У абласным радзільным доме прайшоў “круглы стол”, прысвечаны праблеме здаровага мацярынства і дзяцінства

Летась толькі ў абласным радзільным доме прынята больш за 6000 родаў. Галоўны ўрач установы Анатоль Дашко не сумняваецца – паказчык гэтага года будзе недзе на 300 родаў большы: “Прыемна, што нашы жанчыны пазнаюць шчасце мацярынства. Абласны радзільны дом – гэта перынатальны цэнтр III узроўню. Прыкладна 40 працэнтаў усіх нованароджаных рэгіёна з’яўляюцца на свет у нашай установе. У нас арганізаваны кансультацыйны прыём спецыялістаў, сучаснае медыцынскае абсталяванне дапамагае выхадзіць неданошаных немаўлят з крытычна нізкай вагой. Аб якасці дапамогі гаворыць той факт, што перынатальная і дзіцячая смяротнасць у нашай вобласці – адна з самых нізкіх у краіне”.
Па словах загадчыка акушэрска-абсервацыйнага аддзялення абласнога радзільнага дома Алены Салівончык, моцнае здароўе будучай мамы – вось з чаго пачынаецца паспяховая цяжарнасць, нармальныя роды і здароўе самога дзіцяці. “Для дзяўчат безумоўнай павінна стаць адмова ад курэння і алкаголю. Пры планаванні цяжарнасці жанчыне трэба загадзя пракансультавацца ў спецыялістаў, пралячыць “застарэлыя” балячкі, абследавацца на наяўнасць інфекцый, якія перадаюцца палавым шляхам, і вылечыцца да наступлення цяжарнасці. Для прафілактыкі абаім бацькам мінімум паўгода да зачацця дзіцяці трэба прымаць фоліевую кіслату. Адказнасць будучых бацькоў
– вось што неабходна выхоўваць у моладзі. Праз наша аддзяленне сёлета прайшлі ўжо 1666 жанчын, у якіх цяжарнасць адбывалася з ускладненнямі. А кожнае ўскладненне – гэта фактар рызыкі для здароўя і маці, і дзіцяці”.
“Нараджальнасць расце, але здароўем дзяцей пахваліцца не можам, – прызнаецца загадчык абсервацыйнага аддзялення для нованароджаных Святлана Шышляева. – Усё, што адбываецца ў мацярынскім арганізме, адлюстроўваецца на здароўі малыша. Кожны трэці – чацвёрты з ліку народжаных у нас за 9 месяцаў гэтага года меў тую ці іншую праблему са здароўем. Медыкі карэкціруюць па магчымасці паталогію, але ж здароўе дзяцей закладваецца значна раней, залежыць ад здароўя бацькоў і ад таго, як мама падрыхтавалася да родаў, ці выконвала рэкамендацыі спецыялістаў”.
У ліку праблем здароўя сучасных жанчын у апошнія гады акрэслілася і такая, як цяжарнасць і ВІЧ-інфекцыя. Загадчык аддзела прафілактыкі ВІЧ/СНІДу абласнога цэнтра гігіены, эпідэміялогіі і грамадскага здароўя Леанід Глебка тлумачыць: “Колькасць жадаючых захаваць цяжарнасць пры наяўнасці
ВІЧ-станоўчага статусу павялічваецца. Сёлета ў вобласці на ўліку з ВІЧ стаялі 39 цяжарных, 20 жанчын ужо нарадзілі. Усяго ж на свет у нас з’явілася 132 дзіцяці ад ВІЧ-інфіцыраваных маці, 79-ці малышам пастаўлены дыягназ “Здаровы”, у 11-ці пацверджана ВІЧ-інфекцыя, яшчэ 42 – застаюцца пад наглядам урачоў. Чым раней ВІЧ-інфіцыраваная маці стане на ўлік па цяжарнасці, пачне атрымліваць антырэтравірусную тэрапію, а потым бясплатна – адаптаваныя малочныя сумесі для малыша ва ўзросце да года, тым вышэй шанс засцерагчы дзіця ад хваробы. На жаль, нярэдкія выпадкі, калі жанчына аб сваёй ВІЧ-хваробе даведваецца толькі падчас цяжарнасці. Таму ёсць прапанова зрабіць для тых, хто ўступае ў шлюб, абавязковым тэст на ВІЧ”.
Загадчык аддзялення перынатальнай дыягностыкі, урач-генетык абласнога медыка-генетычнага цэнтра з кансультацыяй “Шлюб і сям’я” Ларыса Мальчук расказала: “Цэнтр праводзіць дыягностыку ў будучых мам, каб знізіць нараджальнасць дзяцей з прыроджанай паталогіяй. Мы можам правесці першасную прафілактыку яшчэ на этапе планавання цяжарнасці. Другасная прафілактыка – гэта дыягностыка ў цяжарных. У нас ёсць найноўшае абсталяванне, якое дапамагае выяўляць паталогію плода на ранніх тэрмінах цяжарнасці. Чым раней паставяць дыягназ, тым хутчэй будзе выпрацавана тактыка медыцынскай дапамогі”.
Галоўны ўрач дзіцячай паліклінікі №1 г. Брэста Таццяна Аўдзяйчук упэўнена: “Усім хочацца мець здаровых дзяцей, унукаў, але далёка не ўсе дбаюць аб належным жаночым і мужчынскім здароўі. Уважлівым павінна быць і стаўленне да рэкамендацый доктара. У нашай паліклініцы створаны “Цэнтр, дружалюбны да падлеткаў”. І мы гатовы вучыць падлеткаў правільнаму ладу жыцця, каб потым яны маглі стаць добрымі бацькамі і мець здаровых дзяцей”.
З канкрэтнай прапановай выступіў урач-псіхатэрапеўт ДУА “БАЦГЭіГЗ” Ігар Прэцкайла: “Часта высвятляецца, што моладзі не хапае дакладнай, праверанай інфармацыі пра здароўе. А што тычыцца таго, як ствараць правільную сям’ю, дык і ўвогуле яны нічога не ведаюць, а кіруюцца падманнымі ўяўленнямі ці парадамі сяброў. Па-мойму, час вучыць старшакласнікаў сямейнай навуцы, асабліва акцэнтуючы ўвагу на здароўі будучых бацькоў”.
Лідзія КУРБАТ, “НТ”.