БРЭСТ
Аварыя “пад градусам”
У панядзелак многія жыхары абласнога цэнтра, якія карыстаюцца грамадскім транспартам, спазніліся на работу: рух тралейбусаў зранку быў паралізаваны амаль на дзве гадзіны з-за аварыі на перакрыжаванні вуліц Камсамольскай і Пушкінскай. Тут сутыкнуўся з грузавіком легкавы аўтамабіль “Фольксваген-Пасат”, якім кіраваў п’яны (1,6 праміле алкаголю ў крыві ўжо ў ранішні час!) 19-гадовы жыхар Маларыцкага раёна. Знаходзячыся ў нецвярозым стане, вадзіцель “не заўважыў”, што на святлафоры быў чырвоны сігнал.
БРЭСЦКІ РАЁН
Таямніцы Прыбужскага Палесся
У мінулую суботу ў раённым Доме культуры ў Чэрнях прайшоў фінальны этап трэцяга рэгіянальнага эколага-турыстычнага фестывалю “Таямніцы Прыбужскага Палесся”, у якім удзельнічалі 14 каманд са школ Брэста і раёна. У намінацыі “Фотарэпартаж” усе прызавыя месцы дасталіся прыбужцам – камандам Скокаўскай, Чэрнінскай і Меднаўскай сярэдніх школ. У намінацыі “Сацыяльная рэклама” роўных не было камандзе Дамачаўскай СШ.
БАРАНАВІЧЫ
20 тысяч за пакет
Мінчанін Сяргей Мядзведзеў адсудзіў 20 тысяч рублёў у мясцовага магазіна “Дружба”. Справа ў тым, што прадавец адмовілася даваць яму бясплатны пакет, калі мужчына купіў тут каўбасу, і прапанавала купіць яго за 20 рублёў. Спачатку ён устанавіў кампенсацыю ў памеры 40 тысяч рублёў, аднак суд абавязаў магазін выплаціць 20 тысяч рублёў.
БАРАНАВІЦКІ РАЁН
Засыпала…
Пры разгрузцы вагона на аб’язных пуцях дарожна-будаўнічага ўпраўлення каля вёскі Лесіна загінулі двое рабочых. Па папярэдняй версіі з вагона раптоўна высыпаліся калійныя ўдабрэнні, якія і засыпалі рабочых. Па факце праводзіцца праверка.
БЯРОЗА
Пасвяцілі ў прафесію
У цэнтральнай раённай бальніцы прайшло пасвячэнне ў прафесію маладых спецыялістаў. Сёлета на работу прыйшлі 22 чалавекі. Ва ўрачыстай абстаноўцы малады медперсанал уліўся ў рады дружнага калектыву бальніцы. Для навічкоў было падрыхтавана сапраўднае святочнае шоу з конкурсамі, а пасля наказ маладым дала галоўны ўрач Нэлі Малейціна.
ГАНЦАВІЧЫ
Умее сябраваць і ўмее пісаць
У сталіцы падведзены вынікі інфармацыйнага праекта “Юныя журналісты Беларусі і Расіі пра Саюзную дзяржа-
ву-2011”. У адной з трох намінацый, а менавіта – “Як сябруем мы”, за пісьмо сябру дыплом 1-й ступені прысуджаны вучню 11 “Б” класа гімназіі г. Ганцавічы Раману Рылка.
ДРАГІЧЫН
У Масткі прыехаў агітпоезд
У чацвер у Доме сацыяльных паслуг вёскі Масткі Імянінскага сельсавета было надзвычай шматлюдна. На сустрэчу з прадстаўнікамі службаў раёна прыйшлі і стары, і малы. На пытанні жыхароў вёскі адказалі работнікі ўпраўлення па працы, занятасці і сацыяльнай абароне насельніцтва, РАУС, іншых аддзелаў райвыканкама.
ЖАБІНКА
І па шахматах, і па шашках
У мінулыя выхадныя ў фізкультурна-аздараўленчым комплексе “Бадзёрасць” прайшло асабіста-каманднае першынство раёна па шашках пад дэвізам “Мы – за здаровы лад жыцця” і па шахматах – “Спорт супраць СНІДу”. У агульнакамандным заліку ў абодвух відах перамогу атрымалі спартсмены камбікормавага завода.
ІВАНАВА
Ненавагодні падарунак
13 снежня пункт пропуску “Махро” працаваў у штатным рэжыме, калі ў мікрааўтобусе, які рухаўся транзітам у Расію, падчас правядзення агляду пад капотам у ёмістасці з маторным маслам быў знойдзены пакет з парашком белага колеру. Аказалася, што гэта – наркатычнае рэчыва. У адносінах да грамадзяніна К. узбуджана крымінальная справа па факце кантрабанды і незаконнага абароту наркотыкаў.
ІВАЦЭВІЧЫ
Знаёмімся, прапануем, абмяркоўваем
У сераду ў Івацэвічах прайшла сустрэча членаў саветаў моладзі пры гарпассельвыканкамах. Новае фарміраванне павінна стаць каардынатарам работы з моладдзю па месцапражыванні. Удзел у семінары-знаёмстве прынялі намеснік старшыні райвыканкама Аляксандр Велікаселец, начальнік аддзела па справах моладзі Аксана Юхнік і кіраўнік райкама прафсаюза работнікаў АПК і раённай суполкі ГА “Белая Русь” Ірына Краўчук.
