Нашы жанчыны імкнуцца быць патрэбнымі і ў сям’і, і ў грамадстве
Ролю жанчыны ў любой сферы дзейнасці цяжка пераацаніць. Бо яна – у пастаяннай працы і клопатах, ёй прыходзіцца быць моцнай і прынцыповай. Жанчыны ніколі не заставаліся ўбаку ад грамадскіх і палітычных падзей, гарманічна спалучаючы ў сабе фізічную слабасць і сілу духу. Яны нароўні з мужчынамі знаходзяцца на перадавых рубяжах грамадскага жыцця.
Гэтыя думкі былі цэнтральнымі ў рабоце выязнога пленума абласнога аддзялення ГА “Беларускі саюз жанчын”, на якім напрыканцы мінулага тыдня абмяркоўвалася роля жанчыны ў сацыяльна-эканамічным развіцці Іванаўскага раёна. З усіх куточкаў Берасцейшчыны з’ехаліся жанчыны-актывісткі на чале са старшынёй абласнога аддзялення Ірынай Арабей (на здымку – трэцяя справа).
Намеснік старшыні Іванаўскага райвыканкама Алена Дарагакупец пазнаёміла ўдзельнікаў мерапрыемства з гісторыяй і інфраструктурай раёна. А старшыня раённага Савета дэпутатаў Святлана Майсейчык (яна ж – старшыня Іванаўскай раённай арганізацыі ГА “Беларускі саюз жанчын”), вітаючы гасцей, адзначыла: жанчыны – свайго роду лакаматыў, які вязе ўсё і ўся, што ёсць у нашым грамадстве. Пры яе ўдзеле развіваецца ў нас усё добрае, пазітыўнае, а гэта сведчыць пра тое, што жаночы рух жыве і развіваецца. Жанчына ў сучасным свеце не страціла сваёй значнасці, яна – мудрая, дасканалая, высакародная, добразычлівая, разумная.
Святлана Іванаўна прывяла прыклады, якія ярка дэманструюць ключавую ролю жанчын у разнастайных сферах дзейнасці. Аднак, на яе думку, неабходна больш увагі надаваць вырашэнню надзённых жаночых праблем на працоўных месцах і ў грамадскіх арганізацыях, у сям’і. Асаблівай увагі патрабуюць пытанні захавання здароўя жанчын, дзяцей, сям’і ў цэлым.
Удзельнікі выязнога пленума наведалі ПУГП “Святлана”, якім кіруе член прэзідыума раённай арганізацыі Святлана Шушман. Яна з’яўляецца ўладальніцай прыватнай міні-пякарні, некалькіх магазінаў, а таксама безалкагольнай кавярні для дзяцей і моладзі, тым самым забяспечваючы працай больш за 70 чалавек. Адметна, што гэтая прадпрымальніца не застаецца раўнадушнай да чужых праблем і актыўна займаецца дабрачыннай дзейнасцю.
Парадаваў гасцей чысцінёй і ўтульнасцю прыватны рынак “Альфард”, заснавальнікам якога стала прадпрымальная Наталля Федарук. Тут створаны добрыя ўмовы працы для 300 індывідуальных прадпрымальнікаў, і большасць з іх – вядома ж, заўзятыя, энергічныя жанчыны.
Жанна Парфеявец, начальнік упраўлення па працы, занятасці і сацыяльнай абароне насельніцтва райвыканкама, захоплена расказала аб праведзенай вялікай рабоце па арганізацыі працоўных майстэрняў для людзей з абмежаванымі фізічнымі магчымасцямі ў цэнтры сацыяльнай абароны насельніцтва. Дарэчы, тут многія ўдзельніцы пленума набылі на памяць розныя вырабы з пацерак, штучныя кветкі і пано. А з арганізацыяй працы і вольнага часу жанчын госці пазнаёміліся, калі пабывалі ў працоўных калектывах філіяла “Марыля” Іванаўскага райспажыўтаварыства і СВК “Дружылавічы”. Шмат станоўчых эмоцый падарыла наведванне мясцовай нядзельнай школы і праваслаўнага храма.
Завяршылася мерапрыемства знаёмствам з экспазіцыяй Мотальскага музея народнай творчасці і абменам думкамі аб арганізацыі працы ў Іванаўскай раённай арганізацыі ГА “Беларускі саюз жанчын”, якая лічыцца адной з лепшых у рэспубліцы. Зазначу: пасля ўбачанага не падвяргаўся ніякаму сумненню той факт, што жанчыны адыгрываюць надзвычай важную ролю ў развіцці не толькі Беларусі, але і кожнага яе рэгіёна.
Марыя ФЕДАРУК, “НТ”,
Іванаўскі раён.
Фота аўтара.
ЗАПРАШЭННЕ ДА ШЧАСЦЯ
