БРЭСТ
Са старонак сямейных альбомаў
У аўторак у музеі “Выратаваныя мастацкія каштоўнасці” адкрылася новая выстава брастаўчанкі Таццяны Мухароўскай. У экспазіцыі – 70 фотаздымкаў з яе аўтарскага праекта “Брэст на старонках сямейных альбомаў”. Яны расказваюць аб тым, як выглядалі ў пачатку мінулага стагоддзя вуліцы, алеі, скверы і паркі Брэста, дзе і сёння любяць гуляць гараджане і госці горада над Бугам. Выстава будзе працаваць да 8 верасня.
БРЭСЦКІ РАЁН
Супраць п’янства – грамадой
У аўторак на базе Матыкальскага сельсавета адбылося выязное пасяджэнне раённага савета прафілактыкі, у якім прынялі ўдзел старшыня райвыканкама Уладзімір Мацука і пракурор вобласці Сяргей Хмарук. Яго ўдзельнікі азнаёміліся з работай мясцовага грамадскага пункта аховы правапарадку і грамадскіх фарміраванняў па прафілактыцы злачынстваў і правапарушэнняў, папрысутнічалі на пасяджэнні камісіі па барацьбе з п’янствам і алкагалізмам у РУСП “СГЦ “Заходні”. На пленарным пасяджэнні падведзены вынікі работы па барацьбе з п’янствам і алкагалізмам у раёне.
БАРАНАВІЧЫ
Аўтобусы вярнуліся
Пасля заканчэння рамонту ўчастка вуліцы 50 год БССР адноўлены рух грамадскага транспарту ў мікрараёне Бараўкі. З 20 ліпеня на свае маршруты выйшлі аўтобусы №№2,4,15,18,28. Усе рэйсы, акрамя 28-га маршруту, ажыццяўляюцца па старым раскладзе.
БАРАНАВІЦКІ РАЁН
Часночная серыя
Незвычайныя крымінальныя справы ўзбуджаны 19 ліпеня раённым аддзелам унутраных спраў. Міліцыя шукае злачынцаў, што ўкралі амаль 45 кілаграмаў часнаку з градак ў дачным таварыстве каля вёскі Альсевічы. Зафіксавана чатыры эпізоды часночнай серыі крадзяжоў. Аматараў карыснай культуры шукаюць.
БЯРОЗА
Веласіпед, байдарка, творчасць
10 каманд прынялі ўдзел у 8-м турыстычным злёце працоўнай моладзі раёна на Белым возеры. Удзельнікі спаборнічалі ў спартыўным арыентаванні, тэхніцы пешаходнага турызму, фігурным ваджэнні веласіпеда, водным турызме на байдарках, а таксама ў творчых конкурсах. У агульнакамандным заліку пермагла каманда райвыканкама.
ГАНЦАВІЧЫ
Вышэйшы ўзровень
Аддзел адукацыі райвыканкама падвёў вынікі цэнтралізаванага тэсціравання выпускнікоў. Аказалася, што па 12 прадметах сярэдні бал ганцаўчан вышэй абласнога і рэспубліканскага паказчыкаў. Атэстат аб заканчэнні сярэдняй школы сёлета тут атрымалі 337 юнакоў і дзяўчат. Самыя высокія балы – у былых гімназістаў.
ДРАГІЧЫН
Удачныя раскопкі
Раскопкі, якія спецыялісты СП “Крэда-Дыялог” і РУП “Белаэракосмагеадэзія” Дзяржаўнага камітэта па маёмасці Рэспублікі Беларусь вялі на тэрыторыі раёна, завяршыліся на гэтым тыдні знаходкай яшчэ аднаго геадэзічнага пункта Дугі Струвэ. Ён выяўлены ў вёсцы Белін Асавецкага сельсавета. Дуга Струвэ працягласцю 2820 кіламетраў уяўляе сабой сетку з 265 геадэзічных пунктаў – мураваных кубоў памерам 2х2 метры, закладзеных у зямлю. Рашэннем Камітэта сусветнай спадчыны ЮНЕСКА геадэзічная Дуга Струвэ ў 2005 годзе занесена ў Спіс сусветнай спадчыны ЮНЕСКА.
ЖАБІНКА
Прафілактыка для бацькоў
У чацвер прадстаўнікі аддзелаў унутраных спраў, адукацыі і аховы здароўя райвыканкама ў рамках акцыі “Сям’я без насілля” наведалі праблемныя сем’і ў вёсках Хмелева, Сакалова, Сакі і Падлессе. З бацькамі праведзены прафілактычныя гутаркі.
ІВАНАВА
Турысты-актывісты
Удзельнікамі міжраённага турыстычнага злёту былі старшыні саветаў моладзі і сакратары пярвічных арганізацый ГА “БРСМ” Драгічыншчыны і Іванаўшчыны. За два дні маладзёжныя актывісты двух раёнаў змаглі не толькі пазнаёміцца і добра адпачыць, але і абмяняцца вопытам работы ў сваіх калектывах, прыняць удзел у спартыўных спаборніцтвах.
ІВАЦЭВІЧЫ
35-е лета завода
35 гадоў з дня заснавання споўнілася мясцоваму заводу жалезабетонных вырабаў. Зараз канкурэнтаздольнае прадпрыемства ўзначальвае Валянцін Канашук, а працоўны штат завода налічвае звыш 300 чалавек. Па выніках раённага спаборніцтва сярод прамысловых прадпрыемстваў за мінулы год калектыў завода-юбіляра атрымаў Ганаровы пераходны сцяг, грамату райвыканкама і грашовую прэмію.
КАМЯНЕЦ
Памянялі Машу
У Нацыянальным парку “Белавежская пушча” па рэалізацыі плана аднаўлення экскурсійных вальераў праведзена замена самкі мядзведзя. Старая па мянушцы Маша перададзена ў Мінскі заапарк, а на яе месца з сялянскай фермерскай гаспадаркі з-пад Бабруйска завезена аднагадовая мядзведзіца. Набылі яе па бартары: узамен мядзведзіцы і ваўка фермер атрымаў пару высакародных аленяў.
КОБРЫН
Парадак – узорны
Падведзены вынікі конкурсу на ўзорны санітарны стан і добраўпарадкаванне горада. У намінацыі “Пад’езд узорнага парадку” лепшым прызнаны пад’езд №1 жылога дома №105 па вуліцы Дзяржынскага (старшая Таццяна Канавалава), у намінацыі “Двор узорнага парадку” адзначаны двор дома №104 па вуліцы Настасіча (старшыня дамавога камітэта Дар’я Любіч), а ў намінацыі “Лепшае добраўпарадкаванне прыватнага падвор’я” пераможцай названы дом №19 па вуліцы Паляўнічай (гаспадар Сяргей Назарук). Усім пераможцам на Дні горада ўручаны граматы райвыканкама.
ЛУНІНЕЦ
Самыя творчыя бібліяманы
Раённы агляд-конкурс “Бібліятэка – тэрыторыя творчасці” назваў імёны пераможцаў. Лепшымі прызнаны работы чытачоў Віталя Цішанінава, Алены Наварыч і Марты Цішко. Сярод прафесіяналаў бібліятэчнай справы за добрую арганізацыю творчай дзейнасці адзначаны Ала Радзюк, Лідзія Цімашэй, Галіна Канановіч, Таццяна Трэсцін і калектыў Мікашэвіцкай гарадской бібліятэкі.
ЛЯХАВІЧЫ
Лугавая – “люкс”
Завяршыліся рамонтныя работы на вуліцы Лугавой у райцэнтры. Доўгачаканым падарункам для гараджан сталі новыя тратуары, бардзюры, асфальтавае пакрыццё з дарожнай разметкай. На вуліцы ўладкавана сістэма водаадвядзення. Усяго на добраўпарадкаванне Лугавой затрачана больш за 570 мільёнаў рублёў.
МАЛАРЫТА
“Жамчужына” райцэнтра
Спартыўны ўніверсальны цэнтр, у якім працуюць трэнажорная зала, тэнісныя корты са штучным пакрыццём, зала для гульнявых відаў спорту і цудоўны басейн, нарэшце атрымаў афіцыйную назву. Па шматлікіх прапановах грамадзян, якія актыўна адгукнуліся на просьбу кіраўніцтва спартыўнага аб’екта прыдумаць яму імя, цэнтр назвалі “Жамчужынай”.
ПІНСК
Залілі полымя
З дапамогай палівачнай машыны КУВП “Пінская ЖКГ” быў патушаны аўтамабіль ВАЗ, які загарэўся акурат сярод дарогі. Верагодна, прычынай інцыдэнту стала кароткае замыканне. Вадзіцель Алег Федарук і слесар Віктар Майшук, якія ў гэты час працавалі на суседняй вуліцы, не разгубіліся і ліквідавалі агонь да прыезду выратавальнікаў.
ПІНСКІ РАЁН
А лепшым чытачам – сувеніры
Бенефіс пад назвай “Бібліятэка – храм, дзе розум і душа чэрпаюць сілы”, прысвечаны 65-годдзю з дня стварэння Сошненскай сельскай бібліятэкі, прайшоў у мясцовым СДК. З віншаваннямі і падарункамі на ўрачыстасць прыехалі шматлікія госці. Завіталі на дзень нараджэння і чытачы: найбольш актыўным з іх бібліятэкар Марыя Боханка ўручыла граматы і памятныя сувеніры. Святочны настрой удзельнікам бенефісу падарыў фальклорны калектыў “Крыніцы” Пінкавіцкага СДК.
ПРУЖАНЫ
У любую кропку – з “Яндэксам”
На картах пошукавай сістэмы “Яндэкс” з’явіліся спадарожнікавыя здымкі яшчэ 16 гарадоў Беларусі, сярод якіх і Пружаны. Цяпер гараджане і сельскія жыхары з дапамогай інтэрнэту змогуць віртуальна пабываць у любым населеным пункце раёна, а замежныя госці – паглядзець, напрыклад, на вядомы палац Сапегаў у Ружанах.
СТОЛІН
Падпісаўся на газету, а атрымаў… DVD
Галоўны прыз падпісной кампаніі раённай газеты “Навіны Палесся” атрымаў пенсіянер з вёскі Рухча-2. Шчасліўчыка завуць Міхаіл Мацвяйчук. Ужо даволі працяглы час ён з’яўляецца пастаянным чытачом і падпісчыкам “раёнкі”. Свой трафей – новенькі сучасны DVD – пераможца атрымаў з рук галоўнага рэдактара “Навін Палесся” Алены Клімушкі, якая асабіста наведалася ў госці, каб павіншаваць мужчыну.
Што новага ў рэгіёнах?
