“ЗДАРОВЫЯ” навіны

Інфарм-укол

АРГКАМІТЭТ VII МІЖНАРОДНАЙ ВЫСТАВЫ-КІРМАШУ “Садзейнічанне здароваму ладу жыцця – 2011” прыняў рашэнне аб правядзенні мерапрыемства з 14 па 16 верасня. Традыцыйная сустрэча аматараў здаровага ладу жыцця, медыкаў, прыхільнікаў фізкультуры і спорту адбудзецца ў абласным цэнтры ў лядовым палацы, а працаваць выстава-кірмаш будзе з 11 да 19 гадзін штодня.
***
ДАДАТКОВЫЯ МЕРЫ прыняты санітарнай службай па недапушчэнні распаўсюджвання на тэрыторыі вобласці небяспечных інфекцыйных хвароб. Па інфармацыі галоўнага дзяржаўнага санітарнага ўрача Брэстчыны Івана Даўжука, узмоцнены санітарна-каранцінны кантроль за пасажырамі, якія прыязджаюць з-за мяжы. Эпідэміёлагі адсочваюць кожную партыю завезенай сырой гародніны з краін Еўрасаюза. Інфармацыя аб эпідсітуацыі па небяспечных інфекцыях штодня абнаўляецца на сайце абласнога цэнтра гігіены, эпідэміялогіі і грамадскага здароўя.
***
ДЫЯГНАЗ “КЛЕШЧАВЫ ЭНЦЭФАЛІТ” за 7 месяцаў гэтага года ўстаноўлены ў 8 чалавек і ў 29 – “Лайм-Барэліоз”. Па інфармацыі ўрача-паразітолага абласнога цэнтра гігіены, эпідэміялогіі і грамадскага здароўя Алы Корзан, эпідэмічны сезон згаданых хвароб толькі набірае тэмп. Колькасць кляшчоў у прыродзе сёлета застаецца даволі высокай, на Брэстчыне пацярпелі ўжо 3654 чалавекі, з іх 1100 – дзеці.
Спецыялісты раяць захоўваць меры перасцярогі. Адпраўляючыся ў лес, апранайцеся і абувайцеся так, каб засцерагчы цела ад кляшчоў. Вярнуўшыся дамоў, абавязкова агледзьце сябе. Каб адагнаць насякомых, выкарыстоўвайце рэпеленты, якія можна набыць у аптэцы ці магазіне. Калі ж клешч прысмактаўся, здыміце яго з дапамогай пятлі моцнай ніткі ці пінцэтам, пакачваючы з боку ў бок. Знятых насякомых нельга сціскаць рукамі, іх  трэба даследаваць на кляшчавыя інфекцыі.  Калі ў скуры застаўся хабаток,  выдаліце яго з дапамогай іголкі аднаразовага шпрыца. Месца ўкуса змажце ёдам ці іншым антысэпцікам. Калі самі не здымеце насякомае, абавязкова звярніцеся да ўрача.
Служба навін “НТ”.