Навіны рэгіёнаў

БРЭСТ
Лагістыка ў комплексе
Транспартна-лагістычны цэнтр “Брэст-Белмытнясэрвіс” адкрыўся 20 верасня ў абласным цэнтры. Тут створаны ўсе ўмовы для аказання поўнага комплексу паслуг у галіне мытнай, транспартна-экспедыцыйнай, складской і інфармацыйнай лагістыкі. Ва ўрачыстасцях, прысвечаных гэтай падзеі, прынялі ўдзел старшыня аблвыканкама Канстанцін Сумар, старшыня Дзяржаўнага мытнага камітэта Аляксандр Шпілеўскі, старшыня Дзяржпагранкамітэта Ігар Рачкоўскі, міністр транспарту і камунікацый Іван Шчэрба.
БРЭСЦКІ РАЁН
“Горка!”
У Чэрнях адкрылася зала для ўрачыстай рэгістрацыі шлюбу. Тут праводзіўся капітальны рамонт, які значна змяніў і палепшыў яе знешні выгляд. Першую пару маладых зарэгістравалі ў мінулую суботу.  Дзмітрыя Ясінскага і Людмілу Актысюк павіншавалі начальнік раённага аддзела ЗАГС Вікторыя Саколікава і старшыня сельвыканкама Сяргей  Саўчук. На памяць  аб гэтым святочным дні яны ўручылі маладажонам спецыяльны падарунак ад райвыканкама.
БАРАНАВІЧЫ
За крок да “Міс”
Ураджэнка райцэнтра Аксана Саўко заваявала тытул “Першай віцэ-міс” на чацвёртым конкурсе прыгажосці “Міс Мінск–2011”. Наша зямлячка ўступіла карону пераможцы Ульяне Валахоўскай, аднак 19-гадовая мадэль лічыць, што самыя гучныя яе перамогі – яшчэ наперадзе.
БАРАНАВІЦКІ РАЁН
Наваселле ў лясніцтве
У Палонкаўскім лясніцтве адкрыты новы адміністрацыйны будынак. Ён адпавядае ўсім сучасным патрабаванням.Працоўныя месцы абсталяваны камп’ютарнай тэхнікай. Дарэчы, такі падарунак леснікі атрымалі акурат у сваё прафесійнае свята.
БЯРОЗА
Лавіся, рыбка, і прадавайся!
ААТ “Вопытны рыбгас “Сялец” пачало восеньскую лоўлю рыбы і яе продаж. Сёлета прадпрыемства плануе рэалізаваць 2,7 тысячы тон прадукцыі, у тым ліку 80 тон рыбы каштоўных відаў, што на 80 працэнтаў больш, чым у 2010 годзе.
ГАНЦАВІЧЫ
За спакойную сям’ю
Ва ўстановах адукацыі раёна праходзіць акцыя “Шчаслівая сям’я”, накіраваная на папярэджанне сямейных канфліктаў  і правапарушэнняў сярод непаўналетніх. Арганізаваны комплексныя прафілактычныя мерапрыемствы найперш для сем’яў, дзе ёсць цяжкія падлеткі. Бацькам раздаюць інфармацыйныя буклеты па пытаннях сямейнага выхавання, праводзяцца конкурсы і святы з удзелам бацькоў і дзяцей, праходзяць пасяджэнні сямейных клубаў.
ДРАГІЧЫН
З першых вуснаў
У сераду Жабер запланавана  наведалі госці з райцэнтра. У невялікай вёсцы пражывае 85 чалавек, з іх 60 – пенсіянеры. Дапамагчы жыхарам у вырашэнні жыццёвых і бытавых праблем пастараліся спецыялісты аддзела пенсій  упраўлення па працы, занятасці і сацыяльнай абароне насельніцтва райвыканкама, а таксама медыкі, прадстаўнікі раённага аддзела па надзвычайных сітуацыях і мясцовага сельскагаспадарчага прадпрыемства.
ЖАБІНКА
Бульба для пенсіянераў
Пра пажылых жыхароў горада паклапаціліся работнікі раённага цэнтра сацыяльнага абслугоўвання насельніцтва: нарыхтавалі для іх 5,5 тоны бульбы. Сацыяльнае таксі даставіла гэтую прадукцыю дадому кожнаму з 27-мі адзінокіх пенсіянераў, якія знаходзяцца на надомным абслугоўванні.
ІВАНАВА
І стратэгія, і тактыка
Начальнік УУС аблвыканкама генерал-маёр  Уладзімір Сычэўскі прыняў удзел у пашыраным пасяджэнні райвыканкама. Асноўная прычына візіту кіраўніка абласной міліцыі – трывожная статыстыка росту правапарушэнняў у Іванаўскім раёне. А галоўная мэта –  выпрацаваць дзейсную стратэгію і тактыку дзеянняў для таго, каб кардынальна змяніць сітуацыю да лепшага.
ІВАЦЭВІЧЫ
Моладзь у прадпрымальніцтве
У рамках праекта “Уключайся!”, які сумесна праводзяць Беларускі рэспубліканскі саюз моладзі і ААТ “Белаграпрамбанк”, у райцэнтры прайшоў семінар-вучоба па падтрымцы і развіцці прадпрымальніцтва сярод моладзі. Спецыялісты сферы занятасці, падатковых органаў, аддзела эканомікі райвыканкама і прадстаўнікі “Белаграпрамбанка” расказалі пра перспектывы малога бізнесу ў рэгіёне, падказалі, як зрабіць правільна першыя крокі ў прадпрымальніцтве, паведамілі пра падтрымку бізнес-ініцыятыў.
