Нават прафесійнае свята работнікі кінаіндустрыі правядуць у працоўных клопатах
Летапіс нацыянальнага кінематографа прынята весці ад 17 снежня 1924 года. Менавіта ў гэты зімовы дзень на свет з’явілася новая структура – дзяржаўнае ўпраўленне па справах кінематаграфіі і фатаграфіі “Белдзяржкіно”, а праз некаторы час – і студыя “Савецкая Беларусь”. Сёння яна вядома кінааматарам пад назвай “Беларусьфільм”.
Кінапраекты з маркіроўкай “зроблена ў Беларусі” знайшлі сваіх прыхільнікаў і сярод брастаўчан. Штогадова абласны кінавідэапракат арганізоўвае прэм’ерныя паказы 3-4 новых стужак айчыннай вытворчасці. На вялікім экране на “ўра” прайшлі папулярныя нацыянальныя кінахіты апошняга часу: “Брэсцкая крэпасць” Аляксандра Кота, “Масакра” Андрэя Кудзіненкі, “Ваўкі” Аляксандра Колбышава. Ну, а лідарам па колькасці наведвальнікаў прызнаны фільм “Зграя” рэжысёра Дзмітрыя Зайцава. Па словах Зінаіды Алексяевіч, намесніка генеральнага дырэктара КУП “Брэстаблкінавідэапракат”, пачынаючы з 2008-га карціну паглядзелі каля 50 тысяч чалавек.
Дарэчы, большасць работнікаў індустрыі (а іх у вобласці каля 400), нават сваё прафесійнае свята правядуць у працоўных клопатах. Напрыклад, толькі ўчора ў брэсцкім кінатэатры “Беларусь” адбылося ўрачыстае шанаванне лепшых у галіне, а ўжо сёння да знамянальнай даты запланаваны тэматычныя паказы айчыннага кіно. Словам, з карабля на баль – толькі наадварот! У святочны дзень аматары паўцёмных кіназалаў разам з добра вядомымі фільмамі мінулых гадоў пабачаць і новыя стужкі: меладраму “На ростанях” Віталя Дудзіна і дзіцячую камедыю Алены Туравай “Рыжык у залюстэр’і ”.
Дарэчы, апошні фільм новы кіраўнік КУП “Брэстаблкінавідэапракат” Вячаслаў Шахлевіч ужо пазначыў арэолам сваёй прыхільнасці. Ён прызнаўся: як чалавек сямейны шчыра сімпатызуе дзіцячаму кіно, бо яно выхоўвае падрастаючае пакаленне на ідэалах дабрыні, сяброўства, міласэрнасці, спагады.
Акрамя таго, для папулярызацыі нацыянальнага кіно ў вобласці рэгулярна арганізоўваюцца шматлікія тэматычныя акцыі і творчыя сустрэчы. Напрыклад, згаданы фільм “Рыжык…” у Брэсце прэзентавала рэжысёр Алена Турава разам з актрысай Нікай Шылкоўскай. У Пінску са стужкай “На ростанях” гледачоў пазнаёмілі выканаўцы галоўных роляў Вераніка Пляшкевіч і Андрэй Сенькін, які, дарэчы, сам ураджэнец горада над Пінай.
– Кіруючыся народнай мудрасцю “рыхтуй сані летам, а калёсы – зімой”, ужо сёння абдумваем правядзенне VIII Рэспубліканскага фестывалю беларускіх фільмаў, які пройдзе ў верасні, – расказвае Вячаслаў Шахлевіч. – А наконт бліжэйшай будучыні: кінааматараў Брэстчыны чакае прэм’ера навагодняй камедыі “Ёлкі-2”, якая стартавала ў чацвер у кінатэатры “Беларусь”. Таксама пакажам доўгачаканыя стужкі “Змярканне. Сага. Світанак”, “Місія невыканальная: пратакол Фантом”, “Аб чым яшчэ гавораць мужчыны”. Набліжаюцца навагоднія святы, таму да віншаванняў работнікам кінаіндустрыі варта дадаць і пажаданні добрага настрою ўсім берасцейцам. А КУП “Брэсткінавідэапракат” дапаможа вам яго стварыць!
Ніна ЛЕАНАВЕЦ, “НТ”.
“Зроблена ў Беларусі”
