Нашаму земляку, беларускаму пісьменніку Валерыю Гапееву споўнілася 50 гадоў

Імя гэтага пісьменніка вядома далёка за межамі Берасцейшчыны, дзе ён жыве і працуе. Нарадзіўся Валерый Мікалаевіч на Гомельшчыне
6 лютага 1963 года. Там скончыў сярэднюю школу, потым – мінскі электратэхнікум сувязі. Працаваў у Казахстане, на мінскім заводзе “Інтэграл”, служыў у арміі… У Івацэвічы пераехаў з сям’ёй у 1992 годзе. Уладкаваўся на мясцовы прыборабудаўнічы завод, стаў супра-цоўнічаць з раённай газетай як пазаштатны карэспандэнт. У гэты ж час пачаў пісаць прозу, у часопісе “Маладосць” апублікавана першае сур’ёзнае апавяданне “Абсалютнае жаданне”.
Сёння Валерый Гапееў працуе адказным сакратаром раённай газеты “Івацэвіцкі веснік”. Яго творы друкаваліся ў часопісах “Маладосць”, “Крыніца”, “Бярозка”, “Першацвет”. Зараз Валерый Гапееў прызнаны ў краіне дзіцячы пісьменнік. Сапраўдную папулярнасць прынеслі яму аповесці “Пастка на рыцара”, “Ведзьміна тоня”, “Урокі першага кахання”. Крытыкі ў адзін голас далучылі іх да ліку лепшых празаічных твораў апошніх гадоў. За кнігу “Пастка на рыцара” ў 2007 годзе пісьменнік стаў лаўрэатам абласной літаратурнай прэміі імя Уладзіміра Калесніка.
Чаму Валерый Гапееў піша для дзяцей і падлеткаў? На гэтае пытанне пісьменнік адказвае так: “Можа і таму, што не надта для іх хочуць і пісаць. Крыўдна бачыць праз чвэрць стагоддзя ў школьных падручніках тыя ж творы беларускай літаратуры для дзяцей і юнацтва. І ў планах на пазашкольнае чытанне – усё тыя ж аўтары. Як быццам час спыніўся. Ці літаратура спынілася. Тая ж ідэалогія, тыя ж прынцыпы і тая ж вера… Яшчэ цвёрда перакананы, што няма дзіцячых праблем. Ёсць праблемы ў нашых дзяцей. І яны перажываюцца імі настолькі ж балюча, як і мы, дарослыя, перажываем свае. Гэта і хачу данесці да чытача – і юнага, і сталага”.
Мы шчыра віншуем Валерыя Мікалаевіча з 50-годдзем, жадаем яму новых творчых здабыткаў, крылатага шчасця, светлага настрою і, вядома ж, натхнення на доўгія гады…
Абласное аддзяленне Саюза пісьменнікаў Беларусі,
абласная арганізацыя
Беларускага саюза журналістаў,
калектыў газеты
“Народная трыбуна”.