Беларусь

Пра аплату, навучанне і прафесію…


Першы год у Брэсцкім дзяржаўным універсітэце імя А.С. Пушкіна на базе філалагічнага факультэта існуе  аддзяленне журналістыкі. Пакуль было створана толькі дзве групы. Па адной на дзённым і завочным аддзяленнях. 37 чалавек летам ужо пераведзены на другі курс. А прыёмная камісія ў гэтыя дні праводзіць залічэнне першакурснікаў. Пакуль навічкі радуюцца свайму паступленню, я вырашыла падвесці вынікі першага года навучання. Чаму навучыліся юныя журналісты Брэстчыны? Ці зрабілі яны свой першы крок у будучую прафесію? Ці ідуць рэдакцыі насустрач навучэнцам? Ды ўвогуле, ці не пашкадавалі яны, што выбралі менавіта гэты шлях?
Вольга КАВАЛЬКО:
– Аб журна-лістыцы ведала мала. Але зараз не шкадую, што вучуся. Паступленне было абдуманым крокам. Методыка выкладання, на мой погляд, пакідае жадаць лепшага. Я прыкладна гэтага чакала – усё ж першы набор. Але, як сказаў мне адзін разумны чалавек, першыя наборы самыя неардынарныя! Рэдакцыі брэсцкіх газет разумеюць нас, публікуюць. Праўда, перад гэтым трэба некалькі разоў патэлефанаваць і нагадаць пра сябе.
Юлія ЦВОР:
– Навучылася ісці лягчэй на кантакт з людзьмі, выказваць свае думкі. Але на самым пачатку збіралася нават забраць дакументы. Потым, пасля экзаменаў, вырашыла, што буду вучыцца. Стала даволі цікава. Не здавальняе толькі аплата за навучанне – досыць вялікая сума, якая не кожнаму па кішэні. І вучэбны працэс пакуль не абыходзіцца без накладак, але гэта ж толькі першы набор. З рэдакцыямі пакуль не знаёмілася, але, думаю, у мяне ўсё атрымаецца.
Юлія КОСАРАВА:
–Мэтанакі-равана паступала на завочнае аддзяленне. Не думаю, што журналістыцы  можна навучыцца на дзённым. Можа, я і памыляюся… Але на завочным больш самастойнасці і практыкі. Думаю, вучыся я на дзённым аддзяленні, у мяне не было б і паловы публікацый, якія ёсць на цяперашні час. З рэдакцыямі пачала супрацоўнічаць яшчэ да паступлення, таму праблем з гэтым няма. Я лічу, што калі да другога курса вы не пачалі кантактаваць з рэдакцыямі, то падумайце, ці правільна выбралі прафесію.
Павел БЫБКО:
– Мне падабаецца прафесія журналіста магчымасцю выказаць свой пункт гледжання па любой праблеме. За год навучання я стаў больш адказным.  Тыя рэдакцыі, куды я прапаноўваў свае матэрыялы, падыходзілі да мяне вельмі ўважліва, дапамагалі, давалі параду. Плата за навучанне мяне таксама здавальняе, таму што ў параўнанні з іншымі навучальнымі ўстановамі яна значна танней.
Запісала Таццяна КАЗЛОЎСКАЯ,
г. Брэст.

Пра аплату, навучанне і прафесію…
Оцените статью

Добавить комментарий

Авторизация
*
*
Генерация пароля