Беларусь

  • Главная
  • Актуальна!
  • Пераможцам абласнога конкурсу бацькоўскіх клубаў цэнтраў карэкцыйна-развіваючага навучання і рэабілітацыі стаў клуб “Дарослыя і дзеці” з Пружан

Пераможцам абласнога конкурсу бацькоўскіх клубаў цэнтраў карэкцыйна-развіваючага навучання і рэабілітацыі стаў клуб “Дарослыя і дзеці” з Пружан


Даверыцца свету
Яшчэ не забыліся тыя часы, калі дзіця-інвалід было патрэбна толькі сям’і. На бацькоўскія плечы клаліся клопаты і аб здароўі, і аб навучанні малых. Для многіх асаблівае дзіця ў доме азначала толькі адно: адмаўленне ад звыклага ладу жыцця, эмацыянальнае напружанне і адсутнасць нават прывіднай надзеі, што такі сын ці дачка хоць калі-небудзь пакінуць свой пакой, сцены якога ўяўляліся непера-
адольным бар’ерам паміж дзіцём і знешнім светам.
Але паступова грамадства стала змяняць адносіны да дзяцей з абмежаванымі фізічнымі магчымасцямі, а сацыяльная скіраванасць унутранай дзяржаўнай палітыкі падштурхнула да развіцця рэабілітацыйнай работы з інвалідамі. Прыйшло жаданне гэтыя самыя абмежаваныя магчымасці пашырыць, чым даць палёгку і сям’і. З’явіліся цэнтры карэкцыйна-развіваючага навучання і рэабілітацыі, знайшла падтрымку ідэя інтэграванага навучання. Сёння ў вобласці працуе 21 такі цэнтр, а ў 20-і гарадскіх і раённых ёсць бацькоўскія клубы. Менавіта яны, на думку дырэктара абласнога ЦКРНіР Таццяны Жук, дапамагаюць навучыць бацькоў правільна адносіцца да асаблівых дзяцей, падтрымліваюць іх у няпростых жыццёвых сітуацыях, адкрываюць свет такім сем’ям.
Работа вядзецца рознабаковая. Каб убачыць яе, пераняць вопыт, нечаму навучыцца, прыдумалі конкурс бацькоўскіх клубаў цэнтраў карэкцыйна-развіваючага навучання і рэабілітацыі. Вырашана было праводзіць яго раз у два гады. Сёлета конкурс адбыўся ў другі раз.
Клубы стваралі летапісы, прыдумвалі рэкламу сваёй дзейнасці. У межах конкурсу прайшлі трэнінгі, дзелавыя гульні, “круглы стол” па праблемах выхавання асаблівых дзяцей. Ацэньвалася і работа спецыялістаў цэнтраў, і дзейнасць саміх бацькоў. У выніку ў фінал выйшлі клубы “Не побач, а разам” з Лунінца, “Дарослыя і дзеці” з Пружан, “Міласэрнасць” з Ляхавіч, “Мастацтва быць бацькамі” з Бярозы, “Гармонія” з Жабінкі, “Любячыя сэрцы” са Століна, “Дэльфін” (цэнтр “Веда”) і “Садружнасць” (цэнтр “Стымул”) з Брэста.
На сцэне абласнога ЦМТ усе стараліся паказаць сябе з найлепшага боку. Жыццесцвярджальныя і крэатыўныя візітныя карткі расказалі аб гісторыі і справах клубаў. Конкурс сітуацый прадэманстраваў педагагічныя, псіхалагічныя і сацыяльныя навыкі бацькоў. У конкурсе капітанаў праверылі прафесійную кампетэнтнасць спецыялістаў, якія працуюць з клубамі, а таксама тэарэтычныя веды бацькоў па сямейна-прававой і вучэбнай тэматыцы. А ў конкурсе “Маё хобі” каманды здзівілі таленавітасцю, майстэрствам і гаспадарлівасцю. Гэта неверагодна, але, маючы дзяцей-інвалідаў, якія патрабуюць пастаяннай увагі, бацькі знаходзяць сілы і час, каб займацца кветнікамі і рыбнай лоўляй, вышываць карціны і плесці неверагоднай прыгажосці рэчы з бісеру, пісаць вершы і спяваць…
Той пазітыў, які бацькі знаходзяць у клубах карэкцыйна-развіваючых цэнтраў, яны прыносяць у сем’і. Усё атрымаецца, калі разам брацца за справу. З пераканаўчай відавочнасцю гэтае меркаванне пацвердзіў і абласны конкурс. А старшыня журы, намеснік начальніка ўпраўлення адукацыі аблвыканкама Ірына Чоўжык, нагадала: “Трэба памятаць, што няма ненавучаемых дзяцей. Нашы дзеці маюць патрэбу ў падтрымцы. Ёсць спецыялісты, якія гатовыя аказаць такую падтрымку, яны ведаюць, як дапамагчы. І гэта вельмі важна, каб бацькі зразумелі: іх не пакінуць сам-насам з цяжкасцямі, калі ў сям’і расце асаблівае дзіця”.
Прызы і дыпломы атрымалі ўсе ўдзельнікі фіналу. Безумоўна, асабліва радаваліся пераможцы –
бацькоўскі клуб Пружанскага цэнтра карэкцыйна-развіваючага навучання і рэабілітацыі. Добра, што бацькі хочуць вучыцца самі і вучаць сваіх дзетак даверыцца свету, а супрацоўнікі спецыялізаваных цэнтраў дапамагаюць ім адкрыць саміх сябе.
Святлана ТАБОЛІЧ, “НТ”.
Фота Юрыя МАКАРЧУКА, “НТ”.

Пераможцам абласнога конкурсу бацькоўскіх клубаў цэнтраў карэкцыйна-развіваючага навучання і рэабілітацыі стаў клуб “Дарослыя і дзеці” з Пружан
Оцените статью

Добавить комментарий

Авторизация
*
*
Генерация пароля