Беларусь

…Як для сябе


На “прамой лініі” са старшынёй аблвыканкама Канстанцінам Сумарам найчасцей гучалі пытанні пра жыллё і работу жыллёва-камунальных службаў
Тэлефонныя зносіны з жыхарамі Брэстчыны – звыклая практыка работы старшыні абласнога выканаўчага камітэта Канстанціна Сумара. Кіраўнік вобласці рэгулярна выходзіць на прамую сувязь, каб не толькі дапамагчы камусьці вырашыць тую ці іншую праблему, але і дзеля таго, каб ацаніць работу службаў, ведамстваў і канкрэтных кіраўнікоў.
– Сёння ў нас атрымалася “аператыўка”. Так, людзям набалела, калі яны сюды тэлефанавалі, але ўзнятыя праблемы маглі б своечасова вырашыць на месцах, без удзелу губернатара, – ацаніў “прамую лінію”, якая прайшла напрыканцы мінулага тыдня, Канстанцін Сумар і праінфармаваў журналістаў, што правядзе яшчэ адну, пасля якой будзе зроблены аналіз зваротаў і персанальныя вывады па адказных асобах, якія інертна і безыніцыятыўна працуюць на месцах.
У гэты раз больш за дзве гадзіны старшыня аблвыканкама прымаў просьбы, прэтэнзіі, пажаданні грама-дзян. Амаль палова з іх тычылася жыллёвых пытанняў і работы камунальнікаў, астатнія – арганізацыі аплаты працы, праблем у сацыяльнай сферы. Аператыўна, канкрэтна на месцах можна было вырашыць абсалютную большасць з іх. І дах у доме №78 па вуліцы Гогаля ў Брэсце закрыць своечасова, і размясціць на бачным месцы ў Страдзецкім сельсавеце Брэсцкага раёна спісы “чаргавікоў” на атрыманне зямельных участкаў для індывідуальнага будаўніцтва, і выплаціць дапамогу на дзяцей мамам – супрацоўніцам адной прыватнай фірмы, рахункі якой “размарозіць” для гэтай мэты дазваляе закон, і арганізаваць дастаўку дываноў у хімчыстку транспартам бытавікоў, а не прапаноўваць пажылой брастаўчанцы самастойна прывезці іх…
Шматдзетная сям’я з Прылукаў Брэсцкага раёна ніяк не можа атрымаць участак для будаўніцтва дома. Канстанцін Сумар даў месяц, каб пытанне было вырашана.
Брастаўчанін Сяргей Пятровіч хвалюецца: што будзе з домам, які будавала фірма “Облик”, бо грошы ўзялі, а кватэры няма. Губернатар запэўніў: усе аб’екты давядуць да ладу за кошт маёмасці будаўнічай арганізацыі, якая падвяла кліентаў.
Юрый Іванавіч, абанент з Пружан, унёс прапанову: спецыяльныя камісіі павінны аб’ектыўна ацаніць, каму і колькі плаціць за  дамы павышанай камфортнасці, а не кіравацца толькі метражом. Канстанцін Андрэевіч згаджаецца: пад адзін грэбень нельга ўсіх прычасаць.
Як правіла, у зале, дзе праходзіць “прамая лінія”, прысутнічаюць кіраўнікі абласных структур і службаў. Яны адразу бяруць на заметку пытанні, якія іх тычацца, не чакаючы даручэння губернатара (а яны даюцца абавязкова па ўсіх зваротах і бяруцца на кантроль).
– Начальнікам усё трэба рабіць так, як для сябе, тады і званкоў да мяне будзе менш, – падагульніў Канстанцін Сумар.
Чалавеку здаецца, што яго пытанне не прыватнае, не дробязнае, вось ён і тэлефануе старшыні аблвыканкама. Але, можа, варта ўсё ж спачатку праявіць больш настойлівасці і прымусіць мясцовага кіраўніка выканаць службовыя абавязкі належным чынам? Калі мы падумаем аб гэтым, дык старшыні аблвыканкама не давядзецца быць дыспетчарам – гэта не яго роля.
* * *
16 снежня кіраўнік вобласці ў прамым эфіры тэлеканала “Лад” зноў адказваў на пытанні жыхароў рэгіёна.
Святлана ТАБОЛІЧ, “НТ”.

…Як для сябе
Оцените статью

Добавить комментарий

Авторизация
*
*
Генерация пароля