Хлебаробы Брэстчыны вядуць уборку збожжавых і збожжабабовых культур… нават наперакор непагадзі

Народнае выслоўе “дажджы ідуць не  тады, калі просяць, а калі жнуць і косяць” сёлета апраўдвае сябе спаўна. Ва ўсялякім выпадку на Брэстчыне. Практычна з пачатку жніва   яны надакучаюць  ва ўсіх рэгіёнах, што запавольвае ход уборачнай кампаніі. Пракаменціраваць сітуацыю, якая склалася на палетках вобласці, мы папрасілі начальніка аддзела раслінаводства аблсельгасхарчу Сяргея Дзенісевіча:
– Палівам, тэхнікай і кадрамі  для правядзення жніва гаспадаркі забяспечаны. Ход палявых  работ зараз  стрымліваюць толькі неспрыяльныя ўмовы  надвор’я. У выніку дажджоў і навальніц, якія  праходзяць амаль штодзень,  збожжавыя на многіх участках палеглі, а некаторыя ўвогуле аказаліся падтопленымі. Так што змагацца за хлеб сёлета  камбайнерам даводзіцца ў самым прамым сэнсе…
І яны змагаюцца. Выкарыстоўваючы кожную пагодлівую хвіліну, выводзяць збожжаўборачныя агрэгаты на палеткі. Дзякуючы вопыту і самаадданай працы хлебаробаў, па стане на 28 ліпеня агульнымі намаганнямі збожжавыя на Брэстчыне ўбраны  на плошчы 112729 гектараў, што складае 33,9 працэнта да плана, пры сярэдняй ураджайнасці 32,4 цэнтнера з гектара.  У Жабінкаўскім, Камянецкім, Пінскім і Столінскім раёнах жніво набліжаецца да залатой сярэдзіны – тут убраныя плошчы складаюць больш за 40 працэнтаў.  У Брэсцкім, Баранавіцкім  і Бярозаўскім раёнах на круг малоцяць па 40,3, 39 і 35,9 цэнтнера збожжа адпаведна.  Самая нізкая ўраджайнасць у Ганцавіцкім раёне – 23,3 цэнтнера. У Маларыцкім, Пінскім і Лунінецкім – у межах 26,5 – 27,5 цэнтнера.
Адначасова з уборкай збожжа гаспадаркі вядуць яго продаж дзяржаве. У засекі  краіны пастаўлена ўжо 24224 тоны хлеба новага ўра-джаю – 15,1 працэнта да дзяржзаказу.   Салома па стане на 28 ліпеня ўбрана крыху больш чым  на палове скошаных плошчаў.
Надзея ВЕРАС, “НТ”.