9 ліцэнзій на ўдзел у лонданскай Алімпіядзе ўжо заваяваны спартсменамі Берасцейшчыны
Менш чым год застаўся да ХХХ летняй Алімпіяды ў Лондане. На рахунку брэсцкіх спартсменаў – 9 заваяваных ліцэнзій на ўдзел у самых прэстыжных у свеце спаборніцтвах. Задача для нашых алімпійцаў – 5 медалёў рознай вартасці, для рэспублікі – 25.
– Вялікіх праблем з падрыхтоўкай нашых алімпійцаў няма, – расказаў начальнік упраўлення фізічнай культуры, спорту і турызму абл-выканкама Мікалай Хевук. – Усе пытанні вырашаюцца ў рабочым парадку. Самае складанае – знайсці фінансаванне, але для гэтага мы і працуем. Рэальна прэтэндуюць на медалі прадстаўнікі веславання акадэмічнага, а таксама на байдарках і каноэ, плавання, лёгкай атлетыкі, фехтавання, бадмінтона, стральбы кулявой.
Падчас чарговай прэс-канферэнцыі (на здымку) спартсменамі і іх трэнерамі былі ўзняты канкрэтныя праблемы. Так, напрыклад, адзін з самых перспектыўных стралкоў Брэстчыны Юрый Шчарбацэвіч, які выйграў нядаўна ўніверсіяду ў Кітаі, належнага інвентару (вінтоўкі і спецыяльных патронаў) пакуль не мае. Падыходзячы вытворца знаходзіцца ў Германіі. Спартсмену неабходна асабіста ехаць за мяжу і індывідуальна падбіраць зброю. Для8Fвая стральба – такі від спорту, дзе вялікую ролю адыгрывае тэхнічнае аснашчэнне спартсмена. Акрамя таго, увесь час неабходна паказваць высокія вынікі, бо ліцэнзія не з’яўляецца імянной і ў апошні момант на Алімпіяду можа паехаць лепш падрыхтаваны спартсмен.
Праблема з інвентаром – асноўная ў спартсменаў. Таксама галаўным болем з’яўляецца набыццё лодак для весляроў. Калі ў тытулаванага Алега Юрэні прапаноў ад сусветна вядомых фірм шмат, дык менш вядомым маладым спартсменам прыходзіцца цяжка. Лодкі айчыннага вытворцы з Асіповіч, мякка кажучы, не адпавядаюць характарыстыкам.
А вось плыўцам скардзіцца не даводзіцца. У вобласці створаны проста казачныя ўмовы – толькі паказвайце вынік. Акрамя таго, усе кандыдаты на ўдзел у Алімпійскіх гульнях могуць у любы час наведваць усе спартыўныя аб’екты і праводзіць патрэбныя заняткі.
Вядома, спартсменаў-алімпійцаў рыхтуюць не адзін год: на сустрэчу з прэсай прыйшлі будучыя зорачкі вялікага спорту Юлія Рапінская і Ганна Зінчук (цяжкая атлетыка). Дзяўчаты ўжо адкрылі рахунак медалёў і маюць намер заваяваць алімпійскія вяршыні. Што ж, будзем перажываць за іх на Алімпіядзе ў Рыа-дэ-Жанэйра. Пакуль жа трымаем кулакі за нашых у іх перадлонданскіх іспытах, а ў хуткім часе – і на саміх алімпійскіх стартах на Туманным Альбіёне.
Вольга СВІРЫДОВІЧ, “НТ”.
Фота аўтара.