Творча мысліць. Каб творча жыць

Аўтарская група “Рэферэнт” дапаможа школьнікам раскрыць свае таленты на занятках па інтарэсах
Паўдзельнічаць у цікавай праграме могуць як першакласнікі, так і школьнікі старэйшых класаў. Зразумела, іх заняткі будуць адрознівацца, але сутнасць заключаецца ў адным і тым жа. Калі вы падумалі, што дзяцей навучаць ляпіць з пластыліну, маляваць ці вязаць, дык гэта не так. Мерапрыемствы “Рэферэнта” пакажуць, як паводзіць сябе з іншымі людзьмі, дапамогуць стаць разняволеным і ўпэўненым чалавекам. Карацей кажучы, навучаць таму, што тычыцца псіхалогіі і жыцця.
Праграма “Вучуся творча мысліць”, у межах якой і працуе згаданая аўтарская група, актыўна дзейнічае ў Баранавічах з 2010 года, і тыя школы, якія прынялі ў ёй удзел, задаволены новым праектам. Школьнікі сталі больш адкрытымі і творчымі. Пазакласныя ўрокі навучылі многіх вучняў пазбягаць некаторых непрыемных момантаў штодзённасці. Цяпер падлеткі ўмеюць правільна рэагаваць на крытыку, не псуючы ні свае, ні чужыя нервы. Пагадзіцеся, надзвычай важна заставацца ў добрым настроі.
Гурткі, факультатывы, класныя гадзіны – абсалютна ў любой форме можна арганізаваць работу з дзецьмі. Галоўная задача настаўніка пры гэтым – абудзіць цікаўнасць і творчае мысленне сваіх вучняў. Вынікі педагогі заносяць у “Партфоліа творчых дасягненняў”. Хіба не цудоўна назіраць, як растуць поспехі праз пэўны час, як змяняецца характар, як становяцца дабрэйшымі і спакайнейшымі душа і думкі?!
Сапраўды, далёка не кожны з нас лічыцца з чужым меркаваннем, часцей свае прынцыпы чалавек узносіць, лічыць самымі дакладнымі ў свеце. Асуджаем кагосьці за яго ўчынкі, гаворым, што трэба рабіць, а чаго – нельга, кіруючыся толькі асабістымі ўяўленнямі. З падлеткамі зараз цяжка, прызнаюць дарослыя, а вось спецыяльная вучэбная праграма дапаможа бацькам у выхаванні дзяцей. Удзельнікі групы “Рэферэнт” патлумачаць мамам і татам, што свет змяняецца, але заўсёды трэба перш-наперш зразумець дзіця, а толькі потым рабіць вывады. І разуменню можна навучыцца.
Калі школьнікі, бацькі і настаўнікі шырока падтрымаюць праграму “Вучуся творча мысліць”, дык агульнымі намаганнямі яны змогуць вырашыць многія праблемы.
Вікторыя ГОМЗА,
гурток “Экажурналістыка”,
г. Баранавічы.