Беларусь

Душой багатыя банкіры


У Бярозаўскім аддзяленні ААТ “Белаграпрамбанк” душэўны мікраклімат і камфортную атмасферу для кліентаў ствараюць крэатыўныя старажылы і “залатая” моладзь

Апынуўшыся каля будынка Бярозаўскага аддзялення ААТ “Белаграпрамбанк”, адразу становіцца зразумела, чаму адной з традыцый у райцэнтры стала прыязджаць сюды на шлюбную фотасесію. Сапраўды, казачны і адначасова сучасны дызайн сумежнай з банкам тэрыторыі радуе вока. Дарэчы, створана гэта прыгажосць рукамі работнікаў банка – вельмі натхнёных і неардынарных людзей, а таксама Прафесіяналаў з вялікай літары.
Пра сваіх работнікаў кіраўнік гаворыць вельмі цёпла. Генадзь Бугаеў хоць і ўзначальвае аддзяленне адносна нядаўна, з 2011 года, аднак паспеў ужо адчуць, што калектыў тут – як адна сям’я. Дружная і зладжаная каманда –  так прадставіў Генадзь Аляксандравіч сваіх работнікаў падчас сустрэчы з вядомым беларускім пісьменнікам і членам рэспубліканскай інфармацыйнай групы Уладзімірам Сітухам. А на думку літаратара, у Бярозаўскім аддзяленні яшчэ і неверагодныя прыгажуні працуюць.  Пэўна, так яно і ёсць, бо ад кліентаў, якія давяраюць ім свае фінансы, адбою няма. А да прыгажосці знешняй можна дадаць яшчэ і багаты ўнутраны свет кожнага з банкіраў.
– У нас усе спяваюць, – расказвае намеснік кіраўніка па курыраванні карпаратыўнага блока Маргарыта Кухарчук. – Артысты, гумарысты, рамеснікі – такія нашы супрацоўнікі! Прычым  здзівіць сваімі хобі ды захапленнямі могуць як вопытныя старажылы, так і моладзь.
Аб дасягненнях і поспехах бярозаўскіх банкіраў яскрава расказваюць шматлікія дыпломы, граматы і кубкі ў кабінеце кіраўніка. Перамогі ў валейболе, футболе, мастацкай самадзейнасці, добраўпарадкаванні і, безумоўна, у прафесійнай сферы – заслуга яшчэ і папярэдняга кіраўніка Святланы Кошаль. Цяперашні лідар працягвае добрыя традыцыі.
Вядома ж, для таго, каб увесь час падтрымліваць творчы запал і энергічнасць работнікаў, неабходны спецыфічная душэўная атмасфера і спрыяльны мікраклімат. Менавіта такія ўмовы і стварыў Генадзь Бугаеў у калектыве.
– У аснове паспяховай дзейнасці –
не толькі нармальныя эканамічныя адносіны, але і чалавечыя, – разважае Генадзь Аляксандравіч. – Грошы варта ўкладваць туды, дзе ёсць аддача. Такога ж прынцыпу прытрымліваюся і з людзьмі. Да чалавека трэба адносіцца так, як ён да цябе.
Яшчэ нядаўна ён узначальваў Маларыцкае аддзяленне “Бел-аграпрамбанка”, а цяпер “прыкіпеў” да Бярозаўшчыны. І калектыў, і кліенты заўважылі, што кіраўнік аддае перавагу чалавечым якасцям і адказнаму падыходу да справы.  Магчыма, немалая заслуга ў гэтым бацькоў. Маці 20 гадоў кіравала банкам, бацька працаваў у праваахоўных органах, а сястра – эканамістам. Адказнасці, людскасці і ўменню жыць сярод людзей у згодзе вучацца і дзве любімыя дачушкі Генадзя Аляксандравіча. Малады кіраўнік скончыў Брэсцкі дзяржаўны тэхнічны ўніверсітэт у 2001 годзе, таму памятае, як цяжка прыходзіць на першае працоўнае месца.
