Магчымасці падтрымкі інвестыцыямі праектаў развіцця пушчанскага рэгіёна былі разгледжаны на форуме, які прайшоў у Пружанскім і Камянецкім раёнах

Вось-вось уступіць у строй абводная дарога вакол Белавежскай пушчы, будаўніцтва якой вялося па даручэнні Прэзідэнта Рэспублікі Беларусь Аляксандра Лукашэнкі. Новая транспартная артэрыя можа і павінна паспрыяць пашырэнню інвестыцыйнай прасторы Берасцейшчыны і Гродзеншчыны, па тэрыторыі якіх яна праходзіць. Старшыня аблвыканкама Канстанцін Сумар перакананы: “Дарога вакол пушчы – гэта той аб’ект, які дасць магчымасць пабудаваць не адзін дзясятак сэрвісных прыдарожных пунктаў. Безумоўна, мы зацікаўліваем інвестараў, але ж і сваім службам – упраўленню гандлю і паслуг аблвыканкама, абласному спажывецкаму таварыству – таксама трэба варушыцца”.
Да інвестыцыйнага форуму “Белавежская пушча – турызм і рэкрэацыя” толькі наша вобласць падрыхтавала больш за 20 прапаноў. Разам з патэнцыяльнымі інвестарамі іх вывучалі прадстаўнікі Упраўлення справамі Прэзідэнта, міністэрстваў транспарту, фінансаў, эканомікі, замежных спраў і іншых, а таксама спецыялісты свабодных эканамічных зон “Брэст” і “Гроднаінвест”, упраўленняў фізічнай культуры, спорту і турызму з усіх абласцей і горада Мінска, кіраўнікі прадпрымальніцкіх суполак краіны.
Удзельнікі форуму атрымалі магчымасць пазнаёміцца з інфраструктурай двух раёнаў нашай вобласці. Яны наведалі шэраг аб’ектаў, якія ўяўляюць цікавасць для турбізнесу: водны палац у Пружанах, турыстычныя комплексы “Мікалаеўскі” ў вёсцы Мокрае і  “Белавежтур” у Клятным. Па дарозе ў Музей прыроды Нацыянальнага парку “Белавежская пушча” ўдзельнікі мерапрыемства пабывалі і на аб’ектах, якія пакуль што чакаюць сваіх інвестараў. Напрыклад, цікавыя прапановы маюць на Пружаншчыне па выкарыстанні вытворчай базы ТАА “Пружаны Авіяхімсэрвіс” для развіцця рэгіянальнага паветранага турызму. А на Камянеччыне гатовы аддаць інвестарам будынкі былых школы і Дома культуры ў вёсцы Белы Лясок, якая знаходзіцца літаральна на памежжы пушчы і ў непасрэднай блізкасці ад абводнай дарогі. “Турызму трэба развівацца найперш прыватнымі інвестыцыямі, а дзяржава павінна ствараць умовы, – лічыць міністр спорту і турызму Алег Качан. – Адным з самых перспектыўных напрамкаў з’яўляецца агратурызм. Каб прадукт быў запатрабаваны, неабходна паказваць яго шырока, настойліва прапаноўваць. Нам трэба ісці ў нагу з часам і нават недзе бегчы наперадзе”.
На пленарным пасяджэнні гаварылі пра ўнікальнасць Белавежскай пушчы і прыпушчанскага рэгіёна. Тое, што інтарэс людзей да гэтых мясцін не змяншаецца з гадамі, гаворыць аб стабільнасці турыстычнага бізнесу ў гэтай мясцовасці. Важна максімальна задзейнічаць патэнцыял пушчы, таму і ўносяцца прапановы па развіцці турыстычнай індустрыі з выкарыстаннем магчымасцей канкрэтных населеных пунктаў.
– У нас сёння ёсць усё неабходнае, каб зрабіць Беларусь цікавейшай турыстычнай дзяржавай, – падкрэсліў намеснік Прэм’ер-міністра краіны Анатоль Тозік. –  Прыродна-кліматычныя ўмовы задавальняюць многіх. Заканадаўчая база не перашкаджае прадпрымальным людзям рэалізоўваць самыя цікавыя праекты. Мы хочам і будзем рабіць усё неабходнае, калі спатрэбіцца – ствараць дадатковыя ўмовы, каб турыстычная галіна стала адной з вядучых у Рэспубліцы Беларусь. У нас ёсць шмат таго, чаго няма ні ў адной іншай краіне. І гэтым трэба карыстацца.
Наколькі выніковым атрымаўся форум, стане зразумела ў бліжэйшы час. Але першыя водгукі з’явіліся літаральна ў дзень правядзення мерапрыемства: сярод яго ўдзельнікаў знайшліся ахвотнікі пільней вывучыць інвестпрапановы па Белым Ляску.
Святлана ТАБОЛІЧ, “НТ”,
Пружанскі – Камянецкі раёны.