Насіце белыя камяні

Галоўнае ўпрыгажэнне 2011 года – кашэчае вока
Па ўсходнім календары кожны год у межах 12-гадовага цыкла праходзіць пад знакам пэўнай жывёліны. Год Тыгра здае свае “паўнамоцтвы”  толькі ў першай палове лютага 2011 года, але мы ўжо ў навагоднюю ноч віталі белых кітайскіх кошак і пушыстых японскіх трусоў.
Модныя на працягу ўсяго 2011 года – ювелірныя вырабы з камянёў белага колеру, якіх у прыродзе хапае. Яны падзяляюцца на чыста белыя (кварц, горны крышталь, алмаз, кальцыт, беламарыт, кахалонг і гірасол) і такія, што, акрамя белага колеру, могуць быць і іншых афарбовак, – агат, апал, селеніт, яшма, онікс, нефрыт, тапаз, карал і жэмчуг. Каралі, пацеркі, калье, брошкі, бранзалеты, кулоны, завушніцы і пярсцёнкі з гэтых камянёў-самацветаў можна насіць на працягу ўсяго года.
Але галоўнае яго ўпрыгажэнне – мінерал пад назвай… кашэчае вока. Колеравыя адценні і пералівы гэтага каменя, які з’яўляецца разнавіднасцю кварцу, заўсёды падобныя на знешнюю абалонку жывога кашэчага вока – адсюль і назва мінералу. Дарэчы, ён ніколі не бывае белага колеру: сустракаецца жаўтаваты, блакітна-шэры і зеленавата-жоўты. Гэты прыгожы і рэдкі самацвет перашкаджае чужародным уздзеянням на біяполе свайго ўладальніка, умацоўвае здароўе і душэўны спакой, захоўвае сямейныя сувязі і каханне, засцерагае ад здрады і падману, вылечвае бяссонніцу, хваробы крыві, сэрца і суставаў, дапамагае пры астме і ангіне.
Прыроднага кашэчага вока засталося надзвычай мала, таму вырабы з яго вельмі дарагія. А вось сінтэтычных аналагаў – прыгожых і недарагіх – можна знайсці шмат у любым ювелірным магазіне і палатцы. Таму кожная жанчына можа дазволіць сабе сціплае, але заўжды элегантнае “кашэчае” ўпрыгажэнне.
Белы колер – гэта колер веры, дабрыні і пачуццёвасці. Ён надае чалавеку сілы і энергіі, здымае напружанне, стому і стрэс. І калі камяні белага колеру ў год Белага кітайскага Ката і Белага японскага Труса прынясуць вам радасць і спакой, то і ўвесь год складзецца паспяхова.
Альберт БАГДАСАРАЎ,
прафесар геалогіі,
г. Брэст.