БРЭСТ
Каб стрэльба не выстраліла
15 лістапада пры збыце абрэза паляўнічай стрэльбы супрацоўнікі УКДБ па Брэсцкай вобласці затрымалі 35-гадовага брастаўчаніна. Па гэтым факце ўзбуджана крымінальная справа. Дзеючым заканадаўствам за незаконны збыт агнястрэльнай зброі, боепрыпасаў і выбуховых рэчываў прадугледжана пакаранне да 6 гадоў пазбаўлення волі з канфіскацыяй маёмасці.
БРЭСЦКІ РАЁН
Разумнікі з Чарнаўчыц
Напрыканцы мінулага тыдня адбыўся раённы чэмпіянат гульні “Што? Дзе? Калі?” сярод каманд сярэдніх школ. У выніку ўпартай барацьбы першае месца і права абараняць гонар Прыбужжа на абласным турніры па інтэлектуальных гульнях атрымала каманда Чарнаўчыцкай сярэдняй школы. На другім месцы – інтэлектуалы з Астрамечаўскай, на трэцім – з Меднаўскай СШ.
БАРАНАВІЧЫ
Творчае шчасце
Мастацкі дэбют вядомага дакументаліста і ўраджэнца Баранавіч Сяргея Лазніцы – фільм “Шчасце маё” – перамог у конкурсе за “Найлепшы еўрапейскі дэбют” на XVI Еўрапейскім форуме “Cinergia” ў польскай Лодзі. Акрамя ўзнагароды “Крыштальная лодка” пераможца атрымаў грашовую прэмію – 10 тысяч злотых.
БАРАНАВІЦКІ РАЁН
Пераабуўся? Трымай наклейку!
Супрацоўнікі раённай Дзяржаўтаінспекцыі правялі акцыю “Я пераабуўся ў зімовую гуму”. Асноўная мэта мерапрыемства – нагадаць вадзіцелям змяніць “абутак” свайму аўтамабілю. Тым, хто гэта ўжо зрабіў, інспектары ДАІ ўручылі спецыяльныя наклейкі на машыны.
БЯРОЗА
Рыба на экспарт
Рыбгас “Сялец” пашырае геаграфію экспарту ў Еўрасаюз. Пачаты перамовы аб пастаўках прадукцыі ў Бельгію, Чэхію і Прыбалтыку. Разам з тым павялічаны экспарт у Расійскую Федэрацыю.
ГАНЦАВІЧЫ
Дапамаглі… сцены?
На гэтым тыдні ў спецыялізаванай дзіцяча-юнацкай школе алімпійскага рэзерву прайшло адкрытае першынство сярод юнакоў і дзяўчат па вольнай барацьбе. Акрамя ганцаўчан у ім удзельнічалі рабяты з Бярозы і Клецка. Сярод пераможцаў было нямала мясцовых выхаванцаў. Так, у юнакоў узроставай групы 1997-1998 гадоў нараджэння ў розных вагавых катэгорыях першыя месцы занялі Іван Мацукевіч, Аляксандр Шкуратэнка і Дзмітрый Руднікевіч. А сярод іх равесніц-дзяўчат вылучылася Алена Саладуха. Парадавалі балельшчыкаў і Ягор Матуліс, Мікалай Ярашэвіч 2000-2001 гадоў нараджэння.
ДРАГІЧЫН
Памяці Яўгена Сушко
У мінулую суботу адбылося адкрытае першынство раёна па дзюдо на прызы памяці воіна-інтэрнацыяналіста Яўгена Сушко. У спаборніцтвах, якія праходзілі пад дэвізам “За моцную квітнеючую Беларусь”, удзельнічалі навучэнцы спартыўных школ з Драгічына, Пінска, Брэста, Кобрына, Івацэвіч. З 90 дзюдаістаў пераможцамі ў розных вагавых катэгорыях сталі 13 чалавек – 9 хлопчыкаў і 4 дзяўчынкі.
ЖАБІНКА
Дзве кнігі паэта
У брэсцкім выдавецтве “Альтэрнатыва” толькі што выйшлі адна за адной дзве кнігі жабінкаўскага паэта Івана Дацкевіча (дарэчы, пастаяннага аўтара “Народнай трыбуны”). У першай кнізе “Принимаю жизнь, как чудо!” сабраны вершы на рэлігійныя тэмы. Другі ж зборнік “Возвращение” складаецца з самых лепшых лірычных твораў, афарызмаў і гумару.
ІВАНАВА
Лепшыя ў рэспубліцы
Ніна Смоляк, Аляксандр Міснік, Іван Грынь з СВК “Снітава-Агра” сталі пераможцамі рэспубліканскага конкурсу прафесійнага майстэрства работнікаў па штучным асемяненні жывёл, які прайшоў у Віцебску. Яны адзначаны дыпломамі Міністэрства сельскай гаспадаркі Рэспублікі Беларусь і грашовымі ўзнагародамі.
ІВАЦЭВІЧЫ
Адукацыйны рэйд
На вуліцы райцэнтра выйшлі члены маладзёжнай арганізацыі юных выратавальнікаў-пажарных, каб яшчэ раз прыцягнуць увагу дарослых да праблем здароўя і пажарнай бяспекі. Школьнікі наладзілі акцыю “Не прапальвай сваё жыццё!”. Некалькі гадзін валанцёры правялі ў гарадскіх аўтобусах, дзе займаліся тлумачальнай работай з пасажырамі, раздавалі буклеты і памяткі на супрацьпажарную тэматыку.
