Філалагічны Эверэст

25 сакавіка ў Брэсце завяршыўся заключны этап рэспубліканскай алімпіяды па рускай мове і літаратуры
На працягу пяці дзён 120 школьнікаў з усёй краіны выконвалі складаныя заданні і аспрэчвалі права на запаветную перамогу, якая дае магчымасць без іспытаў паступіць у прэстыжныя ВНУ. Алімпіяда праходзіла ў 3 этапы: напісанне водгуку, выкананне комплекснай праграмы, вуснае выказванне.
Асаблівасць інтэлектуальнага спаборніцтва ў тым, што сёлета ў ім прынялі ўдзел дзеці і педагогі Заходняй адміністрацыйнай акругі Масквы. Начальнік упраўлення адукацыі аблвыканкама Міхаіл Ціханчук падкрэсліў, што руская мова, як і беларуская, з’яўляецца неад’емнай часткай нашай камунікацыі. На яго думку, такі філалагічны форум стаў цудоўнай магчымасцю для дзяцей не толькі праявіць свае веды, але і пазнаёміцца з таленавітымі равеснікамі.
Журы алімпіяды ўзначальваў дэкан філалагічнага факультэта Белдзяржуніверсітэта Іван Роўда. За правядзеннем спаборніцтва назіралі высокія госці: кансультант Міністэрства адукацыі Раіса Сідарэнка, віцэ-консул Генеральнага консульства Расійскай Федэрацыі ў Брэсце Наталля Філіпава, старшыня грамадскага аб’яднання “Рускае таварыства” Сяргей Моладаў.
Філалагічны Эверэст пакарылі дзяўчаты. Дыпломы I ступені атрымалі: Ганна Пярова з гімназіі №33 г. Мінска
(9 клас), Валерыя Гаўрылава з СШ №3 г. Стаўбцы Мінскай вобласці (10 клас), Валерыя Няшытая з гімназіі №14 г. Гомеля (11 клас). За творчасць і натхненне прыз ад Саюза пісьменнікаў Беларусі атрымала навучэнка Гомельскага абласнога ліцэя Марыя Маліноўская. Спецыяльным прызам Міністэрства адукацыі як лепшы сельскі школьнік узнагароджана Наталля Мазуркевіч. У агульнакамандным заліку на першым месцы – Магілёўская вобласць, на другім – г. Мінск, трэцяе заняла Гомельская вобласць.
Вольга СВІРЫДОВІЧ, “НТ”.