Галасы за Беларусь

Форум дзіцячых і маладзёжных грамадскіх аб’яднанняў рэгіёна сабраў у Брэсце таленавітых, крэатыўных і ініцыятыўных школьнікаў
У абласным Цэнтры маладзёжнай творчасці два дні праходзіў форум грамадскіх аб’яднанняў “Галасы маладых “За Беларусь!”. Таленавітыя, крэатыўныя, ініцыятыўныя дзеці і падлеткі з усіх куточкаў Берасцейшчыны сабраліся разам дзеля цікавых сустрэч, творчых урокаў і майстар-класаў, абмену вопытам работы грамадскіх суполак. Барды і паэты, юныя карэспандэнты і фалькларысты, члены клубаў ЮНЕСКА і аб’яднання юных выратавальнікаў-пажарных – усім было што паказаць і расказаць. А яшчэ ў дзяўчат і хлопцаў мелася вялікае жаданне навучыцца ў равеснікаў і старэйшых таварышаў чамусьці новаму, удасканаліць свае творчыя і грамадскія навыкі.
Форум працаваў па секцыях, дзе тэорыю спалучылі з практыкай. Вынікі работы потым прэзентавалі ўсім удзельнікам мерапрыемства. Хтосьці адзначыў дзіцячую навукова-практычную канферэнцыю “Спадчына беларусаў”, а камусьці спадабаўся збор юных паэтаў і бардаў “Дэбют”. Дарэчы, на форуме прэзентавалі зборнік “Малады падлесак”, у які ўвайшлі лепшыя творы, што прагучалі на мінулагоднім форуме “Галасы маладых”. Незабыўныя ўражанні пакінуў майстар-клас “Ведай наша!”, на якім школьнікі развучылі побытавыя танцы Брэстчыны, а потым паказалі іх равеснікам на сцэне ЦМТ. У секцыі “Лідар” вучыліся арганізоўваць грамадскую работу, а ў секцыі клубаў ЮНЕСКА абмяркоўвалі цікавыя праекты супрацоўніцтва з замежнымі сябрамі. Юныя карэспандэнты напісалі рэпартажы з секцый форуму і падрыхтавалі відэаролік аб тым, як праходзіла сустрэча маладых.
Яркі, запамінальны, цікавы, карысны – такімі эпітэтамі форум “Галасы маладых “За Беларусь!” ахарактарызавалі яго ўдзельнікі. Самыя актыўныя былі адзначаны падзячнымі лістамі. А раз’ехаліся мы па сваіх гарадах і вёсках з надзеяй на новую сустрэчу, тым больш што арганізатары выказалі прапанову зрабіць форум штогадовым традыцыйным мерапрыемствам.
Надзея КРАЎЧУК,
клуб журналістыкі ЦПР,
г. Бяроза.