Беларусь

Брэсцкія пагранічнікі адзначылі прафесійнае свята на баявым пасту


На баявым пасту сустракаюць сваё прафесійнае свята брэсцкія пагранічнікі радавы Антон Абраменка і яфрэйтар Дзмітрый Бунчук з аўчаркай Інгурам.
Пагранзастава №14 носіць імя малодшага сяржанта Аляксея Новікава.  Знаходзіцца яна ў маляўнічых мясцінах непадалёк ад гарадскога пасёлка Дамачава.
Знаёміў нас са сваёй «гаспадаркай» камандзір заставы капітан Дзмітрый Кушнер. Язык не паварочваецца назваць казармай сімпатычны двухпавярховы будынак з еўрарамонтам унутры. Спальнае памяшканне, бытавы пакой, прыбіральня, кухня і сталовая – усё зіхаціць чысцінёй і парадкам. Аднак, самакрытычна заўважае капітан Кушнер, ёсць яшчэ над чым працаваць, на чарзе – стварэнне свайго музея, дзе, акрамя экспазіцыі пра героя-пагранічніка Аляксея Новікава, знойдзецца месца і для нашых сучаснікаў.
У  лютым 2009 года інструктар-кінолаг сяржант Юрый Прылуцкі ў складзе трывожнай групы пасля таго, як спрацавала сігналізацыя, выехаў на месца здарэння. Стаяў моцны мароз, пачыналася завіруха, сляды парушальніка вялі ў бок граніцы. Як высветлілася, грамадзянін Расіі спрабаваў перабрацца за кардон. Па дарозе ён праваліўся пад лёд на рэчцы Капаёўка і працягваў рухацца ў напрамку Польшчы. Не раздумваючы, Юрый Прылуцкі з аўчаркай Інгурам кінуліся ў сцюдзёную ваду і хутка дагналі парушальніка. Можна сказаць, выратавалі таму жыццё. У такое халоднае надвор’е, у мокрым адзенні ён  бы без дапамогі пагранічнікаў абавязкова замёрз.
За гэта затрыманне Юрый Прылуцкі атрымаў медаль «За адзнаку ў ахове дзяржаўнай граніцы». Узнагароду пагранічніку ўручыў асабіста Прэзідэнт Рэспублікі Беларусь Аляксандр Лукашэнка. Цяпер Юрый служыць па кантракце ў іншым рэгіёне краіны, а аўчарка Інгур працягвае ахоўваць граніцу на роднай дамачаўскай заставе.

Праўда, такія надзвычайныя здарэнні бываюць рэдка. Ведаючы аб надзейнасці беларускай граніцы, парушальнікі стараюцца не рызыкаваць і рэдка правяраюць яе на трываласць. Сёлета, па словах камандзіра заставы, былі зафіксаваны толькі два выпадкі парушэння пагранічнага рэжыму: затрымалі расіяніна без дакументаў і жыхара Мінска, які арандаваў жыллё ў забароннай зоне. Ахоўваць граніцу дапамагаюць і мясцовыя жыхары – з імі ў вайскоўцаў добры кантакт. Як знак поўнага ўзаемаразумення можна расцэньваць той факт, што капітан Дзмітрый Кушнер – дэпутат Дамачаўскага пасялковага Савета па Ляплёўскай – Паўднёвай выбарчай акрузе. А ў Дамачаўскай школе 17 вучняў наведваюць гурток «Юны пагранічнік», займаецца з імі намеснік камандзіра заставы старшы лейтэнант Максім Кебікаў.
Але і ў спакойнай абстаноўцы служба ў пагранічнікаў нялёгкая. 8 гадзін знаходзіцца дзяжурны нарад на ахове дзяржаўнай граніцы, за гэты час пешшу праходзіць 10-15, а то і 20 кіламетраў,  здараецца і нясенне службы ва ўзмоцненым рэжыме. Таму ў салдат і сяржантаў асаблівай пашанай карыстаюцца знакі «100 (200) выхадаў на ахову дзяржаўнай граніцы». Толькі самі пагранічнікі ведаюць, колькі за гэтым бяссонных начэй і кіламетраў лясных дарог.
Ну, а 28 мая на заставе накрылі святочны стол. Прагучалі віншаванні, прыехалі з падарункамі шэфы, адбыўся канцэрт. І толькі дзяжурны нарад, як заўсёды, будзе несці сваю нялёгкую, але такую важную і пачэсную службу. Каб чужынцы не хадзілі па нашай зямлі…
Юрый МАКАРЧУК, «НТ»,
Брэсцкі раён.
Фота аўтара.

Брэсцкія пагранічнікі адзначылі прафесійнае свята на баявым пасту
Оцените статью

Добавить комментарий

Авторизация
*
*
Генерация пароля