У банку навічкам дапамагаюць супрацоўнікі са стажам. А моладзь не расчароўвае, наадварот – праяўляе ініцыятыву. Напрыклад, спецыяліст аддзела актыўных банкаўскіх аперацый Вольга Шымчук  па першай адукацыі – педагог, дасканала валодае нямецкай мовай. Вось і давяраюць ёй замежных кліентаў.
Нядаўна Бярозаўскае аддзяленне ААТ “Белаграпрамбанк” перамагло ў абласным конкурсе па афармленні банкаўскіх дворыкаў. Немалая заслуга ў гэтым спецыяліста аддзела актыўных банкаўскіх аперацый Надзеі Варанчук-Шаўкаловіч. Яна захапляецца пляценнем з лазы і прызналася, што ідэй для дэкору ў яе шмат, а калегі такія эстэтычныя метамарфозы толькі вітаюць.
Моладзь у банку называюць “залатой” – значыць, добрай, працаздольнай, ініцыятыўнай, гатовай вучыцца і самаўдасканальвацца.
Сёння ў Бярозаўскім аддзяленні (разам з падначаленым разлікова-касавым цэнтрам у Драгічыне) звыш 120 спецыялістаў.
– Працаваць з людзьмі тут лёгка і надзвычай прыемна, – прызнаецца галоўны спецыяліст па кіраванні чалавечымі рэсурсамі Святлана Якубовіч. – Калектыў вельмі творчы. Як кажуць, што ні птушачка – дык пявучая.
Яскравае пацвярджэнне гэтаму знаходзіцца за суседнім сталом. Юрысконсульт Мікалай Вайтуховіч па прыкладзе многіх калег цудоўна спраўляецца не толькі з прафесійнымі абавязкамі, а яшчэ і захапляецца відэаздымкай. Сам жа прыярытэтнымі ў рабоце называе добры калектыў і стабільнасць. Ды, як паказвае практыка, адно з другім непарыўна звязана.
Адданыя старажылы банкаўскай справы складаюць касцяк калектыву. Гэта работнікі, чые адносіны з банкам налічваюць амаль 40 гадоў. Сярод іх – галоўны бухгалтар Людміла Колас, спецыяліст аддзела ўнутрыбанкаўскіх аперацый Раіса Злотка, актывістка-гумарыстка Марыя Філюта з аддзела разлікаў, бестурботныя супрацоўніцы аддзела актыўных банкаўскіх аперацый Валянціна Грыневіч, Людміла Бушля, Таццяна Новік… Словам, пералічваць можна бясконца, бо такіх у банку –
пераважная большасць.
Бліжэй пазнаёміцца менавіта з Таццянай Новік прымусіла яе ўнікальная гісторыя. Жанчына адметная не толькі багатым прафесійным стажам, але і тым, што з’яўляецца выдатнай прадстаўніцай сапраўднай банкаўскай дынастыі. Муж Таццяны Іванаўны працуе ў інкасацыі, дачка – у касе, а сын атрымліваў эканамічную адукацыю ў Брэсце. У свой час старанная жанчына нават узначальвала аддзел актыўных банкаўскіх аперацый. Аднак без ваганняў саступіла пасаду, бо знайшла годную пераемніцу – сённяшнюю начальніцу Людмілу Самуту.
Таццяна Новік прызнаецца: яна ганарыцца сваім банкаўскім мінулым. Прафесія –
любімая і зусім не сумная, насуперак распаўсюджанаму стэрэатыпу. Жанчына з усмешкай узгадвае перамены, сведкай якіх давялося быць. Ці ж не жарт: трапіла ў банк яшчэ ў 1975-м! З таго часу ўстанова не толькі прырасла новымі кліентамі, паслугамі і магчымасцямі, але нават паспела змяніць “прапіску”. Разам з ёй у новы ўтульны будынак пераехала і Таццяна…
У надзённых клопатах час ляціць незаўважна. На рабоце сядзець без справы не дазваляюць шматлікія наведвальнікі, а дома кожная вольная хвілінка дэмакратычна размяркоўваецца паміж хатнімі турботамі, гародам і ўнукамі. Апошніх, дарэчы, няўрымслівая жанчына лічыць самым любімым хобі. Нешта падказвае, што і яны – маленькія гарэзы – у якасці прыкладу для пераймання абяруць менавіта бабулін вопыт.
