Калі сыр плача – майстар смяецца

Кобрынскія сыраробы галоўную ўвагу ўдзяляюць якасці выпускаемай прадукцыі
Вы толькі зірніце, якія празрыстыя слёзы на “вочках” сыру! Гэта сведчанне высокай якасці прадукцыі, – узрушана-радасна пераконвала нас намеснік дырэктара па камерцыйных пытаннях Кобрынскага масларобна-сыраробнага завода Вольга Янкоўская. – Калі сыр плача – майстар смяецца. Удаўся сырок!..
Нашы сумненні наконт гэтага зняў сваім пацверджаннем і добразычлівай усмешкай дырэктар прадпрыемства Мікалай Місюк:
– Гэта праўда. З даўніх часоў якасць сыру вызначалі па кропельках на яго “вочках”. Так было. Так ёсць. Так будзе. Самы дакладны барометр якасці. Яго не падменіш нічым…
Што ж робіцца на прадпрыемстве для таго, каб стрэлка гэтага барометра не спаўзла ўніз? На гэтай акалічнасці мы і засяродзілі перш-наперш сваю размову з дырэктарам. Мікалай Сцяпанавіч – суразмоўца асцярожны, але шчыры. Пэўны час пасля службы ў войску і вучобы ў Віцебскай дзяржаўнай акадэміі ветэрынарнай медыцыны працаваў намеснікам дырэктара па вытворчасці Барысаўскага мясакамбіната. Пасада і налажыла, відаць, пэўны адбітак, прывучыла выверана даводзіць свае меркаванні. Тым больш зараз, калі ён – дырэктар – адказвае за ўсё: і за людзей, і за вытворчасць.
– Апошнім часам нам удаецца забяспечваць стабільнасць якасці. І гэта – самае галоўнае. Стаўка зроблена на чалавека: інжынер ён, майстар, рабочы, вартаўнік – розніцы няма. Да ўсіх аднолькавая павага, заробак з улікам каэфіцыента карыснага дзеяння, які ўзяты пад кантроль.
Трэба адзначыць, што на прадпрыемстве шануюць людзей, дбаюць пра іх. Заробак добры – у сярэднім 1 мільён 700 тысяч атрымліваюць завадчане. Вырашана кадравае пытанне. “Завод наш старэнькі, а кадры – маладыя”, – з гонарам гавораць тут. І сапраўды, сярэдні ўзрост работнікаў 35-40 гадоў. Шмат працоўных дынастый. Пры прыёме на работу дзецям, чые бацькі працуюць тут, аддаецца перавага.
І не толькі за гэта ўдзячны завадчане свайму кіраўніцтву. У студзені будучага года будзе здадзены чарговы 40-кватэрны дом. Чарга на жыллё часова знікне. Але арганізаваны прадпрыемствам ЖБК “Малочнік” не перастане існаваць – трэба абслугоўваць будынкі, ды і маладая змена час ад часу патрабуе жылля ці паляпшэння яго ўмоў. Так што работы хопіць.
Не застануцца без яе і работнікі заводскай сталовай, дзе абеды танныя, буфета, дзе можна набыць сваю прадукцыю, трэнажорнай залы, медпункта, стаматалагічнага і масажнага кабінетаў і, вядома ж, фірменных магазінаў, якія апошнім часам з’явіліся не толькі ў Кобрынскім раёне, але і ў абласным цэнтры.
Дарэчы, прадукцыя кабрынчан у Брэсце запатрабавана. І сакрэту ў гэтым няма.
– Працуем па традыцыйных тэхналогіях, – гаворыць Мікалай Сцяпанавіч. – А яны прадугледжваюць усё натуральнае. Таму і з экспартам праблем не ўзнікае.
Напрыклад, марожанае вырабляецца толькі з цэльнага малака і салодкіх вяршкоў, у аснове ёгуртнай закваскі – жывыя культуры. Хіміћнскі масларобна-сыраробны завод” ідзе за межы рэспублікі па высокай экспартнай цане.
Чыя ж перш-наперш заслуга ў гэтым?
На прадпрыемстве працуе 641 чалавек, і кожны на сваім участку работы клапоціцца пра якасць і смак прадукцыі. Найбольш увагі надаецца таварам гандлёвай маркі “Кобрынскія сыры”. Больш сотні чалавек “чаруюць” у цэху па вытворчасці сыру. Прадукт, які даўно стаў візітнай карткай не толькі завода, але і Кобрына, вырабляецца сапраўднымі прафесіяналамі па асаблівай тэхналогіі і толькі з натуральнай сыравіны. 22 віды гэтай прадукцыі налічваецца цяпер на прадпрыемстве.
