У сераду завяршылася выстава “Брэстчына творчая – Брэстчына алімпійская”, якую рганізавала Прадстаўніцтва НАК Беларусі ў Брэсцкай вобласці
Экспазіцыя дэманстравалася ў зале абласнога грамадска-культурнага цэнтра. Шахматы з мяккіх цацак, пано з выявамі спартсменаў, скульптурныя кампазіцыі, якія адлюстроўваюць яркія моманты спартыўных баталій – усё сваімі рукамі зрабілі дзеці. Выстава налічвала каля 400 экспанатаў і фотаздымкаў з усіх раёнаў вобласці. Удзел у творчым форуме прынялі аўтары вырабаў – удзельнікі фотаконкурсаў “Моладзь і спорт”, а таксама дэкаратыўна-прыкладнога мастацтва.
– Работа выставы “Брэстчына творчая – Брэстчына алімпійская” – частка Праграмы алімпійскай адукацыі, прынятай на 2009-2012 га-ды, – расказала выканаўчы дырэктар Прадстаўніцтва НАК Беларусі ў Брэсцкай вобласці Алена Белаконенка. – Творчая работа з моладдзю – адзін з асноўных кірункаў дзейнасці.
У фотаконкурсе паўдзельнічаў 91 чалавек, а ў дэкаратыўна-прыкладным мастацтве сябе паспрабавалі 177. Арганізатары імкнуліся не толькі зацікавіць моладзь творчасцю, але і захапіць алімпійскімі ідэаламі. У склад журы ўвайшлі вядомы брэсцкі мастак Міхаіл Канькоў і загадчык аддзела выяўленчага мастацтва і дэкаратыўна-прыкладной творчасці абласнога ЦМТ Наталля Філіповіч. Спецыялісты далі не толькі высокую адзнаку дзіцячым работам, але і карысныя парады юным аматарам мастацтва.
Пераможцы, кожны ў сваёй намінацыі, атрымалі дыпломы і сувеніры. Узнагароды ім уручылі ўдзельнікі Алімпійскіх гульняў Вольга Асташка (лёгкая атлетыка) і Юрый Далгаполаў (стральба кулявая). Усе жадаючыя змаглі атрымаць аўтографы знакамітых алімпійцаў.
Вольга СВІРЫДОВІЧ, “НТ”.
Фота аўтара.
Бліжэй да куміраў
