Беларусь

  • Главная
  • Актуальна!
  • У школах пачалася рэалізацыя спецыяльнага праекта Міністэрства адукацыі Рэспублікі Беларусь

У школах пачалася рэалізацыя спецыяльнага праекта Міністэрства адукацыі Рэспублікі Беларусь


Вызначэнне “непаседы” заўсёды адносілася да дзяцей. Няўрымслівым гарэзам цяжка было ўседзець на месцы, а таму ў іх у пашане былі рухавыя гульні. Але сучасныя дзеці мала рухаюцца. Спецыялісты ў адзін голас сцвярджаюць: праблемы са здароўем абвастраюцца, калі малыя становяцца школьнікамі. “Букет” хвароб вачэй, паставы, лішняя вага і затрымкі ўзроставага развіцця – усё гэта выклікала заклапочанасць дарослых, і яны, у рэшце рэшт, прынялі рашэнне – школьнікам неабходна дапамагчы. Так, з 1 кастрычніка ў раскладах навучальных устаноў краіны з’явіўся абавязковы факультатыў “Гадзіна здароўя і спорту”. Па рашэнні Міністэрства адукацыі Рэспублікі Беларусь ён праводзіцца за кошт вучэбных гадзін, якія выдзяляюцца на факультатывы, стымулюючыя і падтрымліваючыя заняткі.
Новы факультатыў з задавальненнем прынялі вучні сярэдняй школы №3 г. Брэста. Чаму б не пагуляць у валейбол, футбол ці не паплаваць? Аэробіка даспадобы дзяўчатам, а гімнастычныя і сілавыя практыкаванні дапамогуць хлопцам стаць больш вынослівымі. Як расказалі ў навучальнай установе, пры фарміраванні груп улічылі асаблівасці дзяцей, стан іх здароўя і інтарэсы. Адзнак на занятках не ставяць, але якасць іх ад гэтага не церпіць. “Нам весела і цікава на фізкультурным факультатыве”, – дружна ацанілі новы “ўрок” пяцікласнікі. Насамрэч, хіба можа быць сумна, калі ты часцей бываеш на свежым паветры, актыўна рухаешся, гуляеш з сябрамі-аднакласнікамі, спаборнічаеш?
Дарэчы, медыкі ініцыятыву педагогаў падтрымалі і выказаліся абедзвюма рукамі за “Гадзіну здароўя і спорту”. Разам з настаўнікамі яны спадзяюцца, што фізкультурны факультатыў прыжывецца ў школах і дапаможа зберагчы здароўе дзяцей.
Сабіна ГАРАЕВА,
студэнтка БрДУ
імя А.С. Пушкіна.
Фота аўтара.

У школах пачалася рэалізацыя спецыяльнага праекта Міністэрства адукацыі Рэспублікі Беларусь
Оцените статью

Добавить комментарий

Авторизация
*
*
Генерация пароля