Рэпетыцыя

Афіцыйны прадстаўнік Рэспубліканскага інстытута кантролю ведаў па Брэсцкай вобласці Брэсцкі дзяржаўны тэхнічны ўніверсітэт першым у рэгіёне пачаў тэставы марафон
Усяго ж на Брэстчыне вызначаны некалькі пунктаў, дзе можна праверыць свае веды: Баранавічы, Бяроза, Драгічын, Пружаны, Івацэвічы, Кобрын, Лунінец, Ляхавічы, Іванава, Ганцавічы, Столін, Пінск і вёска Пінкавічы Пінскага раёна.
– Папулярнасць пробнага тэсціравання з кожным разам расце, удзельнікаў становіцца больш, – расказаў дырэктар Рэгіянальнага цэнтра тэсціравання Уладзімір Мароз. – Папярэднімі вынікамі мы задаволены, але, вядома, ёсць чаму вучыцца нашым абітурыентам.
У лютым на базе навучальных устаноў вобласці адкрыюцца курсы падрыхтоўкі да цэнтралізаванага тэсціравання. На занятках юнакі і дзяўчаты змогуць атрымаць кансультацыі па змесце тэстаў і прааналізаваць вынікі іспытаў мінулых гадоў.
Асаблівасцю сёлетняга пробнага тэсціравання з’яўляецца ўвядзенне новай паслугі  Рэспубліканскага інстытута кантролю ведаў і Рэгіянальнага цэнтра тэсціравання. Цяпер абітурыенты змогуць разабраць свае памылкі. Для гэтага неабходна звярнуцца па месцы праходжання іспытаў і заплаціць сімвалічную суму – 5 тысяч рублёў. Пасля фармальнай працэдуры ўсе жадаючыя атрымаюць падрабязную расшыфроўку тэстаў. Немалаважна, што абітурыенты не толькі даведаюцца, якія заданні выканалі няправільна, але і дзе можна ўзяць інфармацыю па праблемных пытаннях.
Скончыцца другі этап тэсціравання ў Брэсце 20 лютага, а ў рэгіёнах – у першыя дні сакавіка. Паспрабаваць свае сілы можна па ўсіх школьных прадметах.
Вольга СВІРЫДОВІЧ, “НТ”.