КАМЯНЕЦ
Школьны злёт
У гэтыя выхадныя прускаўскі лес прымае традыцыйны раённы турыстычны злёт школьнікаў. У ім удзельнічаюць вучні 5-11 класаў з 18-ці школ. Арганізатары злёту – Камянецкі дзяржаўны цэнтр турызму і краязнаўства і аддзел адукацыі райвыканкама – унеслі ў праграму, акрамя традыцыйнай спартыўнай часткі, спаборніцтвы па арыентаванні і краязнаўстве.
КОБРЫН
Прыпіскі не дапамаглі…
19 верасня супрацоўнікі аддзялення па барацьбе з эканамічнымі злачынствамі мясцовага райаддзела ўнутраных спраў і ўпраўлення ведамаснага кантролю аблвыканкама пры праверцы асваення льготных крэдытаў у СВК “Узыходзячая зара” выявілі, што адно з закрытых акцыянерных таварыстваў дапусціла завышэнне кошту работ на рамонце дзіцячага садка і адміністрацыйнага будынка ў вёсцы Хідры, а таксама на будаўніцтве трох аднакватэрных жылых дамоў у вёсцы  Каташы. Агульная сума прыпісак склала больш за 45,6 мільёна рублёў. Дарэчы, незаконна прысвоеныя грошы ўжо вернуты сельгаскааператыву.
ЛУНІНЕЦ
Танцы з “Фантазіяй”
У аўторак адбыўся канцэрт тэатра танца “Фантазія”. У гарадскім Доме культуры брэсцкія артысты паказалі гледачам праграму “Кабарэ-шоу”. Нагадаем: творчы калектыў пакарыў феерычнай харэаграфіяй не толькі сваіх суайчыннікаў, але і замежных прыхільнікаў мастацтва. Тэатр пастаянна гастралюе, набывае славу.
ЛЯХАВІЧЫ
Заўсёды гатовы!
У райцэнтры на плошчы Перамогі ўрачыста прынялі ў піянеры пяцікласнікаў навучальных устаноў раёна. З прывітальным словам да школьнікаў звярнуліся начальнік аддзела па справах моладзі райвыканкама Алег Траццяк і першы сакратар раённага камітэта ГА “БРСМ” Ларыса Юшкевіч. Яны выказалі спадзяванне, што новыя члены суполкі стануць актыўнымі піянерамі і вырастуць годнымі патрыётамі сваёй рэспублікі.
МАЛАРЫТА
Пытанні дэпутату
20 верасня ў райвыканкаме выязны прыём грамадзян правяла дэпутат Палаты прадстаўнікоў Нацыянальнага сходу Рэспублікі Беларусь Ніна Федарук. Асноўныя пытанні тычыліся добраўпарадкавання кватэр, дамоў і прысядзібных участкаў, прадпрымальніцкай дзейнасці. Падобныя мерапрыемствы ў населеных пунктах право-дзяцца штомесяц, і кожны жыхар на такой сустрэчы можа ўзняць хвалюючую яго тэму.
ПІНСК
Золата – у “Забіякі”
Новы выраб Пінскага хлебазавода – кекс “Забіяка” высока ацанілі на галіновым рэспубліканскім аглядзе якасці хлебабулачнай прадукцыі “Ласунак-2011”. Эксперты прысудзілі ласунку пінскіх хлебапёкаў залаты медаль.
ПІНСКІ РАЁН
Ад намераў – да спраў
Да ліку сяброў Піншчыны далучыліся гміны Дрэлюў і Мендзыжэц-Падляскі. Прадстаўнікі Люблінскага ваяводства пабывалі ў раёне і падпісалі з беларускім бокам дагавор аб супрацоўніцтве. Дасягнута пагадненне аб рэалізацыі агульных праграм у галіне будаўніцтва, навукова-тэхнічнага партнёрства. Вырашана сумесна паўдзельнічаць у конкурсе праектаў праграмы Еўрасаюза па трансгранічным супрацоўніцтве, каб атрымаць фінансавую падтрымку на будаўніцтва ачышчальных збудаванняў.
ПРУЖАНЫ
Агледзіны Мельпамены
У райцэнтры прайшоў занальны агляд тэатральных калектываў, на якім адбіраліся ўдзельнікі для  фестывалю “Тэатральнае Палессе–2011”. Выдатныя водгукі атрымалі артысты-аматары Палаца культуры з Пружан. У рэпертуары калектыву – творы розных аўтараў, а на абласны фэст пружанцы павязуць “Сялянскую камедыю” па п’есе Уладзіміра  Рудава.
СТОЛІН
Пакаранне за рэўнасць
7 гадоў пазбаўлення волі атрымаў мясцовы жыхар, які задушыў жонку… бюстгальтарам. Днямі прысуд, вынесены 55-гадоваму мужчыне, уступіў у сілу. Сталінчанін раней асуджаны не быў, спіртнымі напіткамі не злоўжываў. Следствам устаноўлена: ён пастаянна раўнаваў сваю жонку, хаця падстаў для гэтага не было.