Думаеце, народныя танцы – гэта нямодна і непрыгожа? Лічыце, што яны паміраюць, а сучасная моладзь больш не танчыць лявоніху? Я аспрэчу вас: выхаванцы ўзорнага ансамбля народнага танца “Крынічка” не толькі з задавальненнем выконваюць гэтыя танцы, але і з’яўляюцца пераможцамі шматлікіх рэспубліканскіх і міжнародных фестываляў.
З 1984 года “Крынічка” радуе гледачоў сваёй творчасцю. Некалькі пакаленняў юных танцораў выхаваў ансамбль. Змяняюцца артысты, але нязменным застаецца высокі ўзровень прафесійнага майстэрства, асновы якога былі закладзены арганізатарамі і першымі кіраўнікамі калектыву – Валянцінай і Іванам Траццякамі, а цяпер прадаўжаюцца іх вучаніцай Ірынай Куцень. Сёння ў “Крынічцы” танцуюць артысты ад 6 да 21 года. У гэтым ансамблі, а лепш сказаць, у вялікай згуртаванай сям’і, вучаць рускім, украінскім, цыганскім танцам, асновам класічнага, эстраднага танца, але большасць нумароў – гэта народныя танцы нашай краіны.
Не хопіць часу пералічыць усе ўзнагароды калектыву і ўсе краіны, дзе бачылі творчасць “Крынічкі”. З апошніх – 1-е месца на рэспубліканскім аглядзе-конкурсе “Юныя таленты Беларусі”, лаўрэацкія дыпломы міжнародных фестываляў “Зоркі восені” і “Вясеннія зоркі”. Сёлета калектыў правёў канцэртны тур па гарадах Італіі і прыняў удзел у дабрачынным вечары, прысвечаным памяці трагедыі на Чарнобыльскай АЭС на карысць італьянска-беларускага супрацоўніцтва.
Разам з народным ансамблем народных інструментаў “Скарбонка”, пад акампанемент якога і танцуе “Крынічка”, юныя танцоры нядаўна вярнуліся з двух фестываляў, якія прайшлі ў Іспаніі. У гарадах Ла Карыдад i Лес-Прэсас нашы артысты мелі вялікі поспех у гледачоў, нягледзечы на тое, што гэта быў самы малодшы ансамбль. Між іншым, дзеля “Крынічкі” іспанцы зрабілі выключэнне з фестывальных правіл. Справа ў тым, што на танцавальны фэст у Лес-Прэсас адзін ансамбль запрашаецца толькі раз, а краіна – раз у пяць год. Атрымаўшы права прадстаўляць Беларусь летась, брастаўчане так спадабаліся публіцы і журы, што “Крынічку” зноў паклікалі на фэст, а таму беларускую лявоніху ў выкананні танцораў Ірыны Куцень жыхары Лес-Прэсаса ўбачылі ў другі раз.
У гэтым годзе ўдзел у фэсце прынялі калектывы з Парагвая, Інданезіі, Мексікі, Бразіліі, Зімбабве, Славеніі і Іспаніі. Сустрэча стала своеасаблівай танцавальнай школай, бо можна было паўдзельнічаць у майстар-класах: вучыліся іспанскім танцам у іспанцаў, бразільскім – у бразільцаў… Удзельніца “Крынічкі” Дар’я Дурэйка гаворыць: “Іспанія – краіна весялосці, добрага настрою. Там танцуюць практычна ўсе. Мы шмат чаму навучыліся, ды і самі давалі ўрокі беларускіх танцаў. І было не важна, адкуль ты прыехаў, якой ты нацыянальнасці – танцы яднаюць. Калі выступаеш на сваёй зямлі, не заўсёды разумееш і часам не адчуваеш, што ты – частка цэлай нацыі, што гэтай культурай трэба ганарыцца. А вось на замежным фестывалі з’явілася пачуццё гонару. Мы зразумелі, што нашы танцы – штосьці важнае, а мы і ёсць Беларусь”.
Безумоўна, “Крынічка” стала ўвасабленнем беларускай культуры за мяжой і з поспехам справіцца з гэтай ганаровай місіяй яшчэ не раз.
Ганна ІВАШЧАНКА,
студэнтка
БрДУ імя А.С. Пушкіна.
Фота з архіва ансамбля.