КАМЯНЕЦ
Вялікаму палкаводцу прысвячаецца
“Маршал Жукаў. Якім мы яго памятаем?” – выстава пад такой назвай працуе ў раённай бібліятэцы імя У. Ігнатоўскага. Прысвечана яна 115-годдзю з дня нараджэння вялікага палкаводца. Наведаўшы выставу, жыхары і госці горада змогуць пазнаёміцца з літаратурай пра вядомага ваеннага дзеяча, з яго трохтомнікам успамінаў і разважанняў.
КОБРЫН
Знішчылі завод. Самагонны
У мінулую суботу супрацоўнікі міліцыі ў лесе каля пасёлка Арэхаўскі выявілі падпольны самагонны міні-завод. Абсталяванне і дзве тоны самагоннай брагі знішчаны.
ЛУНІНЕЦ
На прыём да адваката
У аўторак адвакаты раённай юрыдычнай кансультацыі правялі прыём грамадзян у Гарадоцкім сельвыканкаме. Аналагічныя кансультацыйныя мерапрыемствы таксама запланаваны да канца снежня: 20-га – у Багданаўскім, а 27-га – у Лахвенскім сельвыканкамах. Каб трапіць на прыём і атрымаць кампетэнтную параду спецыялістаў, варта загадзя запісацца па тэлефоне 3-13-54.
ЛЯХАВІЧЫ
“Ратуйце! Гарым!..”
У сувязі з тым, што з канца лістапада пачасціліся пажары і ў агні загінулі 5 чалавек, у сераду раённы аддзел па надзвычайных сітуацыях правёў адзіны дзень прафілактыкі. Супрацоўнікі аддзела ў чарговы раз наведалі аматараў алкаголю, праблемныя сем’і, якія жывуць на тэрыторыі Альхоўскага і Падлескага сельскіх Саветаў, праверылі пячное ацяпленне ў іх хатах і патлумачылі, як трэба сябе паводзіць у быце, каб потым не тэлефанаваць па нумары 101: “Ратуйце! Гарым!..”
МАЛАРЫТА
Пытанні міністру
Напрыканцы мінулага тыдня раён наведаў міністр сувязі і інфарматызацыі Рэспублікі Беларусь Мікалай Панцялей. Госць са сталіцы сустрэўся з кіраўніцтвам раёна, пабываў у ААТ “Маларыцкі кансерваваагароднінасушыльны камбінат”, раённых вузлах паштовай і электрычнай сувязі, дзе пацікавіўся праблемамі супрацоўнікаў, адказаў на іх пытанні.
ПІНСК
Маршрут №23
Пераднавагоднія падарункі ўжо атрымліваюць пінчане. Так, адкрытае акцыянернае таварыства “Пінскі аўтобусны парк” пачало транспартнае абслугоўванне мікрараёна Вясёлкавы. Для паслуг пасажыраў вызначаны маршрут №23. Для зручнасці людзей уведзены тры новыя прыпынкі: два – на вуліцы Шапашнікава і адзін – на вуліцы Сонечнай.
ПІНСКІ РАЁН
“Крок насустрач”
Так назвалі раённы фестываль дзіцячай творчасці, удзел у якім прынялі дзеці з асаблівасцямі псіхафізічнага развіцця. Учора фэст, арганізаваны цэнтрам карэкцыйна-развіваючага навучання і рэабілітацыі, прайшоў у Пінкавічах. У ім удзельнічалі 15 устаноў адукацыі раёна. Пераможцы і прызёры атрымалі дыпломы і граматы аддзела адукацыі райвыканкама, а ўсе ўдзельнікі творчай імпрэзы – падарункі.
ПРУЖАНЫ
Справы маладзёжныя
На базе раёна 15 – 16 снежня прайшло пасяджэнне абласнога каардынацыйнага савета па справах моладзі. Яго ўдзельнікі пазнаёміліся з формамі рэалізацыі дзяржаўнай маладзёжнай палітыкі на Пружаншчыне, работай аддзела па справах моладзі райвыканкама, узаемадзеяннем розных структур па прапагандзе здаровага ладу жыцця ў маладзёжным асяродку, рабоце з маладымі спецыялістамі, арганізацыі заняткаў па інтарэсах. Сярод пытанняў, разгледжаных на пленарным пасяджэнні, – арганізацыя дзейнасці па прафілактыцы правапарушэнняў і злачынстваў сярод моладзі, арганізацыя другаснай занятасці маладых, развіццё міжнароднага супрацоўніцтва.
СТОЛІН
Заслужаны юбіляр
70-годдзе адзначыў Мікалай Сапон, які ў 90-х працаваў намеснікам старшыні райвыканкама і курыраваў сацыяльную сферу Століншчыны. З юбілеем Мікалая Максімавіча павіншавалі не толькі блізкія людзі, але і былыя калегі. Першы намеснік старшыні райвыканкама Рыгор Пратасавіцкі асабіста ўручыў імянінніку грамату райвыканкама, яшчэ адну Мікалай Сапон атрымаў ад раённага савета ветэранаў.