У сераду ва ўрачыстай абстаноўцы брастаўчанцы Ганне Аляксееўне Цынгель уручылі пашпарт грамадзяніна Рэспублікі Беларусь. Замена галоўнага дакумента – планавая, праўда, мала хто можа пахваліцца, што мяняе пашпарт у сувязі з дасягненнем 100-годдзя. Пашпарт доўгажыхарцы ўручыў начальнік аддзялення па грамадзянстве і міграцыі Маскоўскага РАУС г. Брэста Юрый Бразінскі. Замест даты і месяца нараджэння ў пашпарце – крыжыкі. Справа ў тым, што дакументы Ганны Аляксееўны былі згублены і дакладная дата не захавалася. Блізкія родзічы, якія займаліся стварэннем сямейнага генеалагічнага дрэва, лічаць, што жанчыне сёлета ўжо споўнілася 102 гады, а найбольш верагодная дата яе нараджэння – 21 студзеня. А вось некаторыя захаваныя дакументы сведчаць: 100 гадоў Ганне Аляксееўне споўнілася менавіта 13 лютага.
Павіншаваць юбіляршу прыехаў кіраўнік адміністрацыі Маскоўскага раёна Брэста Аляксандр Рагачук. Ён уручыў Ганне Аляксееўне кветкі і падарункі. А яшчэ пажартаваў, што цяпер абавязкова трэба ісці на рэкорд: “Гэта да ста гадоў дажыць складана, а далей ужо лягчэй…”
Ганна Аляксееўна пражыла нялёгкае жыццё, рана засталася сіратой. На вайне загінуў муж. Аднак гэта не зламала жанчыну. Яна змагла выгадаваць і выхаваць дзяцей. І сёння ў яе ёсць на каго абаперціся – заўсёды побач 2 дачкі, 9 унукаў, 15 праўнукаў і 4 прапраўнукі. Асноўным сакрэтам свайго даўгалецця Ганна Аляксееўна лічыць тое, што заўсёды жыла сумленна, нікому нічога дрэннага не жадала і ўсё жыццё шчыра працавала.
Даведка “НТ”. Маскоўскі раён Брэста, дзе цяпер жыве Ганна Аляксееўна Цынгель, налічвае каля 200 тысяч жыхароў, сярод якіх толькі 5 чалавек маюць узрост больш за 100 гадоў. А ўсяго на Брэстчыне жыве 250 чалавек, якія перасягнулі 100-гадовы рубеж. Ва ўпраўленні па грамадзянстве і міграцыі УУС аблвыканкама паведамілі, што найбольшая колькасць доўгажыхароў зарэгістравана ў Баранавіцкім, Драгічынскім, Пінскім і Столінскім раёнах.
Ірына БЛАХІНА,
вядучы спецыяліст аддзела інфармацыі і грамадскіх сувязей УУС аблвыканкама.
от8 февраля, 2019