15 жніўня Брэст сустракаў адну з гераінь ХХХ летніх Алімпійскіх гульняў
Вось яна і вярнулася дадому. Стомленая, але шчаслівая. Яшчэ б! Ірына Кулеша заваявала ў Лондане бронзавы алімпійскі медаль. Беларуская штангістка, выступаючы ў вагавой катэгорыі да 75 кг, заняла трэцяе месца з вынікам 269 кг (121 кг – рывок + 148 кг – штуршок). Дарэчы, да гэтага медаля нашай зямлячцы катастрафічна не шанцавала. На Алімпіядзе-2008, чэмпіянаце свету-2010 і чэмпіянаце Еўропы-2011 яна займала чацвёртае месца, усяго на адзін крок не дацягваючыся да п’едэстала гонару. І вось, нарэшце, у Лондане наступіў яе зорны час.
На вакзале ў Брэсце Ірыну Кулешу (на здымку) сустракалі родныя і блізкія людзі, а таксама прадстаўнікі спартыўнай грамадскасці вобласці – начальнік упраўлення фізкультуры, спорту і турызму аблвыканкама Мікалай Хевук, выканаўчы дырэктар прадстаўніцтва Нацыянальнага алімпійскага камітэта па Брэсцкай вобласці Алена Белаконенка і шматлікія журналісты. Гераіню віншавалі, дарылі кветкі і сувеніры, фатаграфавалі… Адсюль Ірына Кулеша паехала ў родную вёску Абяроўшчына, што на Камянеччыне, дзе яна вырасла, дзе пачынала свой шлях у вялікі спорт. Між іншым, бронзавая медалістка Алімпіяды-2012
у рамках праекта “Алімпійскі выбар” накіравала 50 мільёнаў рублёў менавіта ў СДЮШАР “Пушча” горада Камянца, у Раснянскім філіяле якой Ірына зрабіла першы крок да Алімпіяды ў Лондане.
А пасля невялікага адпачынку – новыя трэніроўкі, новыя старты. Спадзяёмся, што да алімпійскага “золата”.
Вячаслаў БУРДЫКА, “НТ”.