Брэст
Натхненне цырульнікаў
24 сакавіка ў Цэнтры маладзёжнай творчасці прайшоў ІІІ абласны конкурс цырульнікаў “Натхненне-2010”, у якім прынялі ўдзел прадстаўнікі практычна ўсіх рэгіёнаў Брэстчыны. Перамогу атрымала каманда Брэсцкага ААТ “Локан”. На другім месцы – цырульнікі Кобрынскага РКБА, на трэцім – Драгічынскага камбіната бытавога абслугоўвання. Лепшым жаночым майстрам прызнана прадпрымальнік з Высокага Валянціна Семянюк, а лепшым мужчынскім – Таццяна Камарова (Драгічынскі КБА).
Брэсцкі раён
Дыплом, прэмія і трэнажор
Учора дырэктар Дамачаўскага інтэрната для састарэлых і інвалідаў Анатоль Ясінскі вярнуўся з Мінска, дзе на калегіі Міністэрства працы і сацыяльнай абароны яму ўручылі дыплом, грашовую прэмію і спартыўны трэнажор. Гэтых узнагарод установа ўдастоена за трэцяе месца ў рэспубліканскім аглядзе на лепшую пастаноўку работы па абслугоўванні, забеспячэнні здаровых і бяспечных умоў пражывання пенсіянераў і інвалідаў і аховы працы работнікаў за 2009 год сярод дамоў-інтэрнатаў для састарэлых і інвалідаў.
Баранавічы
У госці прыйшлі… клоўны
У рамках праекта “Клоўнатэрапія” валанцёры Чырвонага Крыжа правялі дабрачынную акцыю. Разам з сястрой міласэрнасці ў госці да адзінокіх пенсіянераў, якія знаходзяцца пад апекай суполкі, прыйшлі клоўны. Студэнты БарДУ падрыхтавалі падарункі і жартоўныя сюрпрызы. Яны пагутарылі з пенсіянерамі аб праблемах надзённых і падарылі букеты, зробленыя з паветраных шарыкаў.
Баранавіцкі раён
“Terravision” у стылі Лепса
У Доме культуры пасёлка Мір прайшоў першы раённы інтэрактыўны конкурс эстраднай песні “Terravision”. У песенным конкурсе прынялі ўдзел маладыя выканаўцы і вакальныя калектывы. Лепшых шляхам галасавання выбіралі гледачы. Пераможцай стаў работнік Крошынскага ДК Аляксей Вабішчэвіч, які пакарыў публіку выкананнем песень Рыгора Лепса.
Бяроза
Вядомая невядомая суседка
Бярозаўская цэнтральная раённая бібліятэка сумесна з раённай кінавідэасеткай правяла дні польскай культуры. Бліжэй пазнаёміцца з культурай краіны-суседкі бярозаўцы маглі на кніжнай выставе “Прывітанне, Польшча!”, літаратурна-музычных гасцёўнях і паказах фільмаў польскіх рэжысёраў у кінатэатры “Кастрычнік”.
Ганцавічы
Зарапад… юбілеяў
Учора ў райцэнтры адразу тры працоўныя калектывы адсвяткавалі круглыя даты з дня ўтварэння сваіх арганізацый: 70-гадовыя – райаддзел унутраных спраў і КУШВП ЖКГ “Ганцавіцкая РЖКГ”, а 50-гадовую – РВУГГ “Ганцавічырайгаз”. Супрацоўнікаў РАУС асабіста павіншаваў кіраўнік раёна Уладзімір Столяр. Ганаровыя граматы райвыканкама ўручаны калектывам работнікаў жыллёва-камунальнай і газавай гаспадарак.
Драгічын
Спаборнічаюць вясёлыя і знаходлівыя
Сёння на базе першай гарадской школы праходзяць фінальныя гульні КВЗ. За права называцца мацнейшай змагаюцца пераможцы занальных гульняў: каманды другой гарадской школы “Аварыя плюс”, Зарэчкаўскай СШ “Хуткая дапамога”, Драгічынскай гімназіі “Бумеранг” і Хомскай СШ “Біз-міс-мен”. Пераможцу і прызёраў, якія будуць вызначаны па выніках прывітання, размінкі, конкурсу капітанаў і дамашняга музычнага задання, чакаюць узнагароды.
Жабінка
Міна ў горадзе
У аўторак падчас рамонту кабелю амаль у цэнтры горада брыгада электрыкаў раёна электрасетак у выкапанай імі траншэі заўважыла нешта падобнае на выбуховы прадмет. Выкліканая сапёрна-піратэхнічная група з Брэста канстатавала, што гэта міна часоў Вялікай Айчыннай вайны. Небяспечную знаходку сапёры вывезлі на спецыяльны палігон, дзе яе ліквідавалі.
Іванава
Сырны “Прэм’ер” вяртаецца
За велікодны стол з сырным “Прэм’ерам” змогуць сесці не толькі жыхары Іванаўшчыны, але і іншых раёнаў рэспублікі. Пасля капітальнага рамонту аднавіў сваю работу цэх па пераапрацоўцы малака СВК “Прыясельдны”, прадукцыя якога палюбілася спажыўцам за выдатныя смакавыя якасці і прымальныя цэны. Цяпер “Марыца”, “Оскар”, “Прэм’ер” будуць вырабляцца ў сучасных “еўраўмовах”, на стварэнне якіх гаспадарка выдаткавала больш за 350 мільёнаў рублёў.
Івацэвічы
Прызы ад Леаніда Кавалевіча
Сёння на базе Целяханскай сярэдняй школы пройдзе валейбольны турнір. Удзельнічаюць у ім дарослыя мужчынскія каманды. Гэта традыцыйнае спаборніцтва праходзіць на прызы дэпутата Палаты прадстаўнікоў Нацыянальга сходу Рэспублікі Беларусь Леаніда Кавалевіча.