А вось у Людмілы Самуты, той самай паслядоўніцы Таццяны Новік на пасадзе начальніка аддзела, выбар прафесіі насіў выпадковы характар. Жанчына зусім не збіралася ў банкіры і марыла стаць настаўнікам, але лёс склаўся інакш. Сёння яна ўмела кіруе цэлым падраз-
дзяленнем, у складзе якога – 9 чалавек, і не шкадуе, што ўсё здарылася менавіта так. Гэта ж прафесія выбрала яе – і нікуды тут не дзенешся!
Між іншым, таленавітая моладзь Бярозаўскага аддзялення “Белаграпрамбанка” з кожным новым днём прыбаўляе ў прафесійным майстэрстве. Гэтаму, як нельга лепш, спрыяе яшчэ адна цудоўная традыцыя ўстановы – выхаванне ўласных кадраў. Так, сёння шэсць чалавек атрымліваюць вышэйшую адукацыю ў Палескім дзяржаўным універсітэце, Белдзяржуніверсітэце, Брэсцкім дзяржаўным тэхнічным універсітэце.
Перспектыўныя навічкі актыўна ўдзельнічаюць у прафесійных конкурсах і, што асабліва радуе, вяртаюцца адтуль з разнастайнымі трафеямі ды тытуламі. Нядаўна на падобных галіновых спаборніцтвах сярод аддзяленняў “Бел-аграпрамбанка” перамогу здабыла Алеся Люсцібер. Дзяўчыну прызналі лепшым у Беларусі спецыялістам па абслугоўванні прыватных кліентаў і ўзнагародзілі пуцёўкай у Турцыю. Мэтанакіраваная Алеся на дасягнутым не спынілася: яна прыкладае максімум намаганняў, каб заваяваць яшчэ адну катэгорыю наведвальнікаў банка – юрыдычных асоб. Дзяўчына змяніла вектар дзейнасці: перайшла ў аддзел актыўных банкаўскіх аперацый, у якім, сцвярджае, асабліва падабаецца камунікацыйны аспект. Ды на пытанне пра любімых кліентаў абаяльны спецыяліст адказвае даволі сціпла, затое сумленна: з сімпатыямі пакуль не вызначылася, бо ўсе наведвальнікі аднолькава добразычлівыя. Можа, таму і першы дзень у Бярозаўскім аддзяленні таксама ўзгадваецца без напружання. А ён, дарэчы, здарыўся не так даўно – два гады таму.
– Быў канец рабочага тыдня, усе мітусіліся, даводзілі да ладу справы, – расказвае Алеся Люсцібер. – Ды мяне сустрэлі вельмі гасцінна, пазнаёмілі з калектывам і працоўнымі абавязкамі. Адразу кінулася ў вочы тое, што людзі тут, сапраўды, рады навічкам. Здавалася, мяне не проста ўзялі на працу, а прынялі ў дружную сям’ю. Зрэшты, так яно і атрымалася. Таму ў прафесіі больш за ўсё цаню менавіта гэтых людзей, а яшчэ – нядрэнныя перспектывы кар’ернага росту. Сярод захапленняў, не звязаных з фінансамі, перавагу аддаю… рыбалцы – як бы дзіўна гэта ні гучала.
У працяг тэмы кар’ернага росту варта заўважыць, што ў Бярозаўскім аддзяленні старанныя і працаздольныя заўжды знаходзяць сваё месца пад сонцам. За пацвярджэннем і хадзіць далёка не прыйдзецца: неабходна толькі завітаць у аддзел унутрыбанкаўскіх аперацый. Літаральна месяц таму адна з яго супрацоўніц –
Алена Мшар – прайшла атэстацыю ў Нацыянальным банку Рэспублікі Беларусь і са спецыяліста II катэгорыіі “вырасла” да пасады намесніка галоўнага бухгалтара.
