Старшыня аблвыканкама Канстанцін Сумар 28 мая ўручыў дыпломы 63-м лепшым вучням Берасцейшчыны і іх настаўнікам, а бацькам – падзякі

Урачыстая цырымонія сабрала ў Брэсце пераможцаў алімпіяды школьнікаў Саюзнай дзяржавы па рускай мове і літаратуры “Расія і Беларусь: гістарычнае і духоўнае яднанне” і заключнага этапу рэспубліканскай алімпіяды па вучэбных прадметах.
– Вы – наш гонар! – падкрэсліў у сваім выступленні кіраўнік вобласці. –
Сёння смела можна сказаць, што ў нас вырасла дастойная змена.
З 2006 года ўручаюцца прэміі аблвыканкама адораным дзецям і іх настаўнікам, а таксама падзякі бацькам. Больш за 800 чалавек атрымалі гэтыя ўзнагароды.
Самы высокі ўзровень ведаў у прадметных алімпіядах сёлета паказалі ўладальнікі дыпломаў I ступені: Юлія Емельяновіч (гімназія №2 г. Баранавічы), Сяргей Жук (СШ №19 г. Брэста), Уладзіслаў Цюшкевіч (Малечскі ВПК яслі-сад-сярэдняя школа Бярозаўскага раёна), Вікторыя Гаўрылава (СШ №7 г. Брэста), Марыя Басалай (ліцэй №1 імя А.С. Пушкіна
г. Брэста), Яўген Лятун (СШ №19 г. Баранавічы). Сваімі дасягненнямі могуць ганарыцца і педагогі, вучні якіх з году ў год паказваюць бліскучыя вынікі.
– Нашы таленты трэба падтрымліваць і далей, – перакананы Канстанцін Сумар. – Чалавек нараджаецца на гэтай зямлі адзін раз. І радзіма малая ў кожнага таксама адна. Вось і трэба кожнаму з нас рабіць усё магчымае, каб на гэтай малой радзіме пакідаць свой добры след…
Святлана ТАБОЛІЧ, “НТ”.
Фота аўтара.