КАМЯНЕЦ
Парадавалі юныя фалькларысты
У цэнтры дадатковай адукацыі дзяцей і моладзі горада Высокае прайшоў раённы фальклорны фестываль “Спадчына”, у якім удзельнічалі дзіцячыя калектывы ўстаноў адукацыі Камянеччыны. Школьнікі паказалі старажытныя абрады, выканалі песні і танцы. У фестывалі прынялі ўдзел узорныя фальклорныя калектывы “Катрынка” і “Белавежская цывінка”, а таксама “Крыніца” з Рэспублікі Польшча.
КОБРЫН
Малюнкі на камп’ютары
Падведзены вынікі пятага раённага конкурсу камп’ютарных малюнкаў. У ім прынялі ўдзел 125 вучняў пачатковых класаў з 22-х школ Кобрыншчыны. Пераможцамі сталі першакласніца сярэдняй школы №2
Марыя Гарудка, другакласнікі Аляксандр Бінько (СШ №6) і Мікола Астапчук (СШ №8), вучаніца 3 класа СШ №6 Лізавета Казак і вучань 4 класа гэтай жа школы Яўген Бінько.
ЛУНІНЕЦ
Вярнулі ў старое… рэчышча
Завяршылася рэканструкцыя натуральнага рэчышча ракі Цна на тэрыторыі заказніка “Сярэдняя Прыпяць”. Яна праходзіла ў рамках праекта ПРААН/ГЭФ “Стварэнне ўмоў для ўстойлівага захавання ахоўных водна-балотных угоддзяў у Беларускім Палессі”. Каб захаваць біяразнастайнасць, раку накіравалі ў яе старое рэчышча – такога ў нашай краіне яшчэ не рабілі. Для гэтага была пабудавана спецыяльная пераліўная дамба.
ЛЯХАВІЧЫ
Наконт здароўя параіліся з міністрам
У сераду міністр аховы здароўя Рэспублікі Беларусь Васіль Жарко правёў у райвыканкаме прыём грамадзян. Пытанні ляхавіччан тычыліся пераразмеркавання, атрымання накіраванняў у абласныя і рэспубліканскія медустановы, прызначэння групы інваліднасці, набыцця лекаў па льготных рэцэптах… Кожны з 15 заяўнікаў атрымаў поўны адказ ці тлумачэнне ад міністра. Затым Васіль Жарко наведаў цэнтральную раённую бальніцу і паліклініку.
МАЛАРЫТА
Пераможныя 11
У шчаслівую, як многія палічылі, дату 11.11.11 на Маларытчыне не толькі бралі шлюб і загадвалі жаданні. Каманды сельгаспрадпрыемстваў раёна ў гэты дзень сабраліся на базе спартыўнага комплексу “Жамчужына”, каб паўдзельнічаць у спартакіядзе, прымеркаванай да Дня работнікаў сельскай гаспадаркі і перапрацоўчай прамысловасці АПК. Пераможнай своеасаблівая дата стала для каманды СВК “Хаціслаўскі”, якая заняла першае месца. Другое і трэцяе падзялілі спарт-смены з СВК “Чырвоны партызан” і “Чарняны”.
ПІНСК
Кубак сталіц свету – наш!
Хоць горад над Пінай і не сталіца па сваім адміністрацыйным статусе, але Кубак сталіц свету ў Пінск прывезлі. І ўсё – дзякуючы майстэрству Дзмітрыя Грачова. Выхаванец пінскага клуба каратэ-до “Эдэльвейс” заваяваў галоўны прыз і вялікі залаты медаль у асабістым заліку на 4-м Міжнародным турніры па ўсестылявым каратэ “Кубак сталіц свету – “Маскоўскія зоркі”. Маскоўскі цэнтр баявых мастацтваў стаў сведкам трыумфальнага выступлення нашага майстра спорту міжнароднага класа: Дзмітрый перамог ва ўсіх баях і не пакінуў шансаў на чэмпіёнскі тытул нікому са сваіх славутых замежных сапернікаў.
ПІНСКІ РАЁН
Ставоцкія інтэлектуалы
У чацвёрты раз школьнікі раёна ўдзельнічалі ў сінхронным абласным турніры па гульні “Што? Дзе? Калі?”. Сярод 28 каманд, якія правяралі на працягу трох гадзін свае інтэлектуальныя здольнасці, найлепшы вынік паказалі знатакі Ставоцкай сярэдняй школы. Ім журы і прысудзіла галоўны прыз – драўляную саву.
ПРУЖАНЫ
Аб’яднаныя турызмам
Учора ў раёне пабывала дэлегацыя членаў праўлення аб’яднання самакіраванняў Еўрарэгіёна “Белавежская пушча”. Госці з Гайнаўскага павета разам з калегамі з Камянецкага і Свіслацкага раёнаў, прадстаўнікамі консульстваў Польшчы ў Брэсце і Гродна абмеркавалі патэнцыял турыстычнай інфраструктуры Пружаншчыны і сумесныя праекты ў галіне развіцця турызму з выкарыстаннем магчымасцей Еўрарэгіёна “Белавежская пушча”.
СТОЛІН
Пракансультаваліся ў Альманах
У Альманскай сярэдняй школе прайшоў кансультацыйны семінар “Зніжэнне і папярэджанне рызыкі, павышэнне бяспекі сельскагаспадарчай прадукцыі ў прыватным сектары на тэрыторыях, якія пацярпелі ў выніку катастрофы на ЧАЭС”. Яго ўдзельнікам расказалі пра радыелагічны кантроль, тэхналогіі вытворчасці і перапрацоўкі сельгаспрадукцыі і іншае. Мясцовыя жыхары і іх суседзі з Белавушы змаглі зрабіць аналіз прадукцыі на ўтрыманне радыенуклідаў.