Час для паскарэння

Перад кіраўнікамі рэгіёнаў, службаў і прадпрыемстваў пастаўлена дакладная задача: максімальна выправіць сітуацыю там, дзе гэта магчыма зрабіць
Асноўнае пытанне чарговага пасяджэння, якое правёў у панядзелак першы намеснік старшыні аблвыканкама Міхаіл Юхімук, – аб выніках сацыяльна-эканамічнага развіцця Брэстчыны і выкананні абласнога бюджэту за 9 месяцаў 2013 года. Яно было разгледжана з удзелам намесніка Прэм’ер-міністра Беларусі Анатоля Калініна, першага намесніка міністра інфармацыі Ліліі Ананіч і дэпутатаў Палаты прадстаўнікоў Нацыянальнага сходу Рэспублікі Беларусь Уладзіміра Базанава, Віктара Валюшыцкага, Аляксандра Зазулі, Валянціна Мілашэўскага, Аляксандра Юркевіча.
Перад тым, як даць слова дакладчыку – старшыні камітэта эканомікі аблвыканкама Леаніду Мартынюку, Міхаіл Іванавіч заўважыў, што “ў цэлым устойлівасці ў тэмпах росту няма”. Валавы рэгіянальны прадукт дасягнуў 103,3 працэнта – гэта другі паказчык у краіне. Тым не менш, не хаваў занепакоенасці першы намеснік кіраўніка вобласці, прагнозны паказчык па ВРП – 109,9 працэнта – пакуль яшчэ не склаўся. Не радуе і той факт, што вышэй  за даведзенае заданне назіраецца рост экспарту тавараў, зніжаюцца аб’ёмы сельгаспрадукцыі, існуюць пэўныя праблемы ў прамысловасці – у прыватнасці, тэкстыльнай і швейнай вытворчасці…
Міхаіл Юхімук сканцэнтраваў увагу на наяўнасці звышнарматыўных запасаў гатовай прадукцыі на прадпрыемствах, яны апошнім часам павялічыліся на некалькі працэнтаў. Не задавальняе кіраўніцтва вобласці і рост колькасці стратных прадпрыемстваў (на сённяшні дзень іх 156 – гэта на 3-4 пункты больш у параўнанні з мінулагоднім адпаведным перыядам). Наконт гэтага Міхаіл Іванавіч зазначыў: “Было праведзена некалькі нарад. І калі заслухоўвалі кіраўнікоў – вынікала: ёсць рэзервы. Але не было сур’ёзнага кантролю. Крокі, якія робяцца, недастатковыя, – падагульніў выступоўца. – Засталося два месяцы да канца года. Задача для ўсіх – максімальна выправіць сітуацыю”.
У сваю чаргу Леанід Мартынюк, адзначыўшы выкананне двух паказчыкаў – па экспарце тавараў і намінальнай сярэднямесячнай зарплаце, спыніўся на праблемных пытаннях, якія замаруджваюць дынамічнае развіццё рэгіёна. Гэта і вялікія складскія запасы на шэрагу прадпрыемстваў дрэваапрацоўкі, і рост колькасці таварных пазіцый у імпартазамяшчэнні, і прыкметны спад у сельскай гаспадарцы, і невыкананне задання па прамых замежных інвестыцыях…
Былі заслуханы старшыні Ганцавіцкага, Жабінкаўскага, Іванаўскага, Лунінецкага, Столінскага раёнаў, таксама кіраўнікі шэрагу прадпрыемстваў, работа якіх выклікае трывогу. У сваім выступленні віцэ-прэм’ер краіны Анатоль Калінін заўважыў, што пачутыя ім тлумачэнні недастаткова пераканаўчыя, і параіў кіраўніцтву вобласці ўздзейнічаць на адказных службовых асоб, што называецца, рублём – за невыкананне прагнозных паказчыкаў зніжаць заробак, і, маўляў, такі рычаг – самы дзейсны.
Анатоль Калінін, у цэлым характарызуючы эканамічную сітуацыю Беларусі, засяродзіў увагу на стратных прадпрыемствах: калі ў рэспубліцы іх 9,6 працэнта, дык на Брэстчыне больш – 13,1.
“Іх трэба ці аб’ядноўваць, ці перапрафіляваць”, – лічыць намеснік Прэм’ер-міністра Беларусі. Адносна тэмпаў росту заработнай платы ён нагадаў меркаванне Прэзідэнта: зарплату варта зарабляць, а для гэтага прадпрыемства павінна працаваць эфектыўна. Анатоль Калінін таксама закрануў пытанне аб рабоце будаўнічага комплексу, эканоміі рэсурсаў, у тым ліку імпартных складальнікаў, запасах гатовай прадукцыі, развіцці малога і сярэдняга бізнесу, павелічэнні колькасці зваротаў берасцейцаў у рэспубліканскія дзяржорганы. Напрыканцы Анатоль Калінін заўважыў, што Брэсцкая вобласць заўжды была адной з вядучых у краіне – так што ёсць усе магчымасці, маецца патэнцыял для таго, каб гэтую пазіцыю захаваць. А Міхаіл Юхімук, звяртаючыся да кіраўнікоў рэгіёнаў, паставіў перад імі задачу прааналізаваць сітуацыю па кожным недавыкананым прагнозным паказчыку і да канца года прыняць вычарпальныя меры для яе выпраўлення. Варта памятаць: даведзеныя заданні ніхто не адмяняў, а значыць – трэба працаваць на вынік.
Галіна МАЗІНА, “НТ”.