Выдатны комплекс дзіцяча-юнацкай спартыўнай школы Маларыцкага раёна ўвялі ў строй у 2010 годзе. Радасць была і трэнерам, і юным спартсменам – гандбалістам і лёгкаатлетам. Цяпер база для трэніровак палепшылася ў разы. Вось вам яскравы прыклад, калі бюджэтныя грошы ідуць на стварэнне рэальных умоў жыццядзейнасці народа, а таксама здаровага ладу жыцця.
Радасць была не толькі для спартыўнай супольнасці, але і для звычайных, часта далёкіх ад спорту людзей. У іх з’явілася магчымасць заняцца фізкультурай, найперш – плаваннем, у цывілізаваных умовах: у комплекс ДЮСШ уваходзяць два басейны – дзіцячы і для старэйшага ўзросту. Сёння блакітныя дарожкі распісаны на месяцы наперад. Плаваюць навучэнцы дзіцяча-юнацкай школы (гэта ўваходзіць у комплекс падрыхтоўкі юных спартсменаў). Плаваюць вучні ўсіх школ раёна. “Прыязджаюць у Маларыту на школьных аўтобусах разам са сваімі настаўнікамі фізкультуры на ўрокі па плаванні, якія праходзяць пад наглядам нашых інструктараў, – расказвае Святлана Галавій, намеснік дырэктара па асноўнай дзейнасці ДЮСШ. – Вучым плаванню, між іншым, усіх жадаючых, пачынаючы з дзетсадаўскага ўзросту. Групы платныя, але ахвотных у іх займацца шмат”.
І старэйшым у гэтым спартыўным комплексе таксама рады. Як высветлілася, зацікаўленых правесці час на фізкультурна-спартыўных занятках, схадзіць у саўну, трэнажорную залу ў горадзе і раёне шмат. У жаночай паловы ў асаблівай пашане аквааэробіка. Святлана Васільеўна падзялілася сваімі назіраннямі: “Калі вы мяркуеце, што фізкультурай у вадзе займаюцца выключна дзяўчаты, каб стаць яшчэ больш прывабнымі, дык памыляецеся. На аквааэробіку з задавальненнем ходзяць жанчыны сярэдняга ўзросту і старэйшыя. Тлумачаць проста: выдатны адпачынак ад працоўных і хатніх турбот, ды і здароўю карысць”.
Не пагадзіцца з такімі аргументамі немагчыма. Таму ў басейне працуюць групы здароўя, таксама можна набыць абанемент і проста плаваць. А вось для пенсіянераў выдзелілі спецыяльную гадзіну, каб людзям сталага ўзросту не перашкаджалі шумныя дзеці, каб пажылыя маглі сябе адчуваць больш упэўнена ў коле равеснікаў і аднадумцаў.
Плаванне – гэта не профіль дзіцяча-юнацкай спартыўнай школы Маларыцкага раёна. Але, відавочна, на басейн ёсць устойлівы попыт. Вось і не дзеляць на “сваё” і “чужое”, на “спартыўнае” і “аматарскае”. Галоўнае, каб дзеці, дарослыя не толькі пагаджаліся з правільнымі лозунгамі, словамі пра здаровы лад жыцця, фізкультуру і спорт, а кіраваліся імі штодня, ператваралі ў практычныя заняткі.
Святлана ТАБОЛІЧ, “НТ”,
г. Маларыта.
На ўрокі плавання ў райцэнтр прыязджаюць вучні ўсіх школ Маларыцкага раёна
