У пасяджэнні, акрамя членаў прэзідыума, прынялі ўдзел старшыні гарадскіх і раённых Саветаў дэпутатаў, кіраўнікі зацікаўленых абласных структур. З самага пачатку старшыня абласнога Савета дэпутатаў Сяргей Ашмянцаў падкрэсліў, што на Брэстчыне за апошнія гады шмат зроблена, каб жыхары гарадоў і вёсак маглі не толькі з задавальненнем працаваць, але і з цікавасцю бавіць вольны час. У якасці прыкладу назваў нядаўна пабудаваны шыкоўны Палац культуры ў Маларыце, у якім, дарэчы, праходзіла пленарнае пасяджэнне прэзідыума. Але ж, як адзначыў Сяргей Дзмітрыевіч, мала ўзвесці аб’ект адпачынку ці спорту – трэба зрабіць усё магчымае, каб ён працаваў з максімальнай аддачай, быў цэнтрам прыцяжэння, асабліва моладзі. І тут –
вялікае поле дзейнасці, у тым ліку для дэпутатаў усіх узроўняў.
Калі зайшла размова пра падрыхтоўку зон адпачынку каля водных аб’ектаў, паўстала пытанне: чым сустракаюць купальшчыкаў пляжы Брэстчыны? Што зроблена, каб адпачынак на вадзе быў камфортны і бяспечны? Як адзначыла галоўны санітарны ўрач вобласці Нэлі Гіндзюк, рашэннямі гарадскіх і раённых выканкамаў зацверджаны 86 зон адпачынку на вадаёмах. Сярод найлепш падрыхтаваных яна назвала
пляжы на рэках Капанец у Століне, Шчара ў вёсцы Дарава і Ведзьма ў Ляхавіцкім раёне, старым русле Гарыні ў Давыд-Гарадку, вадасховішчах Жабер Драгічынскага і Ляскавіцкае Іванаўскага раёнаў. На жаль, у шэрагу лепшых адсутнічае пляж самага вялікага вадасховішча Маларыцкага раёна – Лукаўскага. Тут не абсталявана грамадская прыбіральня. Не забяспечаны смеццевымі кантэйнерамі пляж на рацэ Лясной у Камянцы, зона адпачынку на Гарыні ў Манькавічах Столінскага раёна. На гарынскім пляжы не ўсталяваны і кабіны для перапранання, ценявыя паветкі. Няма іх і на пляжы ракі Чаква ў аграгарадку Рубель таго ж Столінскага раёна. Дарэчы, па аб’ектах Століншчыны прагучала шмат заўваг, але ж там і больш за ўсё зарэгістраваных месц для купання – 10. У той час як, напрыклад, у Брэсце іх усяго толькі чатыры. Іх недастаткова для горада, дзе больш за 300 тысяч жыхароў. Таму і было запланавана яшчэ ў 2012 годзе правесці рэкультывацыю прыбярэжных зямель у раёне Краснага Двара пад зону адпачынку. Аднак і па сённяшні дзень гэтага не зроблена.Толькі па два месцы для купання вызначаны ў Баранавічах і Пінску…
У выступленні начальніка ўпраўлення гандлю і паслуг аблвыканкама Вадзіма Краўцова прагучала, што большасць зарэгістраваных зон адпачынку ўключана ў графік выязнога абслугоўвання суб’ектамі гандлю розных форм уласнасці. А ў некаторых раёнах лічаць вырашаным пытанне з гандлёвым абслугоўваннем аб’екта адпачынку, праінфармаваўшы, што побач з ім ёсць стацыянарная гандлёвая кропка. Але ж на самой справе гэтае “побач” можа складаць амаль 500 метраў. І хто пойдзе ў тую краму ці сталоўку за паўкіламетра?
На прызідыуме выступілі старшыня абласнога камітэта прыродных рэсурсаў і аховы навакольнага асяроддзя Тамара Ялкоўская, намеснік генеральнага дырэктара абласнога упраўлення ЖКГ Міхаіл Іолап, намеснік начальніка галоўнага ўпраўлення ідэалагічнай работы, культуры і па справах моладзі –
начальнік упраўлення культуры аблвыканкама Сяргей Панасюк.
Пасля пленарнага пасяджэння яго ўдзельнікі наведалі раённую ДЮСШ, дзіцячую школу мастацтваў, Лукаўскую СШ, аграсядзібу “Крайняя хата” ў вёсцы Гусак, агледзелі зону адпачынку каля Лукаўскага вадасховішча.
Адам АРСЕНЬЕЎ, “НТ”,
Маларыцкі раён
Пра тое, што трэба зрабіць, каб зоны адпачынку радавалі людзей, ішла размова 3 чэрвеня на выязным пасяджэнні прэзідыума абласнога Савета дэпутатаў
