У ПРУЖАНАХ ПАДРАСТАЮЦЬ БУДУЧЫЯ ЗОРКІ БЕЛАРУСКАГА ХАКЕЯ

Хакей – спорт для моцных людзей. І хоць сёння не радуюць беларусаў гучнымі перамогамі ні нацыянальная зборная, ні вядомыя клубы КХЛ, ды ёсць надзея на будучае пакаленне спартсменаў.
У сёлетнім сезоне сталіцай дзіцячага хакея па праву можна назваць Пружаны. Менавіта таму, напярэдадні Дня работнікаў фізічнай культуры і спорту, “Народная трыбуна” ўзгадвае адзін з самых яркіх эпізодаў спартыўнай хронікі  і яе герояў. Юныя хакеісты выйгралі рэспубліканскія спаборніцтвы сярод дзяцей і падлеткаў “Залатая шайба” ў малодшай узроставай групе. А яшчэ запомніліся яны аматарам “лядовых баёў” перамогамі ў такіх спартыўных спаборніцтвах,  як “Белавежская пушча-2011”.
Дарэчы, пружанская каманда “Мухавец” – адна з самых малодшых. У ёй гуляюць спартсмены 1998-1999, а таксама 2000-га  гадоў нараджэння. Якраз 11-гадовыя Эдуард Сіманенка, Валерый Папоў, Яўген Стасюк і Ілья Кандрацюк сталі найбольш папулярнымі і выніковымі ігракамі на турнірах. Цудоўна выступілі капітан Арцём Ліцкевіч і галкіпер Яўген Кот. Сярод чэмпіёнаў “засвяцілася” і дзяўчына Таня Мядзведзева. А да перамог дзіцячую аматарскую каманду вядзе трэнер Дзяніс Хадаровіч.
Залатыя клюшкі юных пружанцаў парадавалі і прымусілі пахвалявацца балельшчыкаў. Ды сваёй мэтанакіраванасцю, стабільнай і ўпэўненай гульнёй гэтыя хакеісты нібыта сцвярджаюць: ёсць будучыня ў беларускага хакея, яшчэ будзе плавіцца лёд ад запалу нашых чэмпіёнаў.
Вольга СВІРЫДОВІЧ, “НТ”.
Фота Аляксандра МЕЛЕША.