Беларусь

Хто паедзе на “Базар”?


Прайшоў абласны адбор удзельнікаў конкурсных праграм на Міжнародны фестываль мастацтваў “Славянскі базар у Віцебску”

Традыцыйная сустрэча творчых людзей на  “Славянскім базары ў Віцебску” пройдзе гэтым летам, але ўжо загадзя наладзілі адбор удзельнікаў XXIII Міжнароднага конкурсу выканаўцаў эстраднай песні “Віцебск-2014” і XII дзіцячага песеннага конкурсу. Раней жадаючыя прыняць удзел у спаборніцтве вакалістаў дасылалі заяўкі ў Мінск, а арганізатары вырашалі, каго запрасіць на праслухоўванне. Сёлета фармат адбору змянілі: спевакі  выступілі ў сваёй вобласці і атрымалі рэкамендацыю на ўдзел у рэспубліканскім этапе.
Як паведаміла Марыя Аласюк, кіраўнік аддзела аматарскай творчасці абласнога грамадска-культурнага цэнтра, дзе і праходзіў адбор, прадэманстраваць свае вакальныя таленты захацелі спевакі з розных куткоў рэгіёна. Кожны з іх выканаў дзве кампазіцыі: на беларускай і на адной са славянскіх моў. Журы звяртала ўвагу і на выканаўчае майстэрства, і на сцэнічную культуру. Вызначаць, хто якое месца заняў, не планавалася першапачаткова – фармат адбору прадугледжваў, што ў дзіцячай і дарослай узроставых групах будуць дадзены рэкамендацыі тром выступоўцам. Усяго ў адборы прынялі ўдзел 17 чалавек.
Некалькі гадзін – і строгае, але кампетэнтнае журы, старшынёй якога з’яўлялася мастацкі кіраўнік народнага вакальнага ансамбля “Мілавіца” Брэсцкага гарадскога Дома культуры Ларыса Борсук, выносіць вердыкт. Вобласць у Мінску на канчатковым адборы прадставяць: сярод дарослых – Святлана Анішчанка (г. Баранавічы), Кацярына Сычэўская (Баранавіцкі раён) і Ірына Кульбеда (г. Брэст); сярод дзяцей – Ангеліна Лукша (г. Пінск), Аліса Каляда і Юлія Левіна (абедзве – г. Брэст).
Ганна ІВАШЧАНКА, “НТ”.
Фота аўтара.

Хто паедзе на “Базар”?
Оцените статью

Добавить комментарий

Авторизация
*
*
Генерация пароля