У чацвер Брэсцкую крэпасць наведаў унук легендарнага генерала Героя Савецкага Саюза Дзмітрыя Карбышава

Па слядах дзеда-героя
Многае ў жыцці Дзмітрыя Міхайлавіча звязана з нашым горадам. Ён жыў і працаваў тут яшчэ да рэвалюцыі, з 1911 года кіраваў будаўніцтвам фортаў Брэсцкай крэпасці. У пачатку Вялікай Айчыннай вайны быў цяжка паранены і трапіў у палон. Вёў антыфашысцкую агітацыю ў лагерах смерці Замосць, Майданэк і іншых. За адмову супрацоўнічаць з гітлераўцамі закатаваны ў канцлагеры Маўтхаўзен. З Брэстам Дзмітрыя Міхайлавіча звязвае яшчэ і тое, што тут, на Трышынскіх могілках, пахавана яго першая жонка.
Унук славутага генерала, таксама Дзмітрый, –  масквіч, займаецца паліграфіяй. Цяпер падарожнічае па Беларусі з сям’ёй – жонкай Інай ды сынамі Максімам і Арцёмам.
Дзмітрый Аляксеевіч прыехаў у нашу краіну па запрашэнні аднаго з прадзюсерскіх цэнтраў. Два дні ў Мінску ён удзельнічаў у здымках тэлевізійнага фільма пра свайго геройскага дзеда. Гэта чарговая спроба стварыць кінастужку ў жанры журналісцкага расследвання, расказаць больш поўна аб дарэвалюцыйным жыцці легендарнага генерала.
У сям’і Карбышавых да сённяшняга дня беражна захоўваюцца шматлікія дакументы і гістарычныя фотаздымкі дарэвалюцыйнага перыяду. Ёсць нават падручнік 1860 года выдання, па якім Дзмітрый Міхайлавіч вучыўся ў ваенна-інжынернай акадэміі…
Унук генерала ўдзячны брастаўчанам за  памяць пра яго дзеда. Па словах Дзмітрыя Аляксеевіча, лепшы і найбольш поўны музей героя-генерала створаны ў Брэсцкім ліцэі швейнай вытворчасці імя Д. М. Карбышава.
Дарэчы, Дзмітрый ужо не першы раз у Брэсце: пяць гадоў таму ён прыязджаў на традыцыйны міжнародны юнацкі лёгкаатлетычны турнір памяці Героя Савецкага Саюза Дзмітрыя Карбышава.
Юрый МАКАРЧУК, “НТ”.
Фота аўтара.