Змяніць адносіны да пацыента

Медыцынскія работнікі Брэстчыны абмеркавалі зробленае за 2010 год і вызначылі задачы на будучыню
У рабоце калегіі бралі ўдзел першы намеснік міністра аховы здароўя Валерый Хаджаеў і намеснік старшыні аблвыканкама Леанід Цупрык.
Сацыяльная значнасць гэтай сферы дзейнасці па-ранейшаму застаецца актуальнай. У дакладзе аб гэтым гаварыў начальнік упраўлення аховы здароўя аблвыканкама Ігар Ласіцкі. Ён падкрэсліў, што клопат аб здароўі лю-дзей, павышэнне ўзроўню і якасці медыцынскага абслугоўвання насельніцтва, рацыяналізацыя сістэмы аховы здароўя – важнейшыя прыярытэты медыкаў. Самым пераканаўчым аргументам дзейснасці сістэмы служаць асноўныя дэмаграфічныя паказчыкі. У вобласці стабілізавалася нараджальнасць, знізіліся каэфіцыенты дзіцячай смяротнасці, зменшылася  (праўда, толькі на 0,3 працэнта) смяротнасць насельніцтва ў працаздольным узросце. І ўсё ж колькасць лятальных зыходаў ад усіх прычын павялічылася на 1,9 працэнта. Зарэгістравана больш смяротных выпадкаў ад хвароб сістэмы кровазвароту, анкалагічных, інфекцыйных, хвароб органаў стрававання і мачапалавой сістэмы. Заклапочанасць выклікае рост на 28 працэнтаў у параўнанні з 2009 годам смяротнасці з-за выпадковых атручванняў алкаголем, на 6,7 працэнта – ад няшчасных выпадкаў на транспарце. Медыкі звязваюць гэта з недастатковай прафілактычнай работай.
Нягледзячы на тое, што палепшылася рэпрадуктыўнае здароўе насельніцтва, вырас узровень матывацыі да здаровага ладу жыцця, забывацца на прафілактыку нельга. Асабліва звярнуць увагу на яе неабходна ў раёнах, дзе летась адзначана павелічэнне лятальнасці: Бярозаўскім, Івацэвіцкім, Пружанскім, Баранавіцкім, Кобрынскім, Пінскім.
У структуры першаснага захворвання па-ранейшаму сумнае лідарства трымаюць хваробы органаў дыхання, траўмы, атручванні, хваробы сістэмы кровазвароту, органаў стрававання і інфекцыйныя. А вось зніжэнне поўнай і частковай рэабілітацыі, рост ускладнення інваліднасці дыктуюць неабходнасць пашырэння спектра медыцынскіх паслуг на ўсіх этапах аказання медыцынскай дапамогі.
Сярод вызначаных задач – прадаўжэнне ўкаранення новых медыцынскіх тэхналогій, развіццё экспарту медыцынскіх паслуг, інтэнсіўнае і эфектыўнае выкарыстанне абсталявання. Пакуль не ўдаецца да канца вырашыць кадравы дэфіцыт: вобласць мае патрэбу ў больш чым 700 урачах розных спецыялізацый. Па-ранейшаму праблематычна затрымаць кадры ў сельскай мясцовасці, хоць для паляпшэння ўмоў працы і жыцця там зроблена шмат. А самай складанай задачай намеснік міністра Валерый Хаджаеў назваў неабходнасць змяніць адносіны да пацыента, бо канкурэнцыя ў галіне будзе станавіцца ўсё больш адчувальнай. Ці змогуць гэта зрабіць медыкі Берасцейшчыны, пакажа час.
Святлана ТАБОЛІЧ, “НТ”.