 г.Брэста”. Як было сказана, асабліва актыўна гэтая работа вядзецца ў Пружанскім, Пінскім, Столінскім, Брэсцкім, Драгічынскім раёнах.
У маштабах вобласці, мяркуе Канстанцін Сумар, зрабіць давядзецца яшчэ больш, бо з 609 школ больш за палову знаходзяцца ў старых будынках, трэць з якіх – яшчэ пасляваеннай пабудовы, а пятая частка дзіцячых садкоў размяшчаецца ў прыстасаваных памяшканнях. І хоць сотні мільярдаў рублёў ужо ўкладзены ў будаўнічыя работы, але вобласць мае намер актыўна будаваць новае і рэканструяваць старое ў сферы адукацыі. Бо месцаў, напрыклад, у дашкольных установах Брэста, Пінска і Баранавіч не хапае амаль для 800 дзетак. А вось у сельскай мясцовасці давядзецца павялічыць ахоп малых дашкольнай адукацыяй. Гэты паказчык у вобласці складае 49 працэнтаў (па краіне – 53,7), а ў Драгічынскім, Кобрынскім, Столінскім раёнах ён не дасягнуў і 40 працэнтаў. Дзяцей ад 1 да 5 год на Брэстчыне – 26 тысяч, а месцаў у садках – каля 13 тысяч. Таму аблвыканкам зацвердзіў спецыяльны план будаўніцтва дашкольных устаноў на перыяд да 2015 года.
Сярод асноўных стратэгічных задач адукацыі вобласці – сканцэнтраваць намаганні школы не на працэсе, а на выніку. Вельмі важна ўмацаваць сувязь устаноў адукацыі з навукай, вытворчасцю, сацыяльнай сферай. У галіне прафесіянальна-тэнічнай і вышэйшай адукацый варта арыентавацца на рэальныя патрэбы рэгіёна з улікам перспектыў. “Пакуль што нашы выпускнікі паступаюць у ВНУ “навобмацак”, не ўсведамляючы, якую карысць яны могуць прынесці менавіта з гэтай прафесіяй вобласці, краіне”, – заўважыў старшыня абл-выканкама і засяродзіў увагу на неабходнасці падрыхтоўкі спецыялістаў па дагаворах з гарантыяй давання першага рабочага месца. Таму прафарыентацыйная работа павінна атрымаць новы якасны імпульс, і тут шляхоў узаемадзеяння ўстаноў адукацыі, органаў улады і гаспадарнікаў вельмі шмат.
Выхаванне – вось яшчэ адзін абавязковы кампанент адукацыі. Старшыня аблвыканкама спыніўся на ім асабліва падрабязна, таму што школа павінна выконваць дзяржаўны заказ – выхоўваць грамадзяніна Беларусі. Шэраг устаноў адукацыі паспяхова працуюць над фарміраваннем грамадзянскасці і патрыятызму, выхоўваюць лідарскія якасці, уменне жыць у калектыве і прыносіць карысць грамадству. Выдатныя прыклады гэтай работы ёсць у Навасёлкаўскім дзіцячым садзе Пружанскага раёна, Аснежыцкай агульнаадукацыйнай сярэдняй школе Пінскага, Баранавіцкім гарадскім Палацы дзіцячай творчасці, Ляхавіцкім раённым цэнтры пазашкольнай работы.
А вось стан спраў, напрыклад, з падлеткавай злачыннасцю ў Лунінецкім раёне засмучае. Наша вобласць апошнія чатыры гады зніжае колькасць правапарушэнняў сярод падлеткаў, лічбы – адны з самых нізкіх у рэспубліцы, але за агульнымі паказчыкамі не схаваюцца тыя раёны, дзе з правапарадкам сярод дзяцей ёсць праблемы. На думку кіраўніка Брэстчыны, неабходна дэталёва прааналізаваць фактычную занятасць дзяцей і прапанаваць ім адпачынак, спорт, творчасць. База ў нас ёсць. Тыя ж высакакласныя спартыўныя аб’екты павінны быць даступнымі для дзяцей і падлеткаў, і не важна, хто з’яўляецца ўласнікам спарткомплексу ці танцавальнай залы.
Высокая ацэнка была дадзена і кадраваму саставу педагогаў. Дарэчы, больш за 500 маладых спецыялістаў увальюцца ў іх рады сёлета. Калегі пастараюцца годна прыняць іх у свае шэрагі, а органы мясцовай улады павінны дапамагчы з вырашэннем сацыяльна-бытавых пытанняў. Між іншым, аўтарытэт педагогаў у вобласці высокі. Адно са сведчанняў таму – 17 працэнтаў дэпутацкага корпусу, які выбіралі ў мясцовыя Саветы сёлета – прадстаўнікі адукацыі.
Удзельнікі нарады зацікаўлена абмеркавалі даклад. Пра тое, як павысіць якасць адукацыі, гаварылі і настаўнікі, і дырэктары школ і прафтэхкаледжаў, прадстаўнікі дашкольнай і вышэйшай адукацыі. Агучаныя прапановы будуць аформлены пратаколам даручэнняў кіраўніка вобласці. Праблемы ў галіне адукацыі ўлада бачыць, вырашае іх і будзе вырашаць – запэўніў педагогаў Канстанцін Сумар. І з задавальненнем уручыў граматы і дыпломы лепшым настаўнікам, выкладчыкам і майстрам прафесійнага навучання. А настаўніца біялогіі СШ №3 г.Ганцавічы Ірына Богдан атрымала знак “Выдатнік адукацыі Рэспублікі Беларусь”.
На наступным тыдні, у сераду, прагучыць першы званок новага навучальнага года. Будзем спадзявацца, што складзецца ён паспяхова, а якасць адукацыі пацвердзіць час.
Святлана ТАБОЛІЧ, “НТ”,
г. Брэст – г. Кобрын
26 жніўня прайшла абласная жнівеньская нарада педагагічных работнікаў
