Ёсць праблема: аўтобус не гумавы…

Зразумела, што праблема з грамадскім транспартам у абласным цэнтры не новая. І чым больш разрастаецца горад, тым  яна становіцца вастрэйшай. Але ж, калі гэта закранае людзей, дык трэба нагадваць транспартнікам, што ад іх чакаюць актыўных дзеянняў па выпраўленні сітуацыі. У мікрараёнах Вулька і Варшаўская шаша вядзецца актыўнае будаўніцтва. З тым, як засяляюцца новыя дамы, месцаў у транспарце становіцца ўсё менш і менш. Дакладней – у час пік іх зусім няма.
У прыватнасці, з вуліц Рабінавай і Палявой у цэнтр можна дабрацца на маршруце 12 “А”. Вось толькі раніцай амаль заўжды прыходзіць маленькі аўтобус, а не “гармошка”. Ужо на канцавым прыпынку “Мікрараён Вулька” аўтобус амаль запоўнены. А з вуліцы Сяброўскай едзе бітком набіты. Часта на вуліцы Махновіча людзі ўжо не могуць “упіхнуцца”. Вадзіцель адказвае ім, каб чакалі 18-ты аўтобус, аднак і ён прыходзіць паўнюткі.
Узгаданыя раёны – маладыя, шмат пасажыраў з дзецьмі. Маршрутныя таксі таксама запоўненыя. У раёне магазіна “АЛМІ” і на вуліцы Рабінавай раніцай сесці нерэальна – няма месцаў. Што тычыцца 12-га маршрута, дык такая ж сітуацыя, машыны ідуць бітком набітыя, а бывае, што не прыходзяць увогуле.
З жахам чакаем пачатку навучальнага года і здачы жылых дамоў на вуліцы Рабінавай, там цэлы мікрараён. Ці будуць новыя маршруты, ці можа змяніцца перыядычнасць руху на тых, што ёсць?
Жыхары
мікрараёна “Вулька”,
г. Брэст.