Паштавікі, якія мараць

На 16-м абласным конкурсе прафесійнага майстэрства вызначаны лепшыя сярод начальнікаў гарадскіх і вясковых аддзяленняў паштовай сувязі

У конкурсе, фінал якога прайшоў у Брэсце, спаборнічалі 32 удзельніцы. Напружаная барацьба вялася на працягу двух дзён, а конкурсная праграма дазволіла паштавікам прадэманстраваць не толькі прафесійныя навыкі, але і творчыя.
Фантазія ўдзельніц не мела меж менавіта на другім, творчым, этапе конкурсу – хатнім заданнем сталі прэзентацыі “Калі я буду дырэктарам”, “Кадры не толькі ўсё вырашаюць, але і ўсё ствараюць”. Мары пра больш высокую пасаду і кадравую палітыку трансфармаваліся ў тэатральныя сцэнкі, слайд-шоу, музычныя кампазіцыі. Тут мела значэнне не толькі форма падачы тэмы, але і ідэі, якія выказалі канкурсанткі наконт арганізацыі паштовай сувязі, работы паштовых аддзяленняў з кліентамі, рэалізацыі самых розных відаў паслуг.
У выніку лепшым начальнікам сярод гарадскіх аддзяленняў стала Людміла Гедзька, якая ўзначальвае аддзяленне паштовай сувязі №8 г. Пінска. “Я разлічвала на перамогу, толькі за гэтым і ехала. А зараз трэба годна выступіць у Мінску за Брэстчыну”, – пасля абвяшчэння  вынікаў Людміла Леанідаўна аж ззяе ад шчасця і ўсміхаецца.  Другое і трэцяе месцы атрымалі Таццяна Кузьміна, начальнік АПС “Брэст-2” і Кацярына Богдан, начальнік АПС “Лунінец-4”. Сярод кіраўнікоў сельскіх аддзяленняў  першай стала Валянціна Кузьміна (АПС “Камяніца-Журавецкая”, Брэсцкі раён). Няшмат ёй уступілі Тамара Новак (АПС “Лемяшэвічы”, Пінскі раён) і Алена Клімавец (АПС “Плешчыцы”, Пінскі раён), якія занялі другое і трэцяе месцы. Менавіта гэтыя шэсць жанчын і ёсць каманда Брэстчыны, якая выступіць на рэспубліканскім конкурсе прафесійнага майстэрства.
Крысціна ЗЯЛЁНКА,
студэнтка
Інстытута журналістыкі БДУ.