Выпускнікамі на Брэстчыне сёлета сталі амаль 14 тысяч школьнікаў

Апошні званок прагучаў у панядзелак. На ўрачыстую лінейку з нагоды свята ў абласны агульнаадукацыйны ліцэй імя Пятра Машэрава завітаў старшыня аблвыканкама Канстанцін Сумар. Ён павіншаваў ліцэістаў, іх бацькоў і настаўнікаў з заканчэннем навучання, а затым уручыў дыпломы і граматы вучням, якія дасягнулі значных поспехаў у вучобе, спорце, журналістыцы і грамадскім жыцці. Такіх, дарэчы, тут нямала. Дырэктару ўстановы Ніне Альхіменка губернатар перадаў дакументы на новенькую камп’ютарную тэхніку.
– У бязмежжа дарослага жыцця выходзіць новае пакаленне маладых і таленавітых берасцейцаў, – адзначыў Канстанцін Сумар. – Як сказаў Прэзідэнт нашай краіны Аляксандр Лукашэнка, энергічныя, адораныя і працавітыя людзі – галоўнае багацце Беларусі. Для іх навучання створаны цудоўныя ўмовы.
Мора цёплых слоў, вершаў, песень прагучала на лінейцы. Сёлетні выпуск у ліцэі з’яўляецца сёмым па ліку. Аднак, як і ў папярэднія гады, змешаныя пачуцці перажываюць у гэты дзень выпускнікі – іх у абласным ліцэі 105 чалавек.
– Восем гадоў таму ў межах дзяржаўнай праграмы “Адораныя дзеці” аблвыканкам прыняў рашэнне аб адкрыцці абласнога ліцэя, – расказала Ніна Альхіменка. – Новая ўстанова адукацыі дала магчымасць юнакам і дзяўчатам з розных куточкаў Берасцейшчыны выкарыстаць адукацыйныя магчымасці абласнога цэнтра. І гэты шанс цудоўна выкарысталі здольныя дзеці.
Сярод прыемных сюрпрызаў было і ўручэнне ліцэйскага білета №1. Ён дастаўся старшыні аблвыканкама.
Ну, і як жа без школьнага вальса?! Пад вядомую ўсім мелодыю закружыліся ў танцы вучні і настаўнікі. А зараз у іх – адказны час: выпускнікі здаюць экзамены ў навучальных установах. 14 чэрвеня стартуе ўступная кампанія: пачынаюцца першыя іспыты цэнтралізаванага тэсціравання.
Вольга  СВІРЫДОВІЧ, “НТ”.
Фота аўтара.