Тэсты. Працяг будзе…

23 снежня завяршыўся першы этап рэпетыцыйнага тэсціравання
На працягу трох месяцаў усе жадаючыя маглі праверыць свае веды і падрыхтоўку да цэнтралізаванага тэсціравання. Яго рэпетыцыю праводзіў Рэгіянальны цэнтр тэсціравання пры Брэсцкім дзяржаўным тэхнічным універсітэце.
–  Вынікі сёлетняга пробнага тэсціравання лепшыя, чым у мінулым годзе, – расказаў дырэктар цэнтра Уладзімір Мароз. – У сярэднім яны вышэйшыя на 2-4 балы. Традыцыйна больш высокія адзнакі атрымліваюць абітурыенты па беларускай, рускай і замежных мовах.
Апошнімі “тэставую” эстафету прымаюць Баранавічы. Але гэта зусім не значыць, што магчымасці паспрабаваць праэкзаменавацца ў берасцейцаў больш не будзе. 16 студзеня стартуе другі этап рэпетыцыйнага тэсціравання, і працягнецца ён да канца лютага. Будзе яшчэ і трэці.
Патрабаванні да прахо-джання пробных тэстаў такія ж, як і да сапраўдных, таму варта сур’ёзна аднесціся да падрыхтоўкі і ўсвядоміць, што такую магчымасць упускаць нельга. Тым больш, што каштуе тэсціраванне па адным прадмеце ўсяго 16100 рублёў. Падрабязную інфармацыю можна знайсці ў інтэрнэце, напрыклад, на сайце тэхнічнага ўніверсітэта www.bstu.by.
Вольга СВІРЫДОВІЧ, “НТ”.