Беларусь

23 чэрвеня на Брэстчыне прайшла спартакіяда школьнікаў на прызы Прадстаўніцтва НАК Беларусі


Нават надвор’е аказалася добразычлівым да юных удзельнікаў абласной спартакіяды на прызы Прадстаўніцтва Нацыянальнага алімпійскага камітэта Беларусі ў Брэсцкай вобласці. Спаборніцтвы атлетаў-пачаткоўцаў – удзельнікаў клубаў “Юны алімпіец” – праводзяцца ўжо ў сёмы раз, але кожны раз па-свойму непаўторны і запамінальны. Цудоўнай нагодай сустрэцца зноў і паспрабаваць сілы ва ўпартай барацьбе стала святкаванне Міжнароднага алімпійскага дня. Яго дэвізам абралі просты, але вельмі трапны заклік: “Рухайся. Вывучай. Адкрывай”.
Менавіта прага новых адкрыццяў з’яўляецца той цудадзейнай сілай, што прыводзіць знакамітых спартсменаў да вышэйшых прыступак п’едэстала. А школьнікаў з усіх куточкаў вобласці, якія сабраліся ў той дзень каля стэлы “Алімпійская слава Брэстчыны” ў абласным цэнтры, яна натхніла на першыя крокі ў любімую справу.
– І няхай гэтыя крокі ў вялікі спорт пакуль што невялічкія, але яны моцныя і ўпэўненыя, – адзначыў на цырымоніі адкрыцця спартакіяды Леанід Цупрык, намеснік старшыні аблвыканкама і па сумяшчальніцтве старшыня Прадстаўніцтва НАК у Брэсцкай вобласці.
Падбадзёрылі юных атлетаў – вучняў 7-8 класаў – красамоўныя дасягненні на чэмпіянатах свету і Еўропы землякоў, якія ў гэты дзень таксама былі сярод гасцей і нават атрымалі прэзенты з рук Леаніда Цупрыка ды Алены Белаконенка, выканаўчага дырэктара Прадстаўніцтва НАК у Брэсцкай вобласці.
Добрага старту і выніковага фінішу камандам пажадалі знакамітыя берасцейцы, чые перамогі ўпісаны залатымі літарамі ў спартыўную гісторыю нашай краіны. Гэта і алімпійская чэмпіёнка Юлія Несцярэнка, якая заўжды лічыцца чаканым госцем на ўсіх спартыўных мерапрыемствах вобласці, і Ірына Кулеша, чыя “бронза” на Гульнях-2012 у Лондане зноў прадэманстравала неверагодны патэнцыял беларускіх атлетаў.
Аднак гэта далёка не адзіныя трафеі, здабытыя спартсменамі вобласці на галоўных спаборніцтвах сучаснасці. За даволі працяглую гісторыю існавання Алімпійскіх гульняў у іх паўдзельнічала каля 100 берасцейцаў. Наша скарбонка скаланулася 21 раз ад звону медалёў самага рознага гатунку.
А на гэтай спартакіядзе “бронза” дасталася камандзе СШ №16 г. Брэста, “срэбра” ўзялі юныя алімпійцы з Мокраўскай СШ Пружанскага раёна, а “золата” павезлі дамоў спартсмены з пінскай СШ №14. Але незалежна ад вынікаў і духу саперніцтва любыя спартыўныя спаборніцтвы ў першую чаргу вучаць сапраўднаму сяброўству, што, дарэчы, і сімвалізуюць знакамітыя алімпійскія кольцы.
Тамара ВАСІЛЬКОВА, “НТ”.

Добавить комментарий

Авторизация
*
*
Генерация пароля