Віншаваць матуль, якія нарадзілі дзетак 3 ліпеня, у Дзень Незалежнасці Рэспублікі Беларусь, у абласны радзільны дом прыйшла прадстаўнічая дэлегацыя: намеснік старшыні аблвыканкама Леанід Цупрык, кіраўнік абласной суполкі РГА “Белая Русь”, рэктар Брэсцкага дзяржаўнага тэхнічнага ўніверсітэта Пётр Пойта, актывісты арганізацыі – Віктар Валюшыцкі, дэпутат Палаты прадстаўнікоў Нацыянальнага сходу Рэспублікі Беларусь, і Наталля Ільніцкая, генеральны дырэктар ТАА “Лагуна”, дэпутат Брэсцкага гарадскога Савета дэпутатаў. І хоць, як сказаў галоўны ўрач абласнога радзільнага дома Анатоль Дашко, акцыі “Белай Русі” – добрая традыцыя і праводзяцца не першы раз, усё ж для 8-мі мам віншаванне стала прыемнай нечаканасцю.
А ў Дзень Рэспублікі ў Брэсце на свет з’явіліся 2 хлопчыкі і 6 дзяўчынак. Калі Юлія Кахновіч з Брэста ў гэты дзень нарадзіла доўгачаканага першынца, дык брастаўчанка Ірына Гарошка і жыхарка Кобрына Яніна Штык сталі шчаслівымі шматдзетнымі мамамі: іх немаўляты ў сем’ях – трэція дзеці. А вось маладая мама Ганна Воліна з вёскі Знаменка Брэсцкага раёна сама нарадзілася 3 ліпеня, таму нараджэнне дачушкі Аляксандры ператварыла гэты дзень у патроенае свята.
Кветкі, памятныя сувеніры і цёплыя словы – віншаванне атрымалася сардэчным. Напэўна ж, прыслухаюцца жанчыны да парады Пятра Пойты: “Ніколі не задумвайцеся пра тое, ці варта паўтараць такі нялёгкі крок. Нараджэнне дзіцяці – гэта радасны і шчаслівы момант у жыцці кожнай сям’і, але ў той жа час вельмі адказны. Новае жыццё – сапраўдны цуд, памятайце пра гэта”. Тым больш, адзначыў намеснік старшыні аблвыканкама Леанід Цупрык, дзяржава будзе падтрымліваць жанчын-маці, а клопат аб дэмаграфічным дабрабыце Беларусі застаецца важным кірункам унутранай сацыяльнай палітыкі ў рэспубліцы.
Надвор’е, між іншым, і ў дзень нараджэння малых, і ў дзень віншавання жанчын у радзільным доме выдалася цёплым і сонечным. Няхай жа і лёс пакуль яшчэ зусім маленькіх грамадзян нашай краіны будзе такім жа!
Дар’я НІКАНЧУК,
студэнтка
Інстытута журналістыкі БДУ