Аддзелу інфармацыйных тэхналогій банка таксама ёсць чым пахваліцца. Ён прадстаўлены сапраўднымі прафесіяналамі сваёй справы: начальнікам Дзмітрыем Коўцікам, яго вернымі паплечнікамі Андрэем Мацвейчыкам і Сяргеем Верамчуком, а таксама маладзенькай прадстаўніцай прыгожай паловы чалавецтва Марыяй Ліцвінец, якая пасля заканчэння Беларускага нацыянальнага тэхнічнага ўніверсітэта вярнулася ў родную Бярозу.
Сапраўднай мужчынскай тэрыторыяй з’яўляецца сектар забеспячэння на чале з кіраўніком Аляксандрам Шаровым. Затое ў аддзела разлікаў, як і ў мноства іншых у банку, пераважна жаночы твар. Амаль на 80 працэнтаў ён складаецца з найбольш вопытных спецыялістаў галіны, якія прысвяцілі любімай прафесіі па 30 і болей гадоў. Падраздзяленнем колькасцю ў 11 чалавек кіруе Галіна Макарэвіч, а замяшчае яе Ірына Мшар. Доўгая праца разам, вядома ж, наклала свой адбітак не толькі на характары, але і на знешняе аблічча калег. Прыгожыя, ветлівыя, з нязменнымі ўсмешкамі на вуснах – так жанчыны сустракаюць кожнага без выключэння кліента.
Па суседстве месціцца сектар уліку аперацый рознічнага бізнесу, які ўзначальвае Алена Янчук – дачка патомных банкіраў. Яе маці Галіна Стэльмашук правяла ў бела-аранжавых сценах 40 непаўторных гадоў жыцця, у тым ліку працавала і на паса-дзе намесніка кіраўніка. Сама ж Алена пачынала кар’еру ў Жабінцы, але, як кажуць, жыццёвыя шляхі ўсё роўна прывялі дадому. У роднай Бярозе жанчына паспяхова рэалізавалася ў любімай прафесіі.
Крыніца мудрасці і вопыту –
прыкладна так можна ахарактарызаваць адну з вядучых кліентаарыентаваных структур банка – аддзел кліенцкага менеджменту, які мае справу з юрыдычнымі асобамі. Яго ўзначальвае вопытная Тамара Куліна, якая знаходзіцца ў эпіцэнтры грамадскага жыцця ўстановы. Менавіта Тамары Яўгенаўне трэба падзякаваць за арыгінальныя сцэнарыі для шматлікіх конкурсаў мастацкай самадзейнасці.
– Важнае месца ў банкаўскай структуры займае і аддзел рознічных паслуг, без якога знаёмства з фінансавай установай было б няпоўным, –
лічыць намеснік кіраўніка па розніцы Марына Хутко. –
Аддзел спецыялізуецца на абслугоўванні фізічных асоб, а ўзначальвае яго Віктар Мядзведзь. Прыкладна тое ж – і ў кампетэнцыі аддзела касы, за руль якога моцна трымаецца Юлія Галета – прыгажуня і спецыяліст высокага класа.
Энергічныя бярозаўскія фінансісты настолькі звыклі працаваць плячо ў плячо і падтрымліваць адзін аднаго ў складаных сітуацыях, што сумеснае існаванне даўно ператварылася ў своеасаблівае мастацтва. Хоць яго асноўныя прынцыпы – узаемаразуменне, узаемапавага, узаемадапамога – не выкладаюцца на занятках па эканоміцы, тут яны сталі абавязковымі нормамі карпаратыўнай этыкі. І гэта, сапраўды, падстава для гонару!
Вольга СВІРЫДОВІЧ, “НТ”,
Ніна ЛЕАНАВЕЦ, “НТ”,
г. Бяроза.

Душой багатыя банкіры
Оцените статью

Добавить комментарий

Авторизация
*
*
Генерация пароля