“Само па сабе нічога не даецца…”

Старшыня аблвыканкама Канстанцін Сумар упэўнены: толькі старанная і адказная праца кожнага берасцейца дазволіць ажыццявіць намечаныя задачы
Адзінае пытанне – аб праекце прагнозу сацыяльна-эканамічнага развіцця вобласці на 2011 год – было вынесена на пасяджэнне аблвыканкама, што адбылося 10 студзеня. Адкрываючы яго, кіраўнік Брэстчыны Канстанцін Сумар зазначыў: “Мінулую пяцігодку закончылі нядрэнна, як, дарэчы, і завяршаючы год. У той жа час існуе шэраг праблем – і не хацелася, каб яны перайшлі ў сёлетні год. Трэба працаваць так, каб недахопаў не было…”
Вядома, прагноз сацыяльна-эканамічнага развіцця рэгіёна напружаны, адзначыў губернатар. Упершыню, з 2011 года, уводзіцца такі паказчык як валавы рэгіянальны прадукт. “Але мы для сябе не будзем адыходзіць ад тых параметраў ацэнкі, па якіх працавалі дасюль”, – сказаў Канстанцін Сумар.
У сваім выступленні старшыня камітэта эканомікі аблвыканкама Андрэй Клец, гаворачы аб выкананні большасці прагнозных паказчыкаў за 2010 год, акцэнтаваў увагу прысутных на недапрацоўках. А яны, у прыватнасці, тычацца паказчыкаў, звязаных з вытворчасцю спажывецкіх тавараў (“недабралі 2,4 працэнта”), ростам аб’ёмаў валавой прадукцыі сельскай гаспадаркі, аказаннем платных паслуг. Калі ж, па словах выступоўцы, паказчык па інвестыцыях у асноўны капітал у цэлым выконваецца, дык ён аказаўся не па сіле прадпрыемствам бязведамаснай падпарадкаванасці.
Да станоўчых момантаў мінулага года Андрэй Клец аднёс скарачэнне складскіх запасаў гатовай прадукцыі і зніжэнне колькасці стратных прадпрыемстваў.
Былі значна перавыкананы заданні па экспарце і імпарце тавараў – склалі адпаведна 149 і 128,5 працэнта. А сёлета, завастрыў пытанне Канстанцін Сумар, трэба звярнуць самую пільную ўвагу на будаўнічы комплекс па аказанні паслуг – згодна з гэтым будаўнікі павінны па-іншаму планаваць сваю дзейнасць…
Якія ж асноўныя паказчыкі прагнозу далейшага сацыяльна-эканамічнага развіцця Брэстчыны на сёлетні год адобрылі члены аблвыканкама? Валавы рэгіянальны прадукт павінен скласці 109,5-110,5 працэнта, прамыя замежныя інвестыцыі – 838 мільёнаў долараў ЗША, увод у эксплуатацыю жылля за кошт усіх крыніц фінансавання – 1230 тысяч квадратных метраў агульнай плошчы, колькасць занятых у эканоміцы вырасце да 640,3-647,2 тысячы чалавек, а новых і мадэрнізаваных рабочых месцаў – да 21 тысячы. Плануецца, што рэнтабельнасць продажу ў арганізацыях сельскай гаспадаркі будзе 6-8 працэнтаў, а паказчык па энергазберажэнні складзе 6 працэнтаў. Інвестыцыі ў асноўны капітал дасягнуць 116-117 працэнтаў, сальда знешняга гандлю таварамі і паслугамі – 110 мільёнаў долараў ЗША.
“Калі нармальна працаваць кожнаму са сваім штабам, дык запланаваныя паказчыкі будуць выкананы”, – перакананы кіраўнік вобласці Канстанцін Сумар. Яго падтрымаў і старшыня абласнога Савета дэпутатаў Сяргей Ашмянцаў: “Калісьці, у 90-х, таксама многія заданні здаваліся непасільнымі: той жа мільён збожжа, а зараз маем яго свабодна. І ўвогуле, вазьміце асабліва апошнія 7 гадоў – які набраны тэмп! Ды каб лепей жыць, павінны і лепш працаваць. А для гэтага неабходна задзейнічаць чалавечы фактар – забываючы пра яго, штосьці губляем”. “Многае губляем! – дадаў Канстанцін Сумар, працягваючы: – Павінны яшчэ раз вызначыцца: усе даведзеныя паказчыкі трэба няўхільна выканаць… Рэзервы маюцца. А каб не завальваць гэтую работу, вынікі будуць падводзіцца  штомесяц – з тым, каб даць ацэнку работы кожнаму кіраўніку і кожнаму рэгіёну. Час пайшоў. А людзі, якія зараз знаходзяцца ў зале, здольныя выканаць намечаныя задачы – праўда, пры ўмове, калі будуць старацца. Само па сабе нічога не даецца…”
Галіна МАЗІНА, “НТ”.