– Мы вырабляем 15 тон сыру ў суткі, у сезон даходзіць да 25 тон, – расказвае начальнік цэха Руслан Чыбатар. – У нашым цэху праведзена мадэрнізацыя вытворчасці. Абсталяванне закрытага тыпу дазваляе павысіць узровень якасці і бяспекі сыру.
З улікам тэндэнцыі развіцця беларускага і расійскага рынкаў, а таксама пажаданняў пакупнікоў увесь час абнаўляецца і пашыраецца асартымент. Беларусы ўсё часцей паказваюць вытанчаны густ і становяцца больш патрабавальнымі.
А сёлета ААТ “Кобрынскі масларобна-сыраробны завод” наладзіў вытворчасць сыру “Мраморный”. Гэты сыр – цудоўны натуральны прадукт, які спалучае насычаны саладкаваты смак і арыгінальны мармуровы колер бела-аранжавых таноў. Распрацавана дакументацыя, і рыхтуецца да асваення сыр “Чорны прынц” са смакам адтопленага малака.
Асартымент плаўленых сыроў, добра вядомых пакупнікам яшчэ з савецкіх часоў – такіх, як “Янтар”, “Дружба”, “Расійскі класічны”, дапоўнены новымі. Палюбіліся пакупнікам сыр плаўлены “Янтарны”, “Аматарскі класічны”, “Шакаладны кобрынскі”. Усяго на заводзе вырабляюць 17 відаў плаўленых сыроў, 8 з іх – луставыя. Усе сыры маюць традыцыйны класічны смак, сучасную еўрапейскую форму і ўпакоўку.
– Зыходзячы з высокага попыту на марожанае ў вафельным стаканчыку, праведзена перааснашчэнне лініі па вытворчасці марожанага, – расказвае Сяргей Дзегіль, начальнік цэха па вытворчасці сухога абястлушчанага малака і марожанага. –  Гэта дазволіла не толькі пашырыць асартымент, але і павялічыць аб’ёмы вытворчасці. Пакупнікам кобрынскі завод прапануе добра вядомыя віды марожанага – пламбір, сметанковае, шакаладнае, крэм-бруле.
Сёлета выпушчана серыя марожанага “Айс-клубніцы”, “Айс-чарніцы”, “Айс-карамель”, сметанковага класічнага з водарам ванілі з напаўняльнікамі ў вафельным стаканчыку. Прадукцыя вырабляецца з натуральнага малака, свежай смятанкі.
Разнастайныя соусы і маянэзы таксама вырабляюць тут. З устаноўкай новага абсталявання  “Карл Шнэль” якасць гэтай прадукцыі значна палепшылася. Асаблівасць яе – густая і мяккая кансістэнцыя. Пашыраны асартымент маянэзаў, пачаты выпуск маянэзу “Посны”. Пакупнікам вельмі падабаецца яго кісла-салодкі смак.
– У масларобным цэху завода працуе навейшае сучаснае абсталяванне па вытворчасці тварагу і мяккіх сыроў, – расказвае галоўны тэхнолаг прадпрыемства Валянціна Дацкевіч. – Адрозніваецца кобрынскі тварог мяккай і вельмі далікатнай кансістэнцыяй. У будучым плануецца далейшая мадэрнізацыя вытворчасці тварагу і мяккіх сыроў у вакуумным упакаванні… Акрамя таго прадпрыемства  вырабляе натуральныя ёгурты “Брынка” рознай фасоўкі і ўпакоўкі з разнастайнымі напаўняльнікамі…
Гісторыя Кобрынскага масларобна-сыраробнага завода налічвае ўжо 70 гадоў. За гэты час сфарміравана цвёрдая палітыка прадпрыемства – максімальнае задавальненне запытаў спажыўцоў, захаванне прэстыжу на асвоеных рынках збыту і стварэнне іміджу на новых, а таксама забеспячэнне якасці прадукцыі шляхам укаранення перадавых тэхналогій і сучасных метадаў кіравання вытворчасцю. І ўсё гэта – дзеля таго, каб пакупнікі зноў і зноў аддавалі перавагу смачнай і карыснай кобрынскай прадукцыі.
Уладзімір СІТУХА, “НТ”,
Вольга СВІРЫДОВІЧ, “НТ”,
г